2 (Na va ɗaɗa mekecu mu ugiti ma na a yaꞋin,

ayin a na Kiriniyu wi gomuna vi Siriya.)

3 Uma dem a banai a̱ likuci i le,

ka̱ta̱ a na a ɗana ula e le adama e mekecu ma.

4 Ɗa Isuhu feu wu uta̱i a Nazara vu uɓon u Ga̱lili a kubana a̱ likuci i Batalami vi Yahuda.

Batalami kpamu ɗaɗa likuci i Mogono Dawuda.

U banai ɗe adama a na a̱yi umaci u Dawuda u ɗa wi.

5 U banai m Meri kamana ka̱ ni adama a na u ɗana kula ku ni.

Wi ta̱ kpamu a kuvana kumatsa ku ni.

6 Ele ɗe ɗa ayin a kumatsa a̱ ni a yawai.

7 Ɗa u matsai maku ma iyain,

kolobo.

Ɗa u palai maꞋa mayin ni nyaga,

ɗa u zuwai ni a kpantsu ki ijanu ka anaka,

adama a na ubuta̱ wi lo an a uwa ba.

8 Nguɓi n yoku mi ta̱ lo a kaꞋasa e keteshe,

adama a na a inda kuzuwa ku le n kayin.

9 Ɗa kalingata ka Vuzavaguɗu ka banai we le ɗe,

ɗa kutashi ku tsugbayin ku Vuzavaguɗu ka akanai le.

Ɗa a̱ rikpa̱i ɗa a panai wovon.

10 Amma ɗa u danai le,

“Ka̱ta̱ i pana wovon ba,

adama a na n tuka̱ ɗa̱ ta̱ n arabali a singai a̱ ma̱za̱nga̱ ma gbayin ma na mo kokpo ma uma ra̱ka̱.

11 Anana a̱ likuci i Dawuda,

a matsaka ɗa̱ ta̱ Kishi,

a̱yi ɗa Kirisiti Vuzavaguɗu.

12 Na va ɗa u kokpo urotu wa̱ ɗa̱:

Yi ta̱ a kucina mereɓu upali ni nyaga.

A vaꞋanki ni a kpantsu ki ijanu ka anaka.”

13 Gogo lo,

ɗa ka̱bunda̱i ka alingata a gaɗi bututu o ɓolongi n kalingata ka nan lo ka.

A̱ ka̱na̱i kucikpa Ka̱shile,

n a danai,

15 Ana alingata a a lazai o kubono gaɗi,

ɗa nguɓi n dananai,

“YaꞋan tsu bana a Batalami,

adama a na ce ene ili i na yi ɗe i na Vuzavaguɗu u danai tsu va.”

16 Ɗa a yaꞋin moloko,

ana a yawai ɗa a cinai Meri n Isuhu m mereɓu ma na mi ɗe uvaꞋanki a kpantsu ki ijanu ka anaka.

17 Ana e enei ni,

ɗa a danai uma ili i na e enei a̱ ubuta̱ u maku wa.

18 Aza a na a panai nannai ɗa a̱ ka̱na̱i mereve,

adama a ili i na nguɓi ma n danai le.

19 Ɗa Meri u ka̱na̱i kuciɓasa n ili i nan lo dem ayin tutu a̱ ka̱ɗu ka̱ ni.

20 Ɗa nguɓi ma n ka̱na̱i uye a kubono a kpaꞋa m ma̱za̱nga̱,

n a cikpai Ka̱shile,

adama a ili i na e enei uteku u na a danai le.

21 A kanna ka̱ kunla̱i,

ana ayin a yawai a na a kiɗa maku ma kavaja,

ɗa e neꞋi ni kula Yesu,

kula ku na kalingata ka ke neꞋi ni,

kafu a yaꞋan ka̱tsuma̱ ka̱ ni.

22 Ana ayin a kutakpa ma̱shinda̱ a yawai uteku u na Wila̱ u Musa u danai,

Isuhu m Meri a ɗikai ni a kubanka yi a̱ ubuta̱ u Vuzavaguɗu.

23 (Uteku u na a ɗanai a̱ Wila̱ wa,

“Maku ma na baci a̱ gita̱i kumatsa dem ma vali,

e neke yi a̱ ubuta̱ u Vuzavaguɗu”).^◊

24 Ɗa a yaꞋin alyuka uteku u na Wila̱ u danai,

“Moɗoi n re ko ntapambara n wawaꞋa n re ɗaɗa a kuyaꞋanka.”^◊

25 Vuma vi yoku vi ta̱ lo a Urishelima,

kula ku ni ku ɗa Saminu.

Vuza na wi kpamu n usuɓi o kutono Ka̱shile mayin.

Wi ta̱ a kuvana vuza na u kisa aza a Israila.

Ayinviki a̱ Ka̱shile kpamu i ta̱ koɓolo n a̱yi.

26 Ayinviki a̱ Ka̱shile a dana yi ta̱ u kukuwa̱ ba,

sai we ene Kirisiti Kishi ka Vuzavaguɗu.

27 Ɗa Ayinviki a̱ Ka̱shile a saꞋwai ni,

ɗa u ɗenga̱i a kubana a̱ A̱Ꞌisa̱ a Gbayin.

Ɗa esheku n a̱na̱ku a̱ tuka̱i m maku ma,

Yesu uteku u na Wila̱ u danai.

28 Ana a gasai,

ɗa Saminu u ɗikai ni e ekiye,

ɗa u cikpai Ka̱shile ɗa u danai,

33 Ɗa a̱na̱ku a maku a n esheku a̱ ni ɗa a yaꞋin mereve,

adama a ili i na u danai.

34 Ɗa Saminu u zuwakai le una̱singai,

ɗa u danai Meri,

a̱na̱ku a maku a,

“Maku ma nam pa ma,

a matsa ta̱ maꞋa adama a na u zuwa uma a Israila n a̱bunda̱i a̱ ta̱ɗa̱tsa̱,

aza o yoku a̱ ɗenga̱.

Urotu u ɗa wi kpamu,

amma uma n a̱bunda̱i i ta̱ a kuꞋiwan yi.

35 Adama a nannai ili i na yi usokongi a̱ a̱ɗu a uma dem,

yi ta̱ a̱ kuta̱.

Una̱mgbuka̱tsuma̱ tsu kotokobi kpamu ki ta̱ a kusaꞋwa ka̱ɗu ka̱ nu.”

36 Keneki ka vuka ko yoku ki ta̱ lo,

kula ku ni ku ɗa Hanatu,

mekere ma Fanula,

umaci wa aza a Asha.

U yaꞋan ta̱ a̱ya̱ e cindere n vali vi ni ana u yaꞋin yolo,

37 ɗa wo okpoi kagapa.

A̱yi kpamu u yaꞋan ta̱ ma̱ma̱ci,

ali a̱ya̱ amanga̱na̱shi n a̱ na̱shi.

U tsu ka̱sa̱kpa̱ A̱Ꞌisa̱ a Gbayin ba,

amma u ci yongo ta̱ o kutono Ka̱shile kanna n kayin punu,

n u ka̱na̱i una̱ n u vasai.

38 Ɗa u banai we le a̱ ka̱tsuma̱ ka ayin a nan lo a.

Ɗa u cikpai Ka̱shile,

ɗa u yaꞋin kadanshi ka maku ka a̱ ubuta̱ u uma dem,

aza a na i a kuvana a̱ ba̱ruwa̱ Urishelima.

39 Ana Isuhu m Meri o kotsoi kuyaꞋan ili i na Wila̱ u danai a yaꞋan,

ɗa a lazai o kubono a̱ Ga̱lili a̱ likuci i na i ida̱shi,

Nazara.

40 Ɗa maku ma mo gbonguroi ali ɗa ma yaꞋin utsura,

ɗa kpamu u shanai n kuyeve.

Ɗa kpamu ucigi u Ka̱shile wi n a̱yi.

41 Ka̱ya̱ dem,

isheku i Yesu i tsu bana ta̱ a Urishelima adama a̱ Ka̱ɗiva̱ ka Kupasamgbanai.

42 Ayin a na wi n a̱ya̱ kupa n e re,

ɗa a banai n a̱yi a̱ ubuta̱ u ka̱ɗiva̱ uteku u na a kiwanai.

43-44 Ana o kotsoi ka̱ɗiva̱ ka,

ɗa i o kubono a kpaꞋa,

ɗa maku ma,

Yesu,

u shamgbai ka̱ca̱pa̱ ɗe a Urishelima.

A yaꞋin nwalu ali kanna ke te,

a dana ta̱ wi ta̱ punu a̱ ubuta̱ u uma,

amma ele e yeve a na wo okpoi ka̱ca̱pa̱ ba.

N kulivi ku nan lo,

a̱ ka̱na̱i kula̱nsa̱ yi a̱ ubuta̱ wa̱ a̱ja̱Ꞌa̱ e le nu mmaci n le.

45 Ana a̱ kpa̱ɗa̱i kene yi,

ɗa a lazai o kubono a Urishelima,

adama a na a̱ la̱nsa̱ yi.

46 Kanna ka tatsu,

ɗa a cinai ni a̱ A̱Ꞌisa̱ a Gbayin a̱ ida̱shi e mere mu nlum m gbagbaꞋin.

U ka̱na̱i kupanaka le,

n u yaꞋankai le keci.

47 Aza a na a panakai ni dem,

ɗa a̱ ka̱na̱i mereve uteku u na wi n kuyeve,

n tsu na wi e kuneke le kpamu wushuki.

48 Ana isheku i ni ye enei nannai,

e yeve ili i na a kudana ba.

Ɗa a̱na̱ku a danai maku ma,

“Yi ɗa̱i i zuwai ɗa vi yaꞋankai tsu nannai?

Eshevu nu mpa tsu takacika ta̱ n a̱bunda̱i,

adama a̱ kula̱nsa̱ wu a̱ ubuta̱ dem.”

49 Ɗa Yesu u danai le,

“Yi ɗa̱i i zuwai ɗa yi a̱ kula̱nsa̱ mu?

U gaꞋan i yeve mpa mi ta̱ a̱ kuda̱sa̱ngu a kpaꞋa ku Dada vu va̱ ba?”

50 Amma ele e yeve ili i na wi a kudansa ba.

51 Ɗa u lazai n ele a kubono a Nazara,

n u tonoi ili i na i a kudana yi mayin.

Ɗa feu a̱na̱ku a zuwai kadanshi ka nan lo a̱ ka̱ɗu ka̱ ni.

52 A ayin a nan lo,

ɗa Yesu u gbonguroi n ugaɗi n kuyeve,

Ka̱shile kpamu ka cigai ni,

n aza a na e yevei ni dem a cigai ni feu.