Yahaya u lapulai uye
3
A̱ ka̱tsuma̱ ka̱ ka̱ya̱ ke gendu ko tsugono tsu Kaisa Tibariya,
ngono n na̱shi n yoku mi ta̱ lo ka̱ca̱pa̱ ka̱ ni:
Bilatu a̱yi ɗa gomuna vi iɗika i Yahuda;
Hiridu Antiba tamkpamu mogono ma̱ Ga̱lili;
vangu vi ni Filibu a kulyaꞋa tsugono ci Ituriya n Tarakunita;
Lisaniya feu a kulyaꞋa tsugono tsu Abiliya.
Luka 3:1-20
2 Ayin a na Hanana n Kayafa i o tsugono tsu anan ganu,
kadanshi ka̱ Ka̱shile ka̱ ta̱wa̱i u Yahaya,
maku ma Zakariya,
a̱yi a kakamba.
3 U ka̱ra̱Ꞌi a̱ ubuta̱ ra̱ka̱,
a uɓon u Kuɗolu ku Urdu n u danai ukuna wa Arabali a Singai.
A kudana uma a̱ shika̱ unushi u le,
n u yaꞋankai le kusumbu ka akucina,
adama a na wo okpo urotu u na Ka̱shile ka cinukpakai n unushi u le.
4 Uteku u na a ɗanai adama a Yahaya a katagarda ke keneki Ishaya:
“Ka̱la̱ka̱tsu e meɗevile e mere mu une,
‘Lapulai uye adama a Vuzagbayin.
Bonokoi u ɗa mejege.
5 I ciɗa̱ngu a̱ra̱Ꞌa̱ ra̱ka̱,
aginda nu nsasan i sa̱ra̱ le o okpo derere.
Uye u na wi n kokondo i bonoko u ɗa mejege.
Uye u gbani-gbani wa̱ a̱ga̱vishi u bono u gaꞋan.
6 Ɗaɗa umaci u vuma ra̱ka̱ u kene wishi u Ka̱shile.’ ”◊
7 Ɗa Yahaya u danai koɓolo ka uma ka na ka̱ ta̱wa̱i wa̱ ni ra̱ka̱,
“A̱ɗa̱ agbaturu,
yayi u danai ɗa̱ i were wupa u Ka̱shile u na wi lo a̱ kuta̱wa̱?
8 YaꞋin ili i na i kuyotsongu an i shika̱i unushi u ɗa̱.
Ka̱sa̱kpa̱i kugita̱ kudana,
‘Ibrahim ɗa esheku a̱ tsu.’
N dana ɗa̱,
punu a atali a nam pa,
Ka̱shile ki ta̱ a kufuɗa kuneke Ibrahim muku.
9 Kogovu ki ta̱ ɗe ugbatyangi punu a aralu a nɗanga a,
adama a na ka gbatya nɗanga n na m kpa̱ɗa̱i kumatsa umaci u singai,
ka̱ta̱ a vakangu a akina.”
10 Ɗa koɓolo ka uma ka ke ecei,
“Yi ɗa̱i tsa kuyaꞋan?”
11 Ɗa wu ushuki le,
“Vuza na baci wi nu ntogu n re u pece n vuza na wi m maꞋa ba.
Vuza vu tsuwaꞋa kpamu u yaꞋan nannai.”
12 Ishi a utafu o yoku a̱ ta̱wa̱i adama a na u yaꞋanka le kusumbu ka akucina,
ɗa e ecei,
“Malum,
yi ɗa̱i tsa kuyaꞋan?”
13 U danai le,
“Ka̱ta̱ yi isa i pasatangu ili i na a danai ɗa̱ yi isa ba.”
14 Ɗa osoji o yoku e ecei ni,
“A̱tsu tamkpamu,
yi ɗa̱i tsa kuyaꞋan?”
Ɗa u danai le,
“Ka̱ta̱ yi isa vuza ikebe n utsura,
ko i reme yi babu u yaꞋan ili ba.
Indai katsupu ka̱ ɗa̱ koci.”
15 Uma i ta̱ a kuvana Kishi ka̱ ta̱wa̱,
adama a nannai ɗa a̱ ka̱na̱i mereve punu a̱ a̱ɗu e le ko Yahaya ɗa Kishi ka.
16 Yahaya wu ushuki le ra̱ka̱,
“N yaꞋanka ɗa̱ ta̱ kusumbu ka akucina m mini.
Amma vuza na u laꞋi mu utsura wi ta̱ lo a̱ kuta̱wa̱.
Ko ataka a̱ ni mi a kufuɗa kufoɗo ba.
Wi ta̱ a kuyaꞋanka ɗa̱ kusumbu ka akucina n Ayinviki a̱ Ka̱shile n akina kpamu.
17 Wi ta̱ n kasasu ke kuyelikpu adama a na u yelikpe,
ka̱ta̱ u ɓolongu i singai o mopon ma̱ ni.
Ka̱ta̱ u songu kopo ka n akina a na a̱ kukima̱ ba.”
18 N uye kakau ɗa Yahaya u danai uma Arabali a Singai,
ɗa u doku u danai le kpamu a sabaꞋa.
19 Amma Yahaya u dansukai Mogono Hiridu Antiba adama a na u ɗikai Hiridiya yolo vuka vu vangu vi ni,
n ili i gbani-gbani i na u yaꞋin ra̱ka̱.
20 Hiridu u doku u yaꞋin unushi u yoku,
ana u ɓa̱ya̱ngi Yahaya a̱ kunu ku ugbashi.
Kusumbu ka akucina ku Yesu
21 Ana uma n a̱bunda̱i a yaꞋin kusumbu ka akucina,
ɗa a yaꞋankai Yesu feu.
A̱yi a kuyaꞋan kavasa,
ɗa gaɗi u ɓa̱yuwa̱i.
Luka 3:21-38
22 Ɗa Ayinviki a̱ Ka̱shile a̱ cipa̱i wa̱ ni n ikyamba tsu moɗoi.
Ɗa ka̱la̱ka̱tsu ku uta̱i gaɗi,
ka danai,
“Avu ɗa Maku ma̱ va̱ ma na n cigai,
mi kpamu a kupana uyoꞋo u nu.”
Tsukaya ci Yesu
23 Ana Yesu u gita̱i ulinga u ni,
wi ta̱ n a̱ya̱ ɗevu n kamankupa.
A̱yi maku ma̱ Isuhu maꞋa (uteku u na uma e sheshei n Isuhu).
Isuhu maku me Heli maꞋa.
24 Heli maku ma Mata maꞋa.
Mata maku me Levi maꞋa.
Levi maku ma Maliki maꞋa.
Maliki maku ma Yana maꞋa.
Yana maku ma̱ Isuhu maꞋa.
25 Isuhu maku ma Matataya maꞋa.
Matataya maku ma Amosu maꞋa.
Amosu maku ma Nahum maꞋa.
Nahum maku ma Azaliya maꞋa.
Azaliya maku ma Najaya maꞋa.
26 Najaya maku ma MaꞋata maꞋa.
MaꞋata maku ma Matataya maꞋa.
Matataya maku ma Shimaya maꞋa.
Shimaya maku ma̱ Isuhu maꞋa.
Isuhu maku ma Yahuda maꞋa.
27 Yahuda maku ma Yowana maꞋa.
Yowana maku me Refaya maꞋa.
Refaya maku me Zerubabe maꞋa.
Zerubabe maku ma Shayatiya maꞋa.
Shayatiya maku ma̱ Niri maꞋa.
28 Niri maku ma Maliki maꞋa.
Maliki maku ma Adi maꞋa.
Adi maku ma Kusama maꞋa.
Kusama maku ma Alumadama maꞋa.
Alumadama maku ma̱ Iri maꞋa.
29 Iri maku mo Yosi maꞋa.
Yosi maku me Eliyaza maꞋa.
Eliyaza maku ma Yarima maꞋa.
Yarima maku ma Mata maꞋa.
Mata maku me Levi maꞋa.
30 Levi maku ma Saminu maꞋa.
Saminu maku ma Yahuza maꞋa.
Yahuza maku ma̱ Isuhu maꞋa.
Isuhu maku ma Yunana maꞋa.
Yunana maku ma Iliyakima maꞋa.
31 Iliyakima maku ma Malaya maꞋa.
Malaya maku ma Manana maꞋa.
Manana maku ma Matata maꞋa.
Matata maku ma Natan maꞋa.
Natan maku ma Dawuda maꞋa.
32 Dawuda maku ma Yasa maꞋa.
Yasa maku ma Abida maꞋa.
Abida maku ma Buwaza maꞋa.
Buwaza maku ma Salumuna maꞋa.
Salumuna maku ma Nasham maꞋa.
33 Nasham maku ma Aminadaba maꞋa.
Aminadaba maku ma Aram maꞋa.
Aram maku ma Hasuruna maꞋa.
Hasuruna maku ma Farisa maꞋa.
Farisa maku ma Yahuza maꞋa.
34 Yahuza maku ma Yakubu maꞋa.
Yakubu maku mi Ishaku maꞋa.
Ishaku maku mi Ibrahim maꞋa.
Ibrahim maku ma Tera maꞋa.
Tera maku ma Naho maꞋa.
35 Naho maku me Seru maꞋa.
Seru maku me Reyu maꞋa.
Reyu maku me Fele maꞋa.
Fele maku me Eba maꞋa.
Eba maku me Shela maꞋa.
36 Shela maku me Kenan maꞋa.
Kenan maku ma Afakasha maꞋa.
Afakasha maku me Shem maꞋa.
Shem maku ma̱ Nuhu maꞋa.
Nuhu maku ma Lame maꞋa.