2 Ɗa Afarishi o yoku a banai wa̱ ni,

adama a na o kondo yi.

Ɗa e ecei ni,

“U gaꞋan ta̱ vuma u loko vuka vi ni?”

3 Ɗa Yesu wu ushuki le,

“Yi ɗa̱i wila̱ u Musa u danai ɗa̱ i yaꞋan?”

4 Ɗa a danai,

“Musa wu ushuku tsu ta̱ ci neke katagarda ka kuna yolo,

yeve vu loko yi.”^◊

5 Ɗa Yesu u danai le,

“Adama a ugbawansuvu u ɗa̱ u ɗa,

Musa u ɗanakai ɗa̱ katagarda tsu nan lo.

6 Amma a ayin a̱ ugiti wa aduniyan Ka̱shile ka yaꞋan le ta̱ vali n vuka.^◊

7 Adama a nannai,

vuma wi ta̱ a̱ kuka̱sa̱kpa̱ esheku a̱ ni n a̱na̱ku a̱ ni,

u bono u ɓolongu ka̱ci ka̱ ni okpo vi te n vuka vi ni.

8 Ka̱ta̱ ele aza e re a o okpo ikyamba i te.

A buwa kpamu aza e re ba,

amma vuza te.^◊

9 Adama a nannai ili i na Ka̱shile ko ɓolongi,

ka̱ta̱ vuza u pece i ɗa ba.”

10 Ana o bonoi a kpaꞋa,

ɗa mukumitoni n ni o doku e ecei ni ukuna u nan lo wa.

11 Ɗa wu ushuki le,

“Vuza na baci de dem u lokoi vuka vi ni,

ɗa u zuwai vi yoku,

tsugbani tsu ɗa wi a kuyaꞋan n a̱yi.

12 Vuka vu ɗenga̱i baci u vali vi ni,

ɗa u banai wo oloi vuza yoku,

tsugbani tsu ɗa wi a kuyaꞋan feu.”

13 Ɗa uma a̱ ka̱na̱i kutusa̱ka̱ yi m muku,

adama a na u saꞋwa le.

Ɗa mukumitoni n ni a̱ ka̱na̱i kusa̱nka̱ le.

14 Ana Yesu we enei nannai,

ɗa ka̱ɗu ka̱ ni ka̱ na̱mgba̱i.

Ɗa u danai le,

“Ka̱sa̱kpa̱i muku n wawaꞋa n ta̱wa̱ wa̱ va̱,

ka̱ta̱ i sa̱nka̱ le ba,

adama a na tsugono tsu Ka̱shile icuꞋu i le i ɗa ci a kuciga.

15 N dana ɗa̱ mayun,

vuza na baci de dem wi isai tsugono tsu Ka̱shile tsu muku ba,

wi a kuꞋuwa a tsu ɗa ba.”

16 Ɗa Yesu wo oɓongi le,

ɗa u zuwakai le una̱singai.

17 Ana wi a̱ kugita̱ nwalu a kubana a Urishelima,

ɗa vuma vi yoku u sumai u ta̱wa̱i u Yesu,

ɗa u kuɗa̱ngi kelime ka̱ ni,

we ecei,

“Malum ma singai,

ili i singai ye ne i ɗai n kuyaꞋan ka̱ta̱ n ciya̱ wuma u babu uteku?”

18 Ɗa Yesu we ecei ni,

“Yi ɗa̱i i zuwai ɗa vi ɗekei mu malum ma singai?

Sai Ka̱shile endeꞋen ɗa vuza singai.

19 Avu vi yeve ta̱ ɗe ili i na wila̱ u danai,

ka̱ta̱ vu una vuza n ucikali u nu ba.

Ka̱ta̱ vi yaꞋan tsugbani ba.

Ka̱ta̱ vi yaꞋan uboki ba.

Ka̱ta̱ vi yaꞋan kadanshi ki ili i na vu kpa̱ɗa̱i kuyeve ba.

Ka̱ta̱ vi lyaꞋa vuza ba.

Cikpa eshevu koɓolo n a̱na̱vu.”^◊

20 Ɗa wu ushuki,

“Malum,

mpa n tono ta̱ ɗe ili i nan lo dem,

ali mpa maku me kenu.”

21 Ɗa Yesu u la̱na̱i ni n a̱shi a ucigi.

Ɗa u danai ni,

“Ili i te i ɗa yo okpoi koci i na i gaꞋin vi yaꞋan.

Bana vi denge ili i na vi n i ɗa dem,

ka̱ta̱ vu peceke aza a unambi.

Vi ta̱ a̱ kuciya̱ uciyi na ɗe gaɗi,

ka̱ta̱ vu ta̱wa̱ vu tono mu.”

22 Ana u panai nannai,

ɗa u lazai n asuvu a̱ ni una̱mgbi,

adama a na wi ta̱ n uciyi n a̱bunda̱i.

23 Ɗa Yesu u kpatalai u la̱na̱i mukumitoni n ni.

Ɗa u danai le,

“Dikyai ɗa vuza vu uciyi u kene tsugono tsu Ka̱shile.”

24 Ɗa mukumitoni n ni n yaꞋin mereve ma kadanshi ma̱ ni.

Ɗa u doku u danai le,

“A̱ɗa̱ muku n va̱,

dikyai ɗa vuma vu uciyi u kufuɗa wa kene tsugono tsu Ka̱shile.

25 U laꞋa ta̱ n ɗevu karakuma ka uwa n vunu vu vubele,

a na vuza vu uciyi wa kene tsugono tsu Ka̱shile.”

26 Ɗaɗa mukumitoni n doku n yaꞋin mereve n a̱bunda̱i,

ɗa a danai,

“Ta baci nannai,

yayi wo tamkpamu u kuciya̱ wishi?”

27 Ɗa Yesu wi indai le,

ɗa u danai,

“A̱ ubuta̱ u uma ili i nan lo ya kuyaꞋan ba.

Amma a̱ ubuta̱ u Ka̱shile,

ili i nan lo dem yi ta̱ a kuyaꞋan.”

28 Ɗa Biturusu u danai ni,

“A̱tsu tsu ka̱sa̱kpa̱ ta̱ ili dem,

adama a na tsu tono wu.”

29 Ɗa Yesu u danai,

“E,

ta nannai mi ta̱ a kudana ɗa̱.

Vuza wi lo vuza na u kuka̱sa̱kpa̱ kpaꞋa ku ni,

ko ataku,

ko nkoshi n ni adama a̱ va̱,

ko u ka̱sa̱kpa̱i a̱na̱ku,

ko esheku,

ko muku n ni,

ko ali kashina ka̱ ni dem,

adama a̱ va̱ koɓolo n Arabali a Singai a̱ va̱ ka̱ta̱ u kpa̱ɗa̱ kuciya̱ katsupu ba.

30 Gogo na a̱ ka̱tsuma̱ ka ayin a nam pa i ta̱ a̱ kuciya̱ katsupu ke le n a̱bunda̱i.

I ta̱ kuciya̱ iꞋuwa,

n aza e le,

n itaku,

n ina̱ku,

m muku,

koɓolo n ashina,

n atakaci kpamu.

Ka̱ta̱ a kubana kelime a̱ ciya̱ wuma u babu uteku.

31 Amma aza e kelime n a̱bunda̱i i ta̱ kokpo aza a̱ ka̱ca̱pa̱,

ka̱ta̱ aza a̱ ka̱ca̱pa̱ o kokpo aza e kelime.”

32 Ele a̱ ka̱tsuma̱ ka nwalu a kuyawa a Urishelima,

Yesu kelime ke le,

ɗa mukumitoni n ni n ka̱na̱i kuyaꞋan mereve.

Aza a na kpamu i o kutono le,

ɗa wovon u ka̱na̱i le.

Ɗa u ɗekei Kupanazere a paki,

ɗa u ka̱na̱i kudana le ili i na i kuciya̱ yi.

33 Ɗa u danai le,

“A̱tsu ɗa na a kubana a Urishelima i ta̱ e kuneke Maku ma Vuma,

a̱ ubuta̱ u anan ganu vu gbagbaꞋin,

koɓolo nu nlum n wila̱.

I ta̱ a kuyaꞋanka yi afada a̱ ukpa̱,

ka̱ta̱ e neke yi e ekiye a Aza̱ka̱yimbi,

adama a na a una yi.

34 Ka̱ta̱ a̱ ka̱na̱ kuzoꞋoso yi,

n a̱ ciꞋikpa̱i ni ntsa̱n.

I ta̱ a kulapa yi,

ka̱ta̱ a una yi.

Amma u yaꞋan baci ayin a tatsu wi ta̱ a̱ kuɗenga̱.”

35 Ɗa Yakubu n Yahaya muku n Zabidi,

a yawai ɗevu n a̱yi,

ɗa a danai,

“Malum,

ci ta̱ a kuciga vi yaꞋanka tsu ili i na tsu folonoi nu dem.”

36 Ɗa wu ushuki,

“Yi ɗa̱i yi a kuciga n yaꞋanka ɗa̱?”

37 Ɗa a danai ni,

“A kanna ko tsugono ka̱ nu,

ka̱sa̱kpa̱ vuza te vu tsu u da̱sa̱ngu e kukiye ku singai ku nu,

vuza te e kukiye ku ugula̱.”

38 Ɗa wu ushuki le,

“I yeve ili i na yi o kufolono ba.

Yi ta̱ a kufuɗa yo soꞋo matan ma atakaci ma na mi o kusoꞋo?

Yi ta̱ a kufuɗa ya yaꞋan kusumbu ka atakaci ku na i a kuyaꞋanka mu?”

39 Ɗa a danai Yesu “E,

ci ta̱ a kufuɗa.”

Ɗa u danai le,

“Yi ta̱ o kusoꞋo matan ma atakaci ma na mi o kusoꞋo.

Ka̱ta̱ a yaꞋanka ɗa̱ kusumbu ka atakaci ku na a kuyaꞋanka mu feu.

40 Amma ida̱shi e kukiye ku singai ko ugula̱ ku va̱,

na lo ka̱ va̱ kaꞋa ba,

ma kufuɗa me neke ɗa̱ ba.

Ka̱shile kaꞋa ke kuneke vuza na u ɗamgbai a̱ ubuta̱ u na u foɓusokoi ni.”

41 Ana mukumitoni kupa n ni n na m buwai m panai nannai,

ɗa a̱ ka̱na̱i kupana wupa u Yakubu n Yahaya.

42 Ɗa Yesu u ɗekei le ɗa u danai le,

“I yeve ta̱ aza a na a zuwai o okpo azagbagbaꞋin a uma a aduniyan,

i ta̱ n utsura a̱ ka̱ci ke le.

43 Amma ta ci a kuyaꞋan nannai n a̱ɗa̱ ba,

vuza na baci de dem wa kuciga kokpo vuza gbayin a̱ ka̱tsuma̱ ka̱ ɗa̱,

mayun ɗa wo okpo kagbashi ka aza a̱ ni.

44 Vuza na baci kpamu wi a kuciga tsugbayin dem,

sai wo okpo kagbashi ka uma ra̱ka̱.

45 Maku ma Vuma ma̱ ta̱wa̱ adama a na uma a yaꞋanka yi tsugbashi ba,

amma adama a na u yaꞋanka uma tsugbashi.

Ka̱ta̱ u neke wuma u ni dem,

adama a na wi isa uma ra̱ka̱.”

46 Ɗaɗa a yawai Jeriko,

a̱yi a̱ kuta̱ Jeriko m mukumitoni n ni koɓolo n uma n a̱bunda̱i,

ɗa ka̱yimba̱ ko yoku ka na e ci ɗeke Batimawu,

ulobo u Timawa.

A̱yi lo ida̱shi a̱ ka̱kina̱ ku uye a kuyaꞋan ufolu.

47 Ana u panai izumgbi i Yesu vu Nazara a kulaza,

ɗa u gita̱i kuɗengusa̱ ka̱la̱ka̱tsu,

“Yesu,

maku ma Dawuda,

pana asuvayali a̱ va̱.”

48 Uma n a̱bunda̱i a dansukai ni,

a danai u paɗa bini,

amma a̱yi u paɗa bini ba.

Ɗa u doku u lyaꞋi kelime n kuɗeke,

“Maku ma Dawuda,

pana asuvayali a̱ va̱.”

49 Ɗa Yesu u shamgbai,

ɗa u danai,

“Ɗekekei mu a̱yi u ta̱wa̱.”

Ɗa e ɗekei ka̱yimba̱ ka,

a danai ni,

“Pana Arabali a Singai,

ɗenga̱,

wi ta̱ e kuɗeke wu.”

50 Ɗa u vakangi ogbodo a̱ ni,

ɗa u ɗenga̱i gogoꞋo a kubana u Yesu.

51 Ɗa Yesu we ecei ni,

“Yi ɗa̱i vi a kuciga n yaꞋanka wu?”

Ɗa ka̱yimba̱ ka ka danai,

“Malum,

mi ta̱ a kuciga me ene ubuta̱.”

52 Ɗa Yesu wu ushuki ni,

“YaꞋan nwalu n nu,

uneki ka̱ɗu ka̱ nu u potsokpo wu ta̱.”

Gogo lo,

ɗa u ka̱na̱i kene ubuta̱,

ɗa u tonoi Yesu.