2 Ɗa u ɗekei ni,

ɗa we ecei ni,

‘Yi ɗa̱i tamkpamu ili i na m panai adama a̱ nu?

Neke mu uteku u na vu la̱na̱i ili i na n ka̱sa̱kpa̱i e ekiye a̱ nu,

adama a na ma̱ kuka̱sa̱kpa̱ vu doku vi lyaꞋa kelime n kokpo vuza na u kula̱na̱ka̱ mu ucanuku ba.’

3 “Ɗa ka̱la̱ni ku ucanuku ka ke ecei ka̱ci ka̱ ni,

‘Yi ɗa̱i ma kuɗamgba ma yaꞋan gogo na?

VuzakpaꞋa vu va̱ wi ta̱ a kutakpa mu ulinga.

Mi n utsura u na ma kuyaꞋan vicimba ba.

Mi ta̱ kpamu a kupana wono u na ma kuyaꞋan ufolu.

4 N yeve ta ili i na n kuyaꞋan,

ta̱wa̱ baci n ka̱sa̱kpa̱ na,

ka̱ta̱ uma isa mu a iꞋuwa i le.’

5 “Ɗa u ɗekei aza a na vuzakpaꞋa vi ni wi o kutono atan,

ɗa we ecei vuza iyain,

‘Yain ɗai vuzakpaꞋa vu tsu wi o kutono wu?’

6 “Ɗa u danai,

‘Edele a maniꞋin amangatawunkunla̱i (800).’

“Ɗa ka̱la̱ni ka ka danai,

‘La̱na̱,

kara kepepa ku uzuwakpani,

ka̱ta̱ vu bonoko kutan ka amangatawa̱na̱shi (400).’

7 “Ɗa we ecei vuza ire,

‘YaꞋin ɗai kutan ku nu?’

“Ɗa u danai,

‘Aburuma a̱ ya̱nji ka̱kpa̱n ke te (1,000).’

Ɗa u danai,

‘La̱na̱,

ɗanaka yi aburuma amangatawunkunla̱i (800).’^a

8 “Ɗa vuza kpaꞋa va u cikpai ka̱la̱ni ka gbani-gbani ka̱ ni ka,

adama a na wi ta̱ n ugboji.

Mayun ɗa,

aza a aduniyan a nam pa a laꞋa ta̱ n ugboji u kula̱na̱ aza e le,

ali ɗa a laꞋi aza a na i a̱ ubuta̱ u kutashi.

9 Mi ta̱ a kudana ɗa̱,

la̱nsa̱ka̱i ka̱ci ka̱ ɗa̱ a̱ja̱Ꞌa̱ n uciyi wa aduniyan u na yi n u ɗa.

Adama a na uciyi wa u kotso baci,

a kisa ɗa̱ ta̱ a iꞋuwa i gaɗi i na i kuyikpa̱ ba,

ko wanai.

10 “Vuza na baci u fuɗai kula̱na̱ ili i kenu i na e nekei ni mayin,

i ta a kufuɗa e neke yi ya̱ a̱bunda̱i adama a na wi inda.

Vuza u la̱na̱ baci ili i kenu mayin ba,

nini ɗai e kuneke yi ya̱ a̱bunda̱i ka̱ta̱ u la̱na̱ mayin?

11 Uma a̱ ushuku baci kuneke wu ili ya aduniyan ba,

adama a unambi u ma̱riki u nu,

yayi u kuneke wu uciyi u mayun?

12 A fuɗa baci e neke wu ili i vuza adama a na vi reme ba,

yayi u kuneke wu ili i ka̱ci ka̱ nu?

13 “Babu kagbashi ka na ka kufuɗa kuyaꞋanka aza gbagbaꞋin e re tsugbashi,

sai ko u iwan vuza te,

u ciga kpamu vuza te.

Ko kpamu u ka̱sa̱kpa̱ vuza te,

u tono vuza te.

Va kuyaꞋanka Ka̱shile tsugbashi koɓolo n ikebe ba.”

14 Ana Afarishi a panai ili i na Yesu wi a kudansa,

ɗa a̱ ka̱na̱i ka̱curu,

adama a na i ta̱ n ucigi wi ikebe.

15 Ɗa Yesu u danai le “A̱ɗa̱ ɗa aza a na a tsu lapula ka̱ci ke le a̱ ubuta̱ u uma,

amma Ka̱shile ke yeve ta̱ a̱ɗu a̱ ɗa̱.

Ili i na uma a cigai n a̱bunda̱i,

Ka̱shile tamkpamu ki ta̱ a kuꞋiwan i ɗa.”

16 Yesu u lyaꞋi kelime,

u danai,

“Wila̱ u Musa n iɗani i Eneki i yaꞋan ta̱ ulinga ali a kubana a ayin a Yahaya Vuza vu Kusumbu ka Akucina.

A ayin a Yahaya a nan lo a ɗa a̱ ka̱na̱i kudana Arabali a Singai o tsugono tsu Ka̱shile.

Uma n a̱bunda̱i kpamu a yaꞋan ta̱ kataci adama a na a uwa punu.

17 Gaɗi n iɗika yi baci a kufuɗa ya laza,

ko ka̱gita̱tsu ke te ka̱ Wila̱ u Ka̱shile ka kulaza ba.

18 “Vali vu na baci u ka̱sa̱kpa̱i vuka vi ni de dem,

ɗa u zuwai vi yoku,

wi ta̱ a kuyaꞋan tsugbani.

Vuza na baci kpamu u ɗikai vuka vu na vuza u ka̱sa̱kpa̱i,

wi ta̱ a kuyaꞋan tsugbani n a̱yi.”

19 Ɗa Yesu u danai le,

“Vuza vu uciyi vi yoku ɗa,

vuza na kpamu u tsu uka aminya a ikebe n a̱bunda̱i,

u ci yongo ta̱ kpamu a kupana uyoꞋo ayin dem.

20 Vuza vu unambi vi yoku vi ta̱ lo,

kula ku ni ku ɗa LiꞋaziru.

Ikyamba i ni kpamu i ɗa yi ta̱ n untsu.

A tsu banka yi ta̱ a̱ utsutsu u vuza vu uciyi va,

21 adama a na u ciya̱ u lyaꞋa alyashi a vuza vu uciyi va.

Ali a̱ ubuta̱ u yoku nsheꞋe n tsu bana ta̱ adama a na e peɗe untsu a̱ ni.

22 “Kanna ke te,

ɗa vuza vu unambi va u kuwa̱i,

ɗa alingata a ɗikai ni ɗa a̱ da̱sa̱nki ni wi Ibrahim.

Ɗa kpamu vuza vu uciyi feu ɗa u kuwa̱i.

23 A̱yi ɗe a kpaꞋa ka akina,

a̱ ubuta̱ u na wi o kusoꞋo atakaci,

ɗa u la̱na̱i gaɗi ɗa we enei LiꞋaziru ida̱shi ɗe wi Ibrahim daꞋin.

24 Ɗa u ɗengusa̱i ka̱la̱ka̱tsu ka̱ ni u ɗekei,

‘Dada Ibrahim,

pana asuvayali a̱ va̱.

Suku LiꞋaziru u dyaɓa mini a̱ ka̱jivu ka̱ ni,

adama a na u ta̱wa̱ u ɗakanku mu e kelentsu.

Adama a na mi ta̱ o kusoꞋo atakaci punu a akina a.’

25 “Ɗa Ibrahim u danai,

‘Ciɓa,

maku ma̱ va̱,

ayin a na vi n wuma e neke wu ta̱ ili i singai dem,

a̱yi tamkpamu LiꞋaziru wi n ili ba.

Amma gogo na a̱yi wi ta̱ a kupana uyoꞋo,

avu tamkpamu o kusoꞋo atakaci.

26 Nannai ɗa kpamu koci ba,

kpenle ku gbayin ki ta̱ lo ku na ku pecei tsu.

Aza a na i a kuciga kupasa o kubono na ɗe a kufuɗa ba.

A̱tsu kpamu nannai.’

27 “Ɗa vuza vu uciyi va u danai,

‘Mi ta̱ o kufolono wu,

Ibrahim,

suku LiꞋaziru a kubana a kpaꞋa ku dada.

28 Mi ta̱ ɗe n amgbu a̱ va̱ uma a tawun.

U bana u dana le,

adama a na ele feu a̱ ta̱wa̱ na,

ubuta̱ u na mi o kusoꞋo atakaci ba.’

29 “Ɗa Ibrahim u danai,

‘Aza a̱ nu i ta̱ ɗe n atagarda a iɗani i Musa koɓolo n e Eneki,

adama a na a dana le.

U gaꞋan ta̱ aza a̱ nu a panaka le.’

30 “Ɗa vuza vu uciyi va u danai,

‘Esheku a̱ tsu Ibrahim,

na lo u yawa ba.

Amma ka̱kpisa̱ ka bana baci we le,

i ta̱ a kulaꞋa n kupana,

ka̱ta̱ a̱ shika̱ unushi u le.’

31 “Ɗa Ibrahim u danai,

‘I baci a kupanaka Musa n Eneki ba,

a kupanaka vuza na u ɗenga̱i a̱ ukpisa̱ ba.’ ”