Cha Timoti keta naroi kupuana ya awirai ya God-a nairirai
4
Krais Yesus,
keta pasin memi aro bombiam-a kekemi tare awei aro bombiam-a keviri ven ero keta naskelim.
Awirai kupuana kanairainama veka,
Krais Yesus-a keta nakai revo vatiron ya aro mowmow keta nepirikeiya revo ine yei veku,
ya keta nakei king toratora.
Korao veka ta ine ya God eri Krais Yesus,
baunke inyia awirai-ya kanairainama ke nokokorenama,
2 ke naromi kupuana awirai yaꞌa namairirai moiy aro bombiam.
Bo kepake awirai ya Krais-a nerivo o nyioniy,
awirai kupuana awakai-ya namairirai moiy,
ke riꞌi nokokore nai ya riꞌi va nerovoru pa nepikeiya God.
Pasin voro kepao ero keta namairai mow,
ke awirai ve kuinyia iu noelpim yei ya via kuinyia iu pasin taipo nepao vova vai.
Awirai-ya keta namairirai,
ke riꞌi nokokonai ya neropi kupuana ya awirai ve nyiavo.
Awirai-ya ta inyia namairirai moiy mariro ya pasin voro God-a karererow ero skul-a namoiy.
3 Ero korao veka,
taim ve keta nokai,
aro bombiam-a keta nyioniy ya oreva nepow awirai awakai.
Teve yei keta nopepen pa norikeo pasin voro yei veku keperepow ero.
Awirai-ya keta nerivo ya pa nepikeo pasin voro keperepow ero.
Ya keta neipiy aro nekape awirai voro keperepow nerivo ero skul-a nepoiy.
4 Oreva keta nepow awirai neman ya teve va keta neteteo revo awirai kanapo.
5 Ta mema,
umo mowmow ruru nau pasin mema keta namaoremariu revo.
Nai-ya nerekare ima keta namapoiy ya awirai neman ya God-a namairirai moiy aro bombiam.
Boꞌo ya Biapako karoma ero keta namao revo.
6 Kanake awirai ve nanairai noma ke kupuana noroma,
ero korao veka,
taim nena kokakuke keta nepyena narani ya noꞌo nena keta nowere norao veka wain voro inyia keupoa God veka ofa.
Taim nena nanoni ya kokai ven kakuke.
7 Bilip nena kanavo kanaororow ya karoni kupuana boꞌo vou awirai neman ya God-a inyia kanao.
Karoni kupuana veka soldia keropi kupuana taim vou roma.
Korao veka ta boꞌo ve kanaoki nau veka bio karesis ya kanoi kareiki revo tapo vou.
8 Mare prais neman ya bio katawo resis kuinyiakena.
Prais neman ve korao veka,
Biapako pa karikeo pasin neman yaꞌa veku ta kaskelim yei aro bombiam ya kairina veka bia niniu iu ine yaꞌa.
Ya taim vou kot pako,
keta prais neman ya bio katawo resis ero keta narona.
Prais ve via kuinyia iu narona nena unake vai.
Bauni!
Keta naroiy aro bombiam mowmow keperepova revo ta kekepi ke nepirikeiya nakai vatiron.
Cha Timoti keta nanoi bereren napirikeiya Cha Pol
9 Mema keta rara namaorenao bereren ya nakame namapirikena.
10 Ero korao veka,
Cha Demas karererore revo ao vou meꞌri ve ya karerena ven kanoi mataimon Tesalonaika.
Cha Kresens kanoi provins Galesia ta yaꞌa Cha Taitus kanoi distrik Dalmesia.
11 Cha Luk unake po kakei ina.
Korao veka ta,
taim nakame,
Cha Mak namarainyiaka nakai roma minyiao.
Yaꞌa bia neman kuinyia iu boꞌo va nalpim nena.
12 Cha Tikikus kanasalim yaꞌa kanoi ipu ven mataimon Efesus.
13 Taim nakame,
saket nena kuinyia oꞌro ya Cha Karpus kuinyia mataimon Troas namako nakame.
Buk nena nau buk voro tao rere aome uka keparepare ero minyiao,
ova namakinao ya namako nakame mona.
14 Cha Aleksander,
bia ve inyia ao va kararerare baras,
ao taipetaipe mowmow karaorona revo.
To kopei paire,
Biapako veku keta ao taipo narao roa varu veka kopei araorona ero.
15 Ova namakinao mova revo bia ve,
kabikhet ta katove wararomi row to voro inyia emirirai ero.
16 Namba wan taim nena kanoni kot,
aro mowmow kepepena ta bia raꞌa via alpim nena awirai-ya airai vai.
Ta nena prea inyia kanao noa God ke sin yei napereoki.
17 Ta Biapako kakei ina ta kupuana karona.
Korao veka ta nena kuinyia iu awirai neman ya God-a nanairirai nonoi roiy aro mowmow via yiave Juda ke nerivo.
Biapako eno karona ta laion pakoa via aiyena arani vai.
18 Biapako keta nako nena varu ya naorerarina revo ya ao taipo voro aro bombiam-a kepake nepao pona ero via kuinyia iu nepao vai.
Keta naorerarina revo ya nalpim nena nonoi nuinyia iu taim nako nena nanoni kingdom yaꞌa kuinyia heven.
Awoꞌo ya Biapako keta nemavoko toratora.
Awakai no.
Cha Pol awirai las-a kairirai
19 Umonai neman nena namow Kwa Prisila eri Cha Akwila ta yei aro ya Cha Onesiforus minyiao.
20 Cha Erastus baunke kakei mataimon Korin ta yaꞌa Cha Trofimus a va koraka ya kaneneiya kakei mataimon Miletus.
21 Mema keta nakame bereren,
bo mivanamuru bo va keta nomariri ya puꞌu pako keta noputuka.
Cha Yubulus,
Cha Pudens,
Cha Linus ta vou Kwa Klodia awei Kristen ovu umonai neman-a kesalim poma.
22 Biapako keta nakei iya spirit mema ya kuinyia iu namarimari ropu aro bombiam mowmow.