Cha Pol kararo wua ke nanoi Rom
27
Taim awirai-ya kyirai minyiao veka keta wua nemikoa ya nenomi kantri Itali,
ta Cha Pol awei kalabus ovu keko yei kenopi piya kepten raꞌa yei 100 soldia,
ke naorerariy.
Awoꞌo yaꞌa kepten ve keipinaka Cha Julius,
yaꞌa raꞌa yei soldia keipinai veka,
“Soldia ya Cha Sisar.”
The Shipwreck (Aposel 27:1-28:10)
2 Kemaro moiy wua raꞌa yei mataimon Adramitium.
Wua em korake noparara nonoi rorore pasis voro kerinyia boko ovu vou provins Esia.
Yauke kai-ya kemi raritou ya parara kenomi.
Ta Cha Aristarkus yaꞌa minyiao kakai romi.
Bia emo yaꞌa raꞌa yei Tesalonaika,
kakei provins Masedonia.
3 Kopei uri,
keremiki mataimon Saidon,
ta kepten Julius karao roa revo Cha Pol.
Kairai roa Cha Pol nanoi napirikei aro kura yaꞌa ke ao arape kere waunreiya ero,
ipin-a neupoa.
4 Ya kopei mataimon Saidon kememeo ya parara kenomi ta puꞌu pako va koko memi.
Puꞌu va koputuruko ta kemiparara kenomi mow oreva vou ailan Saiprus.
5 Ya kemiparara kenomi mow nao rora kakuke iu provins Silisia ta Pamfilia,
ya kopei keremiki mataimon Maira,
kuinyia provins Lisia.
6 Bo ve,
kepten yei soldia wua raꞌa yei Aleksandria kapirikeo korake nonoi Itali,
yauke kepten-a kairai romi kenomi kemaro moiy wua em.
7 Ya kopei kemi parara kenomi marimariro,
ya umo kere mowmowki nami.
Ku vou korao veka,
puꞌu pako koputuruko tami,
ta boskuru kerevapana revo ta kemavemomow kenomi ika vou mataimon Nidus.
Ta vou puꞌu va baunke koputu rarimi,
ya kemi rovoruki parara kenomi iu ailan Krit,
kakuke iu Salmone.
8 Boskuru kereva pana revo ta kemiparara kenomi mow nao ikika vou Krit,
ya kopei kenomi keremiki iu boko raꞌa keipinao Pasis Neman,
kuinyia kakuke iu mataimon Lasea.
9 Umo mowmow inyia konoi nami,
taim baunke kemiparara wua,
ya de pako yei Juda aokorom-a inyia kekepiyaob ero konoiki ven.
Ta vou nao va koraoko minyiao.
Ya kopei Cha Pol kairai roiy veka,
10 “Aro raꞌai,
kana pirikeo veka,
wua mare keta nemi parara nenomi ero,
taipo vou keta nemi pirikeo,
ya wua nau ao mowmow erinyia rovore ero keta nereworuru roki.
Ta memi beiyo minyiao keta nemi viri.”
11 Ta kepten yei soldia awirai ya Cha Pol koinyia via narivo.
Ta pa karikeo po awirai ya aka vou wua eri kepten vou wua.
12 Pasis em via oneman ke wua va noaporuki vai,
taim puꞌu pako noputu,
keta nuinyiakeo ura ovu.
Korao veka ta mowmow yei beiyo awirai-ya kyirai minyiao veka keta baunke neparara nenopi revo Finiks.
Ku vou korao veka,
kepirikeo veka pasis em koneman kuinyia iu nyiaporukipeo puꞌu pako evo.
Finiks kuinyia para saut vou ailan Krit,
ta kuinyia koyarauki notwes ta sautwes.
Puꞌu va koputu pako ta nao va koraoko
13 Ya kopei puꞌu vou para saut-a koputuka marimariro ta kepitoro veka kuinyia iu parara nenopi revo nerepiki iu boko ve kyirai pow em.
Ya anka kerarikavu kokoi nake ya parara kenopi pow nao ika vou ailan Krit.
14 Kovevenki,
puꞌu pako raꞌa koputuka para vou ailan Krit,
puꞌu em keipinao veka,
“Puꞌu vou para notis.”
15 Puꞌu em koputuruko pako ta boskuru via kuinyia iu nekapoki parara nenopi varu vai.
Korao veka ta kepin puꞌu va wua koavo konoi.
16 Ya parara kenomi iu para saut vou ailan mentanaka raꞌa keipinao veka Kauda.
Kopei taim ailan-a kopopo rariu puꞌu,
reva kemipana revo ke dingi va nemi raipaka kakuke iu wua.
17 Ya kopei boskuru dingi keringo taw wua ya kyiaponao kupuana.
Ya tiꞌi ipipo keverevere koraro wua paraparako ya kyiaponao kupuana,
ke kupuana norow wua.
Keriri revo,
awenari neparara nenopi nyiaoveki ramata uinyia rora kakuke iu Afrika.
Ya sel-a keraino ya kepin puꞌu va wua koavo konoi.
18 Puꞌu va kopako ta nao va koraokore koyemi revo,
kopei uri,
boskuru ao ovu kepuna keparai kere raro nao.
19 Kopei umo namba 3,
boskuru ao vou wua kepuna eno yei ya keverevereki,
ao veka sel,
aꞌai vou sel nau ao ovu vova.
20 Umo inyia kerenori kere mowmowki nami,
ta umo va awere avaroi-ya via emi pirikere ere viriri revo vai,
ta vou puꞌu va baunke inyia kuinyia korao pon veka.
Ya kemi pirikeo veka via kuinyia iu nekemi nemi neman vova vai.
21 Umo mowmow beiyo via aokorom-a epa vai,
ta Cha Pol kavariko karoi romoiy ya kairai veka,
“Mopu beiyo,
bo awirai nena nopurivo ya nekemi ailan Krit,
via kuinyia iu taim taipo em nemi vakakeo vai.
Ya ao mowmow via kuinyia iu nereworuru roki vai.
22 Ta mare kanairai nopu,
kuinyia iu riꞌi mariri nopuko,
ero korao veka,
raꞌa memi via kuinyia iu narei roki vai.
Wua po keta norei roki.
23 Nena bia ya God,
nena inyia lotu kanao noa.
Roro,
ensel ya God-a kararo karoi ina kakuke.
24 Ta kairai veka,
‘Ma Pol,
via namariri.
Keta nanomi namairai moa Cha Sisar kot mema narivo.
God-a beten mema karivo ven,
ta kamarimari roiy ta via kuinyia iu narin aro ekepi wua nerepi roki vai.’
25 Korao veka ta mopu beiyo,
noropi kupuana.
Nena kanabilip nova God keta ao voro airai ero nararerare.
26 Ta memi keta nemin puꞌu va noko vou wua ya nonoi nuaoveki ailan raꞌa.”
Nao va koye wua kotaritari
27 Ya roro namba 14,
baunke kemi vekeveke kenomi nao Mediterenian.
Kopei roro nyeko nopanaki ven,
boskuru kepitoro veka wua kokai kakuke iu nao ika.
28 Ya meta keko keparaiyo nao,
ya keyarau veka nao va kovororo kuinyia iu po 40 mita.
Wua konoiki mentan mentan ya tare meta keparaiyo vova,
ya keyarau veka 30 mita.
29 Ya keriri,
awenari wua noparara nonoi nokivirike topa erinyia ero ke notaritari naiy.
Ta anka 4-pla kuinyia wua pa ero keparaiyo nao,
ya beten-a kepao ke bo va nuri bereren.
30 Boskuru rara kyiorenanao ke wua va nepepeo.
Ya dingi kereru koraro nao,
keropopei veka kepake anka va neparaiyope wua cha.
31 Kopei Cha Pol kairai roa kepten awei soldia yaꞌa veka,
“Bo aro ve via nekepi rovo wua,
keta nopu viri.”
32 Ya soldia kenopi baklain ve ketororo nau dingi ero kyiorokipepeo,
ya raro korei nao ya vekeveke konoi.
33 Kopei roronaike,
umo va via arareriki,
Cha Pol a va kairai roiy beiyo mowmow em ke aokorom-a nepa,
kairai veka,
“Umo 14-pla konoiki ven aokorom-a kowaunrepu ta via opa.
Ta riꞌi mopu koreru po.
34 Mare awirai kupuana kanairai nopu,
aokorom ovu nopa,
ke nopu kupuana.
Ta via kuinyia iu nopu viri vai,
keta nokepi nopu neman.”
35 Awirai ve kairai ven ya beret-a kako ya oti kaoroa God iꞌiy ine yei aro mowmow.
Beret-a kawetari ya inyia kara.
36 Korao veka ta aro mowmow ve kupuana keko ya yei veku aokorom yei kepuna kepa.
37 Namba memi aro ekemi wua emo,
kuinyia iu veka 276.
38 Aokorom-a kepa kuinyia iꞌiy ven,
ya wit-a keparaiyo koraro nao ke via wua nonai vai.
Wua kotaipo
39 Kopei taim umo va kakoi,
boskuru boko ve keroivinao,
emo boko bekaipe.
Ya pasis raꞌa kepirikeo ramata koneman ta awirai-ya kyirai minyiao kepake wua nyiavo nenopi neringo taw ramata nake.
40 Ya baklain rere anka kyiorokipe ya kepin kere raro nao kuro.
Kopei baklain ve kyiaponare biote ipipo riepin ta wua keroro ero,
keraritow pere.
Ya sel-a keringo ke puꞌu va noavovo,
ya keparara kenopi ramata nake.
41 Ta wua koringo toro ramata nake,
ta via kuinyia iu noparara vova vai.
Ya nao ipipo kere pururei taw wua pa ya kotaritari.
42 Ya kopei soldia kepake kalabus-a nepyei neviri awenari nyiurura nekope nake ya nepraprara pei.
43 Ta kepten yei soldia koinyia rei,
via nepyeiya Cha Pol narai vai.
Ta awirai kupuana kairai roiy aro voro kyiura peꞌe keniniu ero,
nyiurura nekope nake vo.
44 Ovu palang korakora nau wua korakora kepuna kyiavere ya kevekeveke kenopi kekope nake.
Ao en kepao veka kepten-a kairai,
ta via raꞌa yei arei roki vai.