Cha Timoti keta nakei veka soldia neman ya Krais Yesus
2
Ma nena,
marimari ya Krais Yesus-a keta namako ke kuinyia iu kupuana noroma.
2 Awirai mowmow kamarivo kanairirai noiy aro bombiam mowmow ero,
awirai ve keta namoiy eno peꞌe yei aro bombiam mowmow inyia awirai ya God-a kyiavo kupuana ke kuinyia iu skul-a nepoiy aro ovu.
3 Mema keta nakemi veka soldia neman ya Krais Yesus ya nai vou boꞌo ve namapoiy imi.
4 Boꞌo yei soldia inyia kepao ero kamayarau.
Taim soldia boꞌo yei nepao,
via kuinyia iu boꞌo raꞌa nepao.
Yei ta boꞌo vou soldia po inyia kepapao ke opisa yei ova norova roiy revo.
5 Korao veka ta,
bo bio naparara resis ta via pa va narikeo revo lo vou,
via kuinyia iu prais-a raꞌa nako vai.
6 Bio narevapana revo boꞌo narao erora,
keta aokorom kora vou erora nakorei beiyo ovu va cha.
7 Bo awirai mowmow kanairai noma namavo nuinyia ruru mema,
Biapako keta narao ruru mema noruriki ya ao mowmow en namasave rere.
8 Toratora keta ova namakinao mova Yesus Krais,
karai ya kopei God-a karaonaka kavariko varu ya kakei tare,
yaꞌa noꞌo yei aro ya King Devit.
Awirai neman ya God ve inyia kanairirai noiy aro mowmow va kerivo.
9 Awirai neman ya God-a inyia kanairirai ta kepirikena veka nena bia taipo,
tapara ve nai mowmow kepona revo ya keperenaki kalabus.
Kopei awirai ya God-a via kuinyia iu nokalabus vai,
ta baunke nyirirai nonoi.
10 Korao veka ta inyia karoni kupuana ya nai mowmow ve kanapoiy ke aro bombiam God-a kamompe kuinyia iu nekepi toratora iya Krais Yesus revo lait.
11 Awirai ve mare kanake nanairai,
emo awakai kuinyia iu nemibilip mow:
Bo nemiviri miya
keta laip-a nemiko miya.
12 Bo neromi kupuana ya nai mowmow nemiko,
keta nekemi miya veka king.
Kopei bo nonimimeiya ya nemirai veka memi via aro yaꞌa,
yaꞌa minyiao keta noinyiaremi ya nairai memi minyiao via aro yaꞌa.
13 Bo promis-a nemao keta pa nemikeiya ta via pa va emikeo promis ve memi,
yaꞌa keta baunke pa va narikeo awirai yaꞌa veku airai ero.
Via kuinyia iu naropore yaꞌa veku vai.
Bauni.
Cha Timoti keta naroi kupuana ke kuinyia iu boꞌo ya God-a narao
14 Aro mema awirai ve keyarau ven,
umumoka keta inyia namairirai moiy ke neyarau revo.
Keta namairai moiy revo iu ine ya God,
veka via awirai-ya nyiopakeo kanakanapon rore ao mentanaka vai.
Pasin ve neman vou kowaun,
ya korao laip yei beiyo awirai-ya kerivo ero kotaipo.
15 Boꞌo va keta nama revapana mow ke boꞌo awakai-ya namao ke God-a kuinyia iu narererow revo boꞌo mema.
Bo awirai neman ya God-a namairirai revo,
via kuinyia iu reka noyoma vai.
16 Oreva namore awirai maramara via pa va orikeo ruru ya God.
Ku vou korao veka,
aro voro awirai taipetaipe inyia kyirirai ero,
keta nenopi netaipo revo ta via kuinyia iu nekepi piya God kakuke vai.
17 Awirai yei korao veka aoka taipo inyia koki konoi kopako revo ta korao beiyo ketaipo nau.
Bia riepin ve pasin mara keraipao emo,
Cha Himeneus eri Cha Filetus.
18 Rara vou awirai awakai-ya keraipepeo ven,
ero korao veka,
keraiyirai veka,
“Taim kemibilip mova Yesus ya baptais-a kemiko,
ero korao veka kekemi matmat ya kopei kemivereko varu.
Korao veka ta via kuinyia iu nemivereko varu taim raꞌa vova vai.”
Awirai vevo po ta inyia kepao bilip yei aro bombiam ovu kotaipo.
19 Ta ya God-a topa kupuana karira ya siosa yaꞌa inyia karaotao topa ve.
Ya awirai ve karetao topa ve kuirai veka,
“Biapako kasave yei revo aro bombiam yaꞌa.”
Kopei awirai koraꞌa vova kareꞌe kuirai veka,
“Aro mowmow awoꞌo ya Biapako keko,
keta oreva nepore pasin voro via ereniniu iu ine ya God.”
20 Oꞌro pako raꞌa dis ovu kerinyia.
Ovu rere dis ve gol-a nau silva keko ya keparepare.
Ovu rere,
aꞌai-ya keko keparepare ta ovu meꞌri keko ya keparepare.
Dis ve ovu rere boꞌo awakai-ya kererao ta ovu rere boꞌo taipo kererao.
21 Korao veka ta,
bo bio raꞌa pasin taipetaipe naririkere revo laip yaꞌa,
ya kopei naniniu iu ine ya God,
bia emo kave dis ve boꞌo awakai-ya korao.
Bia emo keta nakei naneman ya naholi.
Ya Biapako keta napirikeiya veka kakei po,
ke boꞌo mowmow neman yaꞌa nararao.
22 Korao veka ta,
oreva namore ruru taipetaipe aro bombiam yangpla inyia epao ero.
Keta boꞌo va namao pasin niniu namako,
pasin vou nemibilip mova revo God,
pasin vou nemeremoiy aro ovu,
ta pasin vou riꞌi mariri nemiko.
Mopu keta pasin ve po nopapao.
Mema awei aro voro keperepow revo veka riꞌi yei via pasin taipo nepao iu ine ya God ero,
keta lotu nau prea nopao poa Biapako.
23 Mema viake nakemi romoiy aro voro ruru awakai-ya owaun rei ero.
Awirai taipetaipe ve inyia kobagarapim yei beiyo ta korao kekepi inyia ketovetove ta roma kepapao.
24 Bio boꞌo ya Biapako narao viake pasin taipo narao roiy aro bombiam o awei natovetove.
Pasin neman po keta nararao roiy aro mowmow.
Bo beiyo nebikhet ta via awirai ya nerivo,
keta riꞌi mariri nako ya rara naorenanao ke pasin voro God-a karererow pa nepikeo ero,
skul-a naroiy.
25 Boꞌo va keta narao mariro nako yei beiyo voro via awirai-ya erivo ke ao neman-a neyarau ya nepao.
Bo narao veka,
via anasave,
God-a kuinyia iu nalpim yei nerovoru ya ao veka inyia kepapao nepepere ya save awakai-ya neko pow Awirai awakai ya God o?
26 Satan-a kako yei kekepirovo ven chao yaꞌa,
ke narao pa nepikeo awirai yaꞌa.
Bo awirai awakai ya God-a neko,
save nau ruru neman keta nokai iꞌiy varu ya kuinyia iu nyiaopuki ya chao ya Satan-a nepepeo.