Agisana a aza a zamalinga a gbani-gbani
12
Ɗa Yesu u danai,
“Panai arabali a nam pa:
Vuma vi yoku ɗa u yaꞋin kashina ka̱ nɗimbi.
Ɗa u kanzai kaꞋa u ka̱ra̱Ꞌa̱ka̱i,
ɗa u ga̱va̱i ubuta̱ u na a kupisha umaci wa punu,
ɗa u maꞋi ubuta̱ ugaɗi adama a vuza na u kindaka yi kashina ka.
Ɗaɗa u zuwai aza a zamalinga a lapulaka yi kaꞋa,
ɗa u lazai a kubana nwalu.
Marukusu 12:1-17
2 Ana ayin a yaꞋin a na a taꞋa umaci wa,
ɗa u suki kagbashi ka̱ ni wa acimbi wa adama a na wi isaka yi i na u ciya̱i.
3 Ana aza zamalinga e enei ni,
ɗa e remei kagbashi ka.
Ɗa a lapai,
ɗa o lokoi ni u bono a kpaꞋa ekiye agaɗa.
4 Ɗa u doku u suꞋuki le kagbashi ko yoku.
Ɗa a lapai ni a kaci.
Ɗa e nekei ni wono o lokoi ni kpamu o kubono a kpaꞋa babu ili.
5 Ɗa vuma va u doku ɗa u suki kagbashi ko yoku,
ɗa nam pa ɗa a unai ni.
Vuma va u suku ta̱ uma n a̱bunda̱i,
a unai aza o yoku ɗa a lapai aza o yoku n o govoi.
6 Nam pa vuma vu kashina va u buwa ta̱ n vuza te adama a na u suku,
maku ma̱ ni ma na u cigai n a̱bunda̱i.
Ɗa u suki ni u danai,
‘I ta̱ kpamu a kupana wovon u ni.’
7 Ana aza a zamalinga a e enei ni.
Ɗa a danai,
‘Magaji ma̱ ni ma na ɗe a̱ kuta̱wa̱,
yaꞋan tsu una yi,
ka̱ta̱ a̱tsu tamkpamu tso okpo ci lyaꞋa agadu a̱ ni.’
8 Ɗa a̱ ka̱na̱i ni,
ɗa unai,
a ɗikai ni a vakangi ni pulai vu ubaru.
9 “Yi ɗa̱i i gaꞋin vuza vu kashina vu nan lo va u yaꞋan?
Sai u bana wu una aza a zamalinga a ra̱ka̱,
ka̱ta̱ u zuwa aza o yoku.
10 Ka̱ta̱ i saꞋwa kene punu a Katagarda ka Ciɗa ba?
Ana a danai,
‘Katali ka na amaꞋi a iwain,
ka ɗa ko okpoi kenene ke mere.
11 Na lo va dem ulinga u Ka̱shile u ɗa,
wa̱ tsu kpamu ili i mereve i ɗa.’ ”◊
12 Ɗa aza e kelime a Yahuda a̱ la̱nsa̱i uye u na a̱ kuka̱na̱ yi,
adama a na e yeve ta̱ n ele ɗa wi a kadanshi,
amma i ta̱ o wovon u uma.
Ɗa a̱ ka̱sa̱kpa̱i ni biꞋi,
ɗa a lazai.
Keci adama a kutsupa ku utafu
13 Ɗa a̱ suꞋuki ni Afarishi o yoku,
n uma a̱ Hiridu,
adama a na i ta̱ a kuciga a̱ ciya̱ Yesu n unushi.
14 Ana a yawai,
ɗa e ecei Yesu,
a danai,
“A̱tsu ci yeve ta̱ avu vuma vu mayun ɗa.
Avu kpamu ili i bura wu n izagbushi ba,
vu ɗika ta̱ uma dem derere,
ayin tutu vi ta̱ o kuyotsongusu uma ili i Ka̱shile.
Dana tsu,
derere ɗa tsu tsupa Mogono Kaisa utafu,
ko tsu tsupa ba?”
15 Ana u yevei ili i na i a kudansa a̱ a̱ɗu e le,
ɗa we ecei le,
“Yi ɗa̱i i zuwai ɗa yi o kukondo mu tsu nam pa?
Tuka̱i mu n vikebea vi dinari me ene.”
16 Ana a̱ tuka̱i ni,
ɗa we ecei le,
“Kululu,
n kula ku yayi ki punu a̱ ubuta̱ u vikebe va?”
Ɗa a̱ ushuki ni,
“Ku Kaisa ku ɗa.”
17 Ɗa u danai le,
“Nekei Kaisa ili i na yi i Kaisa,
ka̱ta̱ i neke Ka̱shile kpamu ili i na yi i Ka̱shile.”
Ɗa uma a yaꞋin mereve ma̱ ni n a̱bunda̱i.
A yaꞋin keci ka aza a na a̱ kuɗenga̱ a kasaun
18 Uma o yoku a ɗa e ci ɗeke le A̱sa̱dukiya,
aza a na a̱ kpa̱ɗa̱i kushuki a na vuma u kuwa̱ baci u kuɗenga̱.
Ɗa a banai wa̱ ni,
ɗa e ecei ni,
Marukusu 12:18-44
19 “Malum,
a̱yi Musa u ɗanaka tsu ta̱,
u danai vuza na baci vuza ni u kuwa̱i,
ɗa u ka̱sa̱kpa̱i vuka babu na vu matsai.
Vuza ni u sosuku vuka va,
adama a na u matsaka vuza ni muku.
20 Uma o yoku a ɗa i ta̱ uma e cindere.
Vuza iyain u yaꞋin yolo,
ɗa u kuwa̱i u ka̱sa̱kpa̱ kucina̱ ba.
21 Ɗa vuza ire u sosuki vuka va,
ɗa u kuwa̱i babu kucina̱ kpamu ali a kubana u vuza tatsu feu nannai.
22 Ɗa a̱ kuwa̱i ele uma e cindere e le dem babu a̱ ka̱sa̱kpa̱ kucina̱,
ali ɗa vuka va feu vu ta̱wa̱i vu kuwa̱i.
23 To,
kanna ka na uma a̱ kuɗenga̱ a̱ ukpisa̱,
vuka vi yayi wa kuɗamgba wo kokpo?
Adama a na ele uma e cindere dem o sosuku yi ta̱.”
24 Ɗa Yesu wu ushuki le,
“A̱ɗa̱ va adama a nan lo a ɗa i puwa̱nka̱i.
Adama a na i yeve kadanshi ka̱ Ka̱shile ba,
ɗa kpamu i kpa̱ɗa̱i kuyeve utsura u Ka̱shile.
25 Ayin a na baci a̱kpisa̱ a̱ ɗenga̱i,
a kuyaꞋan yolo ba,
i ta̱ o kokpo tsa alingata a̱ Ka̱shile.
26 Ukuna u kuɗenga̱ ukpisa̱,
ka̱ta̱ i kece a katagarda adama a ili i na Ka̱shile ka danai Musa,
a̱ ubuta̱ u na maɗanga mi a̱ kukula̱ ba?
U danai ni ‘Mpa ɗa Ka̱shile ki Ibrahim n ki Ishaku n ka Yakubu?’
27 A̱yi Ka̱shile ka aza a wuma kaꞋa,
amma Ka̱shile ka̱ a̱kpisa̱ ba.
Mayun i puwa̱nka̱ ta̱ ka̱u.”
Wila̱ u na u laꞋi m gbayin
28 Ɗa malum ma̱ Wila̱ mo yoku ma yawai,
ɗa u cinai le a kanananai.
Ana we enei Yesu wu ushuki le mayin,
ɗa we ecei,
“Wila̱ u Ka̱shile u ne u ɗai u laꞋi tamkpamu?”
29 Ɗa Yesu u danai ni,
“Ili i iyain i na i laꞋi m gbayin i ɗaɗa:
‘Zuwai atsuvu i pana,
a̱ɗa̱ Israila.
Vuzavaguɗu Ka̱shile ka̱ tsu a̱yi ɗa endeꞋen.
30 Vi ciga Ka̱shile Vuzavaguɗu endeꞋen n ka̱ɗu ka̱ nu ra̱ka̱,
n wuma u nu ra̱ka̱,
m ma̱riki ma̱ nu ra̱ka̱,
n utsura u nu dem.’◊
31 Ili i re i ɗaɗa,
‘Vi ciga vuza nu uteku u na vi cigai ka̱ci ka̱ nu.’◊
Babu ili i na kpamu i laꞋi na lo.”
32 Ɗa malum ma ma̱ ushuki ni,
“Ta nannai Malum,
Vuzavaguɗu Ka̱shile a̱yi ɗa endeꞋen,
babu vuza yoku.◊
33 Vi ciga yi kpamu n ka̱ɗu ka̱ nu ra̱ka̱,
n kuyeve ku nu ra̱ka̱,
n utsura u nu feu.
Vuza kpamu u ciga vuza ni uteku u na u cigai ka̱ci ka̱ ni.
Na lo u laꞋa ta̱ alyuka o kusongu n e kuneꞋe dem.”
34 Ana Yesu we enei uteku u na wu ushuki mayin,
ɗa u danai ni,
“Vu buwa daꞋin n tsugono tsu Ka̱shile ba.”
Ayin a nan lo uma o doku a fuɗa e ece yi ili ba.
Keci adama a maku ma Dawuda
35 Yesu o kuyotsongusu uma punu A̱Ꞌisa̱ a Gbayin.
Ɗa we ecei le,
“Nini ɗai nlum n wila̱ n kudana Kirisiti Kishi maku ma Dawuda maꞋa?
36 “Adama a na Ayinviki a̱ Ka̱shile a ɗa a zuwai Dawuda n ka̱ci ka̱ ni u danai,
‘Vuzavaguɗu u danai vuzagbayin vu va̱,
da̱sa̱ngu na e kukiye ku singai ku va̱.
Ali ayin a na n zuwai irala i nu ɗaka vi idasakpatsu i ene a̱ nu.’◊
37 “Dawuda n ka̱ci ka̱ ni,
u ɗekei ni ‘Vuzavaguɗu vu va̱’,
nini ɗai kpamu a̱yi u kokpo maku ma̱ ni?”
Uma n a̱bunda̱i a panai uyoꞋo u kuyotsongusu u ni.
Yesu u dansukai nlum n Wila̱
38 A̱yi punu o kuyotsongusu uma,
ɗa u danai le,
“YaꞋin mayin nu nlum n Wila̱,
aza a na a ci ciga kuꞋukasa ntogu m gbagbaꞋin,
i ta̱ kpamu a kuciga uma a̱ kya̱sa̱ le e kuden.
39 Koɓolo n kuciga ida̱shi i na i laꞋi n kugaꞋan a̱ kunu ka avasa,
n ida̱shi yi ubuta̱ u ka̱ɗiva̱ dem.
40 Ele ɗa aza a na a ci lyaꞋa ucanuku wa̱ a̱ma̱ci a na ali e le a̱ kuwa̱i,
ka̱ta̱ a̱ ka̱na̱ kuyaꞋan kavasa n ugaɗi.
Adama a nannai ele ɗa aza a na a kuyaꞋanka afada a gbangam.”
KuneꞋe ku kagapa ka vuka
41 Ɗa Yesu u da̱sa̱ngi ɗevu n ubuta̱ u kuzuwa ki ikebe a̱ A̱Ꞌisa̱ a Gbayin,
a kinda uma a kuzuwa.
Aza a uciyi n a̱bunda̱i a̱ ka̱na̱i kuzuwa punu ikebe n a̱bunda̱i.
42 Ɗa kagapa ka vuka ku unambi ko yoku ka na vali vi ni vu kuwa̱i,
ku uta̱i ɗe,
ɗa u zuwai iyum i re.b
43 Ɗa Yesu u ɗekei mukumitoni n ni,
ɗa u danai le,
“Kagapa ku unambi ka nam pa,
u zuwa ta̱ ka̱u u laꞋi ili i na uma a nan lo a dem a zuwai.
44 Aza a nan lo a dem e kenuku ta̱,
ɗa e nekei punu udukuyan u le.
Amma a̱yi ta na u neke ta̱ n unambi u ni dem,
n ikebe i na wi n i ɗa ra̱ka̱.”