Yesu u suki uma amangatatsunkupa n aza e re
10
Ana i nam pa i lazai,
ɗa Vuzagbayin u zagbai uma o yoku amangatatsunkupa n aza e re,a
ɗa u suki le aza e re e re e kelime ka̱ ni a̱ likuci likuci ra̱ka̱ i na wa̱ kuta̱wa̱ wa bana.
Luka 10:1-24
2 U danai le,
“Ili i vikyaꞋa i yimkpa ta̱,
amma aza a ulinga a̱ gusa̱ ta̱.
Folonoi Vuzagbayin vu vikyaꞋa va u suku aza a ulinga a kashina ka.
3 Banai,
mi ta̱ a̱ kusuku ɗa̱ tsu muku mu nlala e mere ma̱ nkunzukunzu.
4 Ka̱ta̱ i ɗika kazuwatsu,
ko ujika,
ko ataka o yoku ba.
Ka̱ta̱ kpamu i shamgba ikya̱shi a uye ba.
5 “Ayin a na baci yi a kuꞋuwa a kpaꞋa,
i dana biꞋi,
‘Ma̱ta̱na̱ a kpaꞋa ku nam pa.’
6 Vuza vu ma̱ta̱na̱ wi baci punu,
ma̱ta̱na̱ ma̱ ɗa̱ mi ta̱ o kuyongo n a̱yi.
Vuza vu ma̱ta̱na̱ wi baci punu ba,
maꞋa mi ta̱ o kubono wa̱ ɗa̱.
7 Ka̱ta̱ i ka̱na̱ kusabaꞋasa kpaꞋa ba,
amma shamgbai a kpaꞋa ku nan lo ka.
I lyaꞋa ka̱ta̱ kpamu i soꞋo ili i na e nekei ɗa̱ dem,
adama a na u gaꞋan ta̱ kayaꞋin ku ulinga u ciya̱ katsupu ka̱ ni punu.
8 “Vu uwa baci a̱ likuci,
ɗa a isai nu,
lyaꞋa ili i na a̱ tuka̱i nu dem.
9 Potsokpo aza a mbanaki a na i lo,
ka̱ta̱ vu dana le,
‘Tsugono tsu Ka̱shile ci yawa ta̱ ɗevu n a̱ɗa̱.’
10 Amma i uwa baci a̱ likuci,
ɗa a isai ɗa̱ ba,
uta̱i a uye,
ka̱ta̱ i dana,
11 ‘Ko kubuta̱ ku likuci ku ɗa̱ ku na ku kaɓai ene a̱ tsu,
ci ta̱ a̱ kuka̱pa̱tsa̱ ku ɗa adama a̱ ɗa̱.
Ka̱ta̱ kpamu i yeve,
tsugono tsu Ka̱shile ci yawa ta̱ ɗevu.’
12 N dana ɗa̱,
a kanna ka afada Ka̱shile ki ta̱ a kulaꞋa n kupana asuvayali o Sodom an wa pana asuvayali a̱ ɗa̱!”
Likuci i na i kpa̱ɗa̱i kuneke a̱ɗu e le
13 Yesu u lyaꞋi kelime,
“Atakaci i ta̱ a kuvana ɗa̱,
aza o Korasinu m Besaida!
Ili i mereve i na a yaꞋankai ɗa̱,
ishi baci a yaꞋanka i ɗa Taya n Sida,
ishi ta̱ a̱ kushika̱ ɗe unushi u le m megeshe,
o kuyongo n akashi n kokomo adama a una̱mgbuka̱tsuma̱.
14 Amma a̱ ubuta̱ wa afada,
u laꞋa ta̱ a takacika ɗa̱ n a̱bunda̱i,
an a takacika Taya n Sida.
15 A̱ɗa̱ kpamu aza a Kafarnahum,
i ta̱ a̱ kuɗengusa̱ ɗa̱ ali a kubana gaɗi?
A̱Ꞌa̱,
yi ta̱ a kuꞋuwa ɗaka vu kpenle ka̱ a̱kpisa̱.
16 “Vuza na baci u panakai ɗa̱,
wi ta̱ a kupanaka mu feu.
U iwan ɗa̱ baci,
u iwan mu ta̱ feu.
Amma vuza na baci u iwan mu,
u iwan ta̱ vuza na u suki mu kpamu.”
Ɗa a lazai a banai ta na.
Uboni u uma amangatatsunkupa n aza e re a
17 Uma amangatatsunkupa n aza e re a nan lo o bonoi m ma̱za̱nga̱,
ɗa a danai Vuzagbayin,
“Ali n wunla̱i u gbani-gbani dem u panakai tsu,
adama a kula ku nu.”
18 Ɗa Yesu wu ushuki,
“Me ene ta̱ MalyaꞋi a̱ kuyikpa̱ tsu ulaɗi u na wu uta̱i gaɗi.
19 N neke ɗa̱ ta̱ utsura u na i kudasa oko n adyaɓu.
Ka̱ta̱ kpamu i lyaꞋa utsura u vurala vu ɗa̱ vu nan lo,
babu ili i na i kusaꞋwa ɗa̱.
20 Ka̱ta̱ i yaꞋan ma̱za̱nga̱ an wunla̱i u gbani-gbani u panakai ɗa̱ ba,
amma yaꞋin ma̱za̱nga̱ ka̱u a na ula a̱ ɗa̱ a yaꞋin uɗani na ɗe gaɗi.”
21 Ayin a nan lo a,
Yesu a̱yi m ma̱za̱nga̱ n a̱bunda̱i n Ayinviki a̱ Ka̱shile,
ɗa u danai,
“N cikpa wu ta̱,
Dada,
Vuzavaguɗu vu gaɗi n iɗika,
adama a na vu sokongu ta̱ ili i nam pa a̱ ubuta̱ wa aza a ugboji n aza a na i n kuyeve,
ɗa vu uta̱ka̱i i ɗa a̱ ubuta̱ wa aza a na i an muku.
E,
ta nannai Dada,
adama a na ɗaɗa u yokpoi nu.
22 “Ili ra̱ka̱ Dada vu va̱ u neke mu ta̱ i ɗa.
Babu vuza na u yevei Maku,
sai Esheku endeꞋen,
babu kpamu vuza na u yevei Esheku a,
sai Maku ma endeꞋen,
koɓolo n aza a na Maku ma ma zagbai u dansa ukuna u ni.”
23 Ɗaɗa u kpatalai a̱ ubuta̱ wu mukumitoni n ni,
ɗa u dansai n ele endeꞋen le paki,
“Una̱singai u ɗa wa̱ a̱shi a na e enei ili i na ye enei.
24 N dana ɗa̱ eneki nu ngono n a̱bunda̱i a cigai e ene ili i na ye enei,
amma e ene i ɗa ba.
Ka̱ta̱ kpamu a pana ili i na i panai,
amma a pana i ɗa ba.”
Agisana a vuza vu Samariya vu singai
25 Kanna ke te,
keyevi ka̱ Wila̱ u ɗenga̱i kashani o kukondo Yesu.
Ɗa we ecei,
“Malum,
yi ɗa̱i n kuyaꞋan adama a na n ciya̱ wuma u na u kukotso ba?”
Luka 10:25-42
26 Ɗa wu ushuki,
“Yi ɗa̱i yi uɗani a katagarda ka Wila̱?
Nini ɗai vi ci kece kaꞋa?”
27 Ɗaɗa wu ushuki,
“Ciga Vuzavaguɗu Ka̱shile ka̱ nu n ka̱ɗu ka̱ nu ra̱ka̱,
n wuma u nu,
n utsura u nu,
m ma̱riki ma̱ nu dem.
Vi ciga kpamu vuza nu tsu ka̱ci ka̱ nu.”◊
28 Yesu u danai,
“Vu ushuku ta̱ derere.
YaꞋan nahannai,
adama a na vi yongo n wuma.”◊
29 Amma adama a na u ciga ta̱ wa lapula ka̱ci ka̱ ni,
ɗa we ecei Yesu,
“Yayi tamkpamu vuza va̱?”
30 Ɗa Yesu u danai,
“Vuma vi yoku ɗa wu uta̱i a Urishelima a kubana e Jeriko,
ɗa u uwai e ekiye a aza a̱ ma̱ga̱la̱ka̱.
O foɗoi ni ntogu,
ɗa a lapai ni,
ɗa a lazai,
a̱ ka̱sa̱kpa̱i ni ulimi,
wuma feu e ekiye a̱ Ka̱shile.
31 Ganu vi yoku a̱yi a kuwala a uye wa,
ana we enei vuma va,
ɗa u katsukpai ni,
ɗa u lazai.
32 Ɗa vuza vi Levi feu ana u walai lo,
ɗa we enei vuza va,
ɗa u katsukpai daꞋin.
33 Amma vuza vu Samariya a̱yi a nwalu,
ɗa u yawai a̱ ubuta̱ u na vuza va wi.
Ana we enei ni,
ɗa u panai asuvayali a̱ ni.
34 U banai u vuza va,
ɗa wa alasai ni untsu a,
u sukumakai ni kpamu maniꞋin ma̱ a̱guma̱.
Ɗa u kumbakai ni a majaki ma̱ ni ma,
ɗa u ɗikai ni sai a kpaꞋa ko omoci,
adama a na a yaꞋan ciba ci ni.
35 Ana kayin ka asai,
u ɗikai ikebeb i re,
ɗa u nekei vuza vu kpaꞋa ko omoci va.
U danai,
‘YaꞋan ciba ci ni.
Ayin a na baci m bonoi,
mi ta̱ e kuneke wu ra̱ka̱ ili i na vu unai.’ ”
36 Ɗa Yesu we ecei ni,
“A̱ ka̱tsuma̱ ka uma a tatsu a,
yayi vi sheshei wi vuza vu singai vu vuza na u uwai e ekiye a aza a̱ ma̱ga̱la̱ka̱ a?”
37 Ɗa keyevi ka̱ Wila̱ ka,
ku ushuki,
“Vuza na u panai asuvayali a̱ ni.”
Yesu u danai ni,
“Bana feu vi yaꞋan nannai.”
A kpaꞋa ku Marta m Meri
38 An Yesu wi a uye m mukumitoni n ni,
ɗa a banai a̱ likuci i vuka vu na e ci ɗeke Marta,
vuza na u ka̱sa̱kpa̱i le a uwa a kpaꞋa ku ni.
39 Wi ta̱ n vangu vi ni vi yoku e ci ɗeke Meri,
vuza na u da̱sa̱ngi a iɗika a asuvu e Yesu a kupana ili i na Yesu wi a kudansa.
40 Amma Marta ofoɓuso a ɗikai ni kayayan.
U ta̱wa̱i wa̱ ni,
ɗa we ecei,
“Vuzagbayin,
vi keɓece ba,
a na vangu vu va̱ vu ka̱sa̱kpa̱i mu n yaꞋan ulinga endeꞋen va̱?
Dana yi u ɓa̱nka̱ mu.”