Aro bombiam keta pasin taipetaipe nepao taim meꞌri ve korake nowaunki
3
Keta namayarau veka,
kokaku iu taim vou las de,
nai mowmow keta nerekare.
2 Aro bombiam keta neperepoiy yei veku,
ketao va keta neperepow revo,
awoꞌo yei veku keta nyiavoko,
keta pianorerei,
awirai neman-a keta nyioniy,
ya keta netove kanakanapon iꞌiy aro ovu.
Awirai yei aka moꞌo viake nerivo ta viake oꞌti neupoa God row pasin neman eko ero.
Oreva keta nepow pasin ya God.
3 Pasin vou neperepoiy aro ovu kowaun rei,
ta via kuinyia iu nepogivim yei aro ovu.
Keta nekepi awirai-ya nyirai kakai aro ovu.
Ta yei veku via kuinyia iu reka yei veku nyiorepariu row ao arape keperepore vai.
Keta roma po inyia nepapao piy aro ovu ya pasin neman-a ine netrotropu pow.
4 Keta nepao poiy toro aro kura yei veku pasin neman-a inyia kepao ero,
ya keta nepepore bereren ruru taipetaipe yei veku.
Keta ova nekinao pow yei veku veka yei aro awoꞌo pako keko.
Keta neperepore revo pasin maramara vou meꞌri ve,
ta via kuinyia iu neperepova God.
5 Reka upuo yei,
keta neropopei veka,
pa va kepikeo revo pasin neman iu ine ya God.
Ta yei via eperepore vai,
kepitoro veka pasin neman ya God kupuana kowaun reo.
Korao veka ta aro veka nakemimei rarapa.
6 Ovu yei aro veka ve,
rara inyia kyiorenao ke nenopi popore oꞌro rere aro bom ruru neman-a owaun rere ero,
ta keropopere ya ruru kepererovoru.
Aro bom veka pasin taipetaipe awakai-ya kererarao ya kopei kereyarau veka nai mowmow inyia kerekare rire.
Riꞌi kokokonare revo ke pasin taipo maramara nererao.
7 Aro bom ve kerererow revo skul-a nereko,
ta via kuinyia iu save nereko row awirai awakai ya God vai.
8 Tija Cha Janes eri Cha Jambres a ine kepia trotropu Cha Moses,
korao veka ta aro ve pasin ve inyia kepao ero oreva kepow awirai awakai.
Ruru yei kotaipo nau ven.
Emo korao veka,
toratora ruru yei koraipai ta pa va kepikeo po pasin taipo ta via inyia ebilip pova revo God.
9 Pasin ve yei viake nuinyia nonoi nopako vai.
Beiyo prumo pasin ve keyarau konoi ya kolonglong revo veka tija keyarau pasin taipo ya Cha Janes eri Cha Jambres.
Cha Pol skul-a kaoroa Cha Timoti ke awirai neman ya God-a navo kupuana
10 Ta mema ma Timoti,
kakemi ina ta pasin nena skul-a kanoi aro bombiam row pasin voro God-a karererow ero kamayarau ven.
Pasin neman-a inyia pa va kanikeo ero ku vou kamayarau ven.
Mema kamayarau ven veka,
nena kanabilip nova revo God ta boꞌo ya kanao karoni kupuana ta aro ovu kanerenoiy revo ta ve karoni kupuana ke nai-ya nanapoiy.
11 Pasin ta nai yei aro mataimon Antiok,
Aikoniam awei Listrab kepao pona kamayarau ven.
Nai mowmow ve Biapako kalpim nena ta kakeni kananeman.
12 Awakai,
aro voro keperepow revo neroropova Krais Yesus ta pa kepikeo revo pasin God-a karerow ero,
beiyo keta nepao poiy toro.
13 Aro taipo awei aro roporere,
keta neropopei aro bombiam ya ruru nepeirovoru.
Satan minyiao keta ruru nareirovoru ya naroporerei aro ve ya pasin yei narao nonoi notaipo nau revo.
14 Ta mema veku keta awirai voro kamako ero namavo kupuana ya namabilip mow.
Ku vou korao veka,
kamayarami ven veka memi aro skul-a inyia kemoma.
15 Mema kamayarau veka,
taim kama mentanakake,
save kamako mow buk voro awirai ya God-a kuinyia ero.
Buk ve kuinyia iu save neman-a noroma ya kuinyia iu namabilip mova Krais Yesus,
ya God-a kuinyia iu nako mema varu.
16 Spirit ya God-a veku karao awirai mowmow kerinyia buk ya God-a kokamap.
Awirai ve kereneman revo ke skul-a noromi row awirai awakai.
Awirai ve kuinyia iu noelpim yei aro bombiam ruru yei via oneman,
ta kuinyia iu noelpim memi aro bombiam rara neman-a kememeo ero,
keta nekame varu rara God-a veku karererow ero.
Ya awirai ve kuinyia iu pasin niniu noriritami.
17 Korao veka ta awirai ve inyia korao memi aro bombiam ya God inyia pasin neman-a kemiko ta korao kekemi kemiredi po,
ke boꞌo neman mowmow nemao.