Cha Pol kakei ailan Malta
28
Taim kemura kemi neman ya kekom keromi taw ramata nake,
ya ailan ve kemi yarau awoꞌo vou keipinao veka Malta.
2 Ya aro ekepi ailan ve,
pasin neman-a kepao pomi revo.
Aiyerao va kepere koviriri ya kyirai pomi kenomi kekemi mow ke reka nuimrami.
Ku vou korao veka,
aꞌ va kwai ta bo komariri revo.
3 Ya Cha Pol aiyu rove ovu kairiri kakai karere taw aiyerao.
Ta ipa raꞌa kainyia rovo aꞌai em,
im-a koko yaꞌa ta karaiyuka upuo ya kaiyria Cha Pol eno ya kareru.
4 Taim aro bombiam vou boko ve kepirikeo uꞌu va kaiyria Cha Pol ta keiya reru eno,
ya yei veku kyirirai veka,
“Bia ere beiyo va kayei keviri,
ya taim kaorua,
via nao va aton arai vai.
Tapara mare god vou pasin taipo nabekim koinyia via narao nakei tare vai.”
5 Ta Cha Pol eno kairereki naka uꞌu ya raro karei taw aiyerao ta via ao taipo raꞌa orao roa vai.
6 Aro bombiam-a keropi kepitoro veka keta naputuputu o raro narei ya narai bereren.
Keropi kyiorepariya konoi ya taim-a koririva naiy,
ta via ao taipo raꞌa okamap roa vai.
Korao veka ta ruru kerovoru ya yei veku kyirirai veka,
“Bia ere,
yaꞌa god raꞌa vaire.”
7 Meꞌri koraꞌa kuinyiaka kakuke iu bo ve kekepi em,
meꞌri ero ya bia beiy raꞌa vou ailan em,
awoꞌo ya Cha Publius.
Bia emo,
kako memi kenomi kekemi oꞌro yaꞌa konoi kuinyia iu umo 3-pla ta pasin neman-a karao romi.
8 Kopei aka ya Cha Publius reka keiya im ta aꞌa kaverevere.
Ta Cha Pol kanoi aꞌari ke napirikeiya.
Ya beten-a karao roa ya eno kareretaka ya karao kaneman varu.
9 Taim Cha Pol ao en karao,
aro bombiam mowmow a va koraie kekepi ailan ve kekapepiya ta karaie keneman varu.
10 Pasin neman-a kepao pomi revo rore ao neman maramara.
Ya kopei taim kemake nememei ya nenomi,
ao mowmow voro kere waun remi kepomi.
Cha Pol kanoi Rom
11 Kekemi ailan Malta konoi kuinyia iu ura 3-pla,
ya kopei kemaro wua raꞌa kuinyia ailan ve kemiko,
ya taim ve puꞌu pako koputuka.
Wua em yei aro Aleksandria.
Cha vou wua em,
piksa yei meꞌe biam riepin vou god Sus moꞌo koave minyiao ketutari naiy.
Awoꞌo yei Cha Kaster eri Cha Polaks.
Ya kopei kemi turukeki ya parara kenomi.
12 Ya kenomi kemi ringo mataimon Sirakyus ya kekemi boko ve konoi kuinyia iu umo 3-pla.
13 Ya kopei mataimon ve kememeo ya parara kenomi vova mataimon Regium.
Kopei uri roronaike,
puꞌu va koputuka para saut korao veka ta mataimon Regium-a kememeo ya parara kenomi vova ke.
Kopei umo namba 3,
keremiki mataimon Puteoli.
14 Ya kopei mataimon ve,
aro ovu inyia kebilip pova Yesus kemivakakei.
Ya keipimi kenomi kekemi miy konoi kuinyia iu umo 7-pla,
ya kopei kememei kenomi mataimon pako Rom.
15 Taim aro bombiam-a kebilip kekepi mataimon pako Rom,
awirai-ya kerivo veka inyia kemute kekame,
ya kyiute papimi ke nevakakemi row rara.
Kyiute kekape ya kevakakemi bo maket ya Cha Apius,
bo ve keipinao minyiao veka Oꞌro Pasindia Tripla.
Taim Cha Pol kapirikei,
oꞌti kaoroa God ya kupuana ya God-a kako.
16 Ya kenomi Rom ya gavman-a kairai keta Cha Pol nakei tirin oꞌro raꞌa,
ya soldia raꞌa nakei naorerariya.
Cha Pol awirai neman ya God-a kairirai Rom
17 Cha Pol kakei Rom umo 3-pla konoiki naka ven,
ya kairiy hetman yei Juda kekape.
Taim kekape kyiopokeo ven,
ya kairai roiy veka,
“Aro raꞌai nena,
via ao va raꞌa anao otaipo iꞌiy aro memi o kastam yei aro apo memi vai.
Ta keperenaki kana kalabus mataimon pako Jerusalem ya keperenaki iꞌiy eno peꞌe yei Rom.
18 Ya kopei aro Rom kot nena kerivo ya kepirikeo veka ao taipo va via raꞌa anao ke nepyena naran vai,
korao veka ta kepake nerokoperinaki.
19 “Ta yei Juda kyioniy via gavman yei Rom-a nerokoperinaki vai.
Korao veka ta rara kowaunki rena ya kanairai Cha Sisar kot nena narivo.
Ta ve via anake kot-a naneinao aro nena vai.
20 Ku vou kainipu kokape ke nana pirikepu ya nanairai nopu,
ero korao veka,
kana bilip ta kakenikeo ao voro memi Israel-a kekemikeo ero.
Ao en korao ta sen-a kyiaponana evo.”
21 Ya kopei kyirai poa veka,
“Bia raꞌa yei Juda via pas-a ako akai ke awirai-ya nuirai romi roma vai.
Raꞌa minyiao,
Juda raꞌa via akai airai romi ta awirai taipetaipe airai roma vai.
22 Ta memi veku kemake awirai uinyia ruru mema namairai momi.
Ero korao veka,
kemi pirikeo veka aro bombiam prumo vou boko mowmow inyia awirai taipo kyirirai naiy beiyo tare ekape ekepi romomi Juda.”
23 Ya kopei umo raꞌa kemompe,
ya aro prumo kekape oꞌro ve Cha Pol akei em.
Roronaike konoi kowaririki,
awirai vou kingdom ya God-a kairirai roiy.
Awirai ovu kerinyia lo ya Cha Moses awei buk yei profet kairai roiy minyiao ke norao nebilip pova Yesus.
24 Aro ovu kebilip pow awirai ve Cha Pol airai em,
ta ovu yei via ebilip.
25 Yauke yei veku ketovetove ya inyia kyiutute kenopi taim Cha Pol awirai ve kairaiki roiy,
“Holi Spirit-a awirai neman-a kairai roiy aro apo memi row roꞌo ya profet Aisaia.
26 ‘Nanom miy aro bombiam voro ya namairai moiy veka,
“Awirai-ya keta nopurivorivo ta via kuinyia iu ku vou nopu yarau vai.
Kuinyia iu nopu pirikeo,
ta via kuinyia iu nopu yarau revo ao en arape.”
27 Aro bombiam ve cha va nau riꞌi yei kokupuana revo,
kuinyia iu awirai-ya nerivo,a
ta teve ketupapa ke via kuinyia iu ku vou awirai-ya neko vai,
ine yei kevovo ven.
Bo ao en via nepao,
ao va raꞌa keta nepirikeo
ya awirai-ya nerivo ya ku vou awirai ve neyarau.
Ya riꞌi va nerovoru nekape pina varu ya nanaie neneman varu.’ ”
28-29 Kopei Cha Pol kairai roiy veka,
“Korao veka ta kanake nopu yarau revo.
Awirai ya God-a kuirai veka,
keta nako memi varu.
Ta awirai ve God-a karoiy ven aro via yiave Juda keta nerivo.”b
30 Cha Pol kakei po oꞌro moikera konoi kuinyia iu ainini riepin.c
Ketao va inyia kaoroa aka vou oꞌro ke kuinyia iu narin nakei.
Oꞌto kocha roiy aro bombiam taim napirikei nekape oꞌro yaꞌa.
31 Awirai ya kingdom ya God-a inyia kairirai ya skul-a karoiy aro bombiam row awirai ya Biapako Yesus Krais.
Via ariri row ke awirai-ya nairirai vai,
ta bio raꞌa via arao rariya vai.