Namba tu pas Cha Pol kareꞌe roa
Cha Timoti
1
Nena Cha Pol,
aposel ya Krais Yesus.
God-a karererona ke nanave aposel yaꞌa,
korao veka ta kamompe nena boꞌo ve nanao ke awirai vou laip promis-a karao ven ero keta naroiy aro bombiam kebilip pova Krais Yesus keta nanairirai.
2 Ma Timoti,
kanerenoma revo veka mema kamave ma biam nena,
korao veka ta pas ve kanenoma.
Beten-a kanao noa God eri Biapako memi Yesus Krais,
ke neokoku ya neraimarimari poma ya riꞌi mariri neraipoma.
Reka via noyomi row awirai neman ya God
3 Nena oꞌti kaonoa God,
bia boꞌo inyia anao noa.
Nena inyia pa kanikeo pasin niniu taim boꞌo ya kanao,
veka apo nena kepao tija.
Rimoꞌo kuro nena,
koniniu revo iu ine ya God.
Ta nena via ova onaparana roma vai,
korao veka ta inyia oꞌti kaonoa God ya umo roro inyia beten-a kanaonoma.
4 Inyia ova kanakinao now inepe moma taim kamaroa ta ve kanake nanapirikema ke ova norona ya riꞌi mariri nanako.
5 Kanayarau veka mema inyia kamabilip mova revo Krais Yesus unake veka tija opu mema Kwa Lois eri moꞌo mema Kwa Yunis minyiao keraibilip pova.
Ta nena kanayarau veka bilip ve minyiao kuinyia ima.
6 Ku vou vevo po,
ta kanake nanao onoramako ya presen ve God-a karoma ero taim eno kaneratama cha,
namao nokupuana iu revo laip mema veka beiyo aiyerao va keputu ta koviriri revo pako.
7 Mema keta namayarau veka Spirit voro God-a karomi ero,
via narao nemiriri vai.
Spirit ve kupuana karomi ta karao kemeremoiy revo aro ovu,
ta kalpim memi ta laip memi veku kaorerariu revo.
8 Korao veka ta via reka noyoma row awirai ya Biapako namairirai,
o via reka noyoma rona veka kanakalabus now awoꞌo yaꞌa.
Kupuana ya God-a keta namako ya nakemi ina ya nai vou awirai neman ya God-a namairirai namapoiy mina.
9 Tija taim God-a baunke ao mowmow va via ararerare,
kamarimari romi ven ta kamompe memi ya kairimi kekemi revo veka aro yaꞌa veku.
Marimari yaꞌa kariritami row boꞌo ya Biapako memi Krais Yesus karao ven ero.
10 Mare Krais Yesus,
bia ya nako memi varu ero,
kakai ven vatiron.
Ya boꞌo voro arao ero korao marimari ya God minyiao kokai ven vatiron.
Krais Yesus kupuana vou rai-ya karirikeoki ven,
ya awirai neman ya God po korao nami aro bombiam mowmow ke laip vou nuinyia toratora nemiyarau revo.
11 God-a kamompe nena ke nanoni boko mowmow veka aposel raꞌa,
ya nakeni veka tikse vou awirai neman ya God,
ya skul-a nanoiy beiyo row awirai yaꞌa ke kuinyia iu nerivo.
12 Boꞌo ve inyia kanao ta nai veka kanako.
Nai ve mare kanako emo via reka noyona vai.
Emo korao veka,
bia ve kanabilip nova ero,
kanasave yaꞌa revo veka kuinyia iu kupuana narona.
Ta yaꞌa veku boꞌo voro karona eno peꞌe nena ero kanoi rona cha,
ke boꞌo ve nanao nonoi nuinyia iu taim nararo varu.
13 Taim awirai-ya namairirai,
keta namairai norao iu veka skul-a kanoma ero,
ya bilip mema namavo kupuana ya nameremoiy revo aro ovu.
Pasin riepin ve,
Krais Yesus-a veku karere kuinyia rimoꞌo kuro memi ya inyia kemamao.
14 God-a awirai neman yaꞌa karere kuinyia eno peꞌe mema keta namaoremariu revo.
Holi Spirit ya God-a kakei imi keta nalpim mema ya ao en naorerariu revo.
15 Mema kamayarau ven veka aro mowmow yei provins Esia kerovoru ya kepepena ven.
Riepin yei aro vevo Cha Figelus eri Cha Hermogenes yei minyiao kerovoru ya kepepena.
16 Beten-a kanao noa Biapako ke kuinyia iu naokoku rova revo Cha Onesiforus awei aro mowmow ekepi oꞌro yaꞌa.
Taim mowmow awirai ya Cha Onesiforus inyia korao ova kerenakeiyo ta riꞌi nena koneman revo ta via reka oyova veka kakeni kalabus vai.
Bauni.
17 Taim kakai mataimon pako Rom,
karevapana revo inyia kaorenanana konoi kuinyia iu kapirikena.
18 Beten-a inyia kanao noa God ke naokoku ya narao roa revo taim Biapako kot-a narivo romi aro mowmow.
Mema veku kamayarau revo ao mowmow Cha Onesiforus kararerare kereneman ke noelpim nena taim kakeni mataimon Efesus.