3 Afarishi o yoku a̱ ta̱wa̱i wa̱ ni ɗa a gbagbalai adama a na a̱ ciya̱ a aza yi a̱ ubuta̱ u kuyaꞋanka yi keci,

“Wila̱ u tsu wu ushuku ta̱ vuma u loko vuka vi ni adama a ili i na de dem we enei adama?”

4 Yesu wu ushuki,

“Mayun i kece ta̱ punu a̱ ubuta̱ u Katagarda ka Ciɗa:

Ana Ka̱shile ka yaꞋin aduniyan,

‘U yaꞋan ta̱ mavali m mavuka.

5 Ɗaɗa i zuwai ɗa vuma u tsu ka̱sa̱kpa̱ esheku n a̱na̱ku a̱ ni ka̱ta̱ u ɓolongu ka̱ci ka̱ ni u vuka vi ni.

Ka̱ta̱ ele aza e re a o okpo vuza te.’^◊

6 Adama a nannai a buwa aza e re ba,

amma vuza te,

ka̱ta̱ vuma u pece le ba,

adama a na Ka̱shile kaꞋa ko ɓolongi le koɓolo.”

7 O doki e ecei ni,

“Yi ɗa̱i tamkpamu i zuwai ɗa Musa u nekei wila̱ adama a na vuma u neke vuka vi ni katagarda ku uloki?”

8 Yesu wu ushuki,

“Musa u ka̱sa̱kpa̱ ɗa̱ ta̱ i loko a̱ma̱ci a̱ ɗa̱ adama a na i iwan ta̱ kushuku n kuyotsongusu ku Ka̱shile,

amma e neke kuloko ka̱ a̱ma̱ci a ayin a̱ ugiti ba.

9 N dana ɗa̱ na,

vuma vu na baci u lokoi vuka vi ni ɗa u zuwai vuka vi yoku,

wi ta̱ a kuyaꞋan tsugbani n a̱yi,

saidei vuka vi ni vi iwan kushiya kaci a̱ ubuta̱ u te.”

10 Mukumitoni n ni n danai ni,

“Ta baci ki nannai a̱ ubuta̱ u vali n vuka vi ni,

u laꞋa ta̱ n kugaꞋan vuma u yongo babu u yaꞋan yolo.”

11 Yesu wu ushuki,

“Kuyotsongusu ku nam pa ku bura yaba dem ba,

amma wa aza a na Ka̱shile ke nekei ku ɗa koci.

12 Ili yi ta̱ lo kakau i na i zuwai ali o yoku a̱ kukpa̱ɗa̱ kuyaꞋan yolo.

Ali o yoku a matsai le ta̱ ndari.

Aza o yoku uma a ɗa a zuwai le o okpo ndari.

Aza o yoku tamkpamu a iwain ta̱ yolo adama o tsugono tsu gaɗi.

Vuza na baci wi a̱ kushuku n kadanshi ka nam pa wu ushuku n kaꞋa.”

13 Uma o yoku a̱ tuka̱i m muku n le a̱ ubuta̱ u Yesu,

adama a na u zuwaka le ekiye a̱ ni ka̱ta̱ u yaꞋanka le kavasa.

Mukumitoni n ni n danai uma a̱ ka̱sa̱kpa̱ kugbandarasa yi.

14 Amma ɗa u danai,

“Ka̱sa̱kpa̱i muku n ta̱wa̱ wa̱ va̱,

ka̱ta̱ i sa̱nka̱ le ba!

Uma a na i tsu muku n nam pa aza o tsugono tsu gaɗi a ɗa.”

15 Ɗa u zuwakai muku ma ekiye a̱ ni adama a na u zuwaka le una̱singai,

ɗa u lazai.

16 Ana ka nan lo ko kotsoi,

ɗa vuma vi yoku vu ta̱wa̱i u Yesu ɗa we ecei ni,

“Malum,

ili i singai ye ne i ɗai n kuyaꞋan ka̱ta̱ n ciya̱ wuma u babu uteku?”

17 Yesu u danai ni,

“Yi ɗa̱i i zuwai ɗa ve ecei mu adama a ili i singai?

Ka̱shile endeꞋen a̱yi ɗa vuza singai.

Vi ciga baci vi ciya̱ wuma u babu uteku,

sai vu tono Wila̱ u ni.”

18 Ɗa vuma va we ecei,

“Wila̱ we ne?”

Ɗa Yesu wu ushuki,

“ ‘Ka̱ta̱ vi yaꞋan munaka ba.

Ka̱ta̱ vi yaꞋan tsugbani ba.

Ka̱ta̱ vi yaꞋan uboki ba.

Ka̱ta̱ vi yaꞋanka uma aꞋuwa ba.

19 Cikpa eshevu n a̱na̱vu.

Ka̱ta̱ vi ciga aza a̱ nu tsu na vi cigai ka̱ci ka̱ nu.’ ”^◊

20 Ɗa u danai,

“N tono ta̱ ɗe ili i nam pa ya ra̱ka̱.

Yi ɗa̱i kpamu i yotsoi n yaꞋan?”^a

21 Yesu wu ushuki,

“Vi ciga baci vi shana derere,

bana ka̱ta̱ vi denge ili ra̱ka̱ i na vi ni i ɗa!

Ka̱ta̱ vi neke ikebe ya aza a yali,

nannai vi ta̱ ta na a̱ kuciya̱ uciyi gaɗi.

Ka̱ta̱ vu ta̱wa̱ vu tono mu.”

22 Ana vuma va u panai nahannai,

ɗa u na̱mgba̱i ka̱tsuma̱,

adama a na wi ta̱ nu uciyi ka̱u,

ɗa u lazai.

23 Ɗa Yesu u danai mukumitoni n ni,

“N dana ta̱ mayun,

dikyai ɗa aza a na i n uciyi a kuꞋuwa o tsugono tsu Ka̱shile.

24 E,

n dana ta̱ u laꞋa ta̱ n ɗevu karakuma ka uwa a̱ vunu vu vubele an vuza vu uciyi wa uwa o tsugono tsu Ka̱shile.”

25 Ana Kupanazere a a panai nahannai,

ɗa a yaꞋin mereve,

ɗa e ecei,

“Yayi wo tamkpamu u kuciya̱ wishi?”

26 Yesu wi indanai le ɗa u danai,

“Na va ili i ɗa i na uma a kufuɗa kuyaꞋan ba,

amma Ka̱shile ki ta̱ a kufuɗa kuyaꞋan ili ra̱ka̱.”

27 Ɗa Biturusu u danai ni,

“Tsu ka̱sa̱kpa̱ ta̱ ili dem,

ɗa tsu tonoi nu.

Yi ɗa̱i tamkpamu a̱tsu ci a̱ kuciya̱?”

28 Yesu u danai le,

“N dana ta̱ mayun,

a ayin o tsugono tsu savu,

mpa Maku ma Vuma,

mi ta̱ a̱ kuda̱sa̱ngu gaɗi vu kakuba ka tsugbayin ka̱ va̱.

Ayin a nan lo a̱ɗa̱ vu na yi aza o kutoni,

yi ta̱ feu a̱ kuda̱sa̱ngu a akuba o tsugono kupa n e re.

Ka̱ta̱ kpamu i yaꞋanka elentsu kupa n e re a Israila afada.

29 Aza a na a̱ ka̱sa̱kpa̱i ili ra̱ka̱ adama a̱ va̱ i ta̱ a̱ kuciya̱ wuma u babu uteku.

Vuza na baci u ka̱sa̱kpa̱i kpaꞋa,

ko nkoshi n ni n itaku i ni adama a̱ va̱,

ko a̱ ka̱sa̱kpa̱i isheku i le n ina̱ku i le,

ko muku,

ko ali n ashina dem,

i ta̱ e kuneke le ali ugboku amangatawun ki ili i na a̱ ka̱sa̱kpa̱i.

Ka̱ta̱ kpamu a̱ ciya̱ wuma u babu uteku.

30 Amma uma n a̱bunda̱i a na i aza a kelime gogo na,

i ta̱ o kokpo aza a̱ ka̱ca̱pa̱,

aza a̱ a̱bunda̱i a na i kpamu ka̱ca̱pa̱ gogo na,

i ta̱ o kokpo aza e kelime.”