Cha Pol kanoi mataimon pako Jerusalem
21
Ya kopei aro hetman-a kememei kemaro wua ya wua koturukeki,
ya parara kenomi revo ailan Kos.
Kopei uri,
kemi parara kenomi ailan Rodes ya kopei kenomi keremiki revo mataimon Patara.
2 Boko ve,
kemi pirikeo wua raꞌa korake noparara nonoi distrik Fonisia.
Ya kemaro moiy wua en ya parara kenomi.
3 Kopei parara kenomi ya kemi pirikeo ailan Saiprus,
ta kemavemomow kenomi mow paraꞌa saut vou.
Ya kenomi keremiki provins Siria ya kopei kenomi kemaporuki mataimon Tair.
Ero korao veka,
wua korake kago va norerere mataimon ve.
4 Ya kenomi kemi pirikei Kristen,
ta kekemi mataimon ve konoi kuinyia iu revo umo 7-pla.
Holi Spirit-a a va kairai roiy Kristen,
ya kyirai poa Cha Pol veka via nanoi Jerusalem vai.
5 Ya taim wua korake norereo mataimon Tair,
bo ve kememeo ya kemute kenomi.
Ya aro Kristen awere om ta mevova yei,
keko memi kenomi mataimon upuo.
Ya kopei keromi mow nao ika ya boratapo kentumariyo minyiao ya beten-a kemao.
6 Yauke eno kemarai varuvaru,
ya kemaro wua ya kekope varu oꞌro yei.
Profet Agabus awirai-ya kairai roa Cha Pol vere Sisaria
7 Ya kopei mataimon Tair kememeo ya kenomi nemaporuki mataimon Tolemes.
Ya eno kemarai miy Kristen,
ya kekemi miy umo moike.
8 Kopei uri kememeo mataimon Tolemes,
ya kopei kenomi kemaporuki mataimon Sisaria.
Ya kenomi kekemi oꞌro ya Cha Pilip,
bia emo awirai neman ya God-a ta kairirai roiy aro bombiam.
Bia emo,
yaꞌa raꞌa yei aro 7-plaa inyia kelpim yei aposel.
9 Meꞌe bom 4-pla kerekeri iya,
via am-a ererunai vai,
awirai ya God-a inyia kere irirai veka profet.
10 Kekemi Sisaria umo kere mowmowki nami,
ta profet raꞌa awoꞌo yaꞌa Cha Agabus karereo distrik Judia ya kaute kararo ve Sisaria.
11 Kakai imi ya let ya Cha Pol kako karonao kom-a nau eno yaꞌa veku.
Ya kopei kairai veka,
“Holi Spirit-a kairai veka,
‘Pasin ve,
aro Juda ekepi Jerusalem keta aka vou let-a nyiaponaka ya neperiakipe poiy eno yei aro via yiave Juda.’ ”
12 Taim awirai ve kemirivo,
ya awemi aro bombiam vou mataimon pako evo inyia kemirai kemi momonaka Cha Pol ke via nanoi Jerusalem.
13 Kopei Cha Pol kairai veka,
“To korao vekaipe ta inyia kopuro ya riꞌi nena kotaipo revo?
Nena via anariri noiy netororonana ya narani mataimon pako Jerusalem row awoꞌo ya Yesus vai.
Ku vou korao veka,
nena awoꞌo ya Biapako Yesus-a kanavoko nake.”
14 Taim inyia kemi pirikeo veka Cha Pol kakupuana revo karake nanoi,
ya via awirai-ya emirainaka vova vai.
Ya kopei kemirai veka,
“Arape Biapako karake narao,
kuinyia iu nokamap.”
15 Umo ovu kerenori ven ya kopei ao va kemavekana ya kemute kekome mataimon pako Jerusalem.
16 Ya ovu yei disaipel ekepi Sisaria kenopi pomi.
Keko memi kenomi oꞌro ya Cha Nason,
ya kekemi miya.
Bia emo boko ya Saiprus,
kave disaipel ya Yesus atoke.
Cha Pol kanoi kareiki mataimon pako Jerusalem
17 Taim keremiki mataimon pako Jerusalem,
Kristen-a ova koroꞌoi romi revo ya keko memi.
18 Kopei uri,
Cha Pol kanoi romi ke napirikeiya Cha Jems.
Taim ve hetman vou sios minyiao kekape kekepi ve.
19 Ya Cha Pol umonai neman-a karao roiy.
Ya kopei awirai-ya kairai kaverorow revo rore ao koka God-a kararerare eno peꞌe yaꞌa,
taim awirai ya God-a inyia kairirai romoiy aro bombiam via yiave Juda ero.
Hetman-a kyirai poa Cha Pol nanoi tempel
20 Taim hetman awirai em kerivo,
awoꞌo ya God-a kyiavoko nake.
Ya kyirai poa veka,
“Raꞌai,
nama pirike,
aro bombiam tausen yei Juda evo kebilip pova ven Yesus,
ta keropi kupuana revo pa nepikeo lo ya Cha Moses.
21 Ta aro ovu kyirai poiy kyirirai poma veka,
‘Cha Pol kairai roiy Juda ekepi romoiy aro via yiave Juda ero,
via pa nepikeo lo ya Cha Moses vai.
Inyia kairai veka,
“Via tao va nepeiyoro meꞌe mopu vai.
Ya pasin tora via pa nopikeo vova vai.” ’
22 Kemi yarau ven veka,
keta awirai-ya nerivo veka kakame ven.
To memi keta arape nemao?
23 Bo norao veka,
ao en kemirai keta namao.
Beiyo 4-pla memi kekepi,
promis raꞌa kepao poa God.
24 Moma keta beiyo 4-pla ve namako yei,
ya awei pa va nopikeo pasin vou nopu niniu iu ine ya God.
Ao raꞌa minyiao,
ao vou ofa namako ke chapeꞌe yei nepu.
Ao en namao ke aro mowmow kuinyia iu neyarau veka awirai kanapon akai-ya kyirai poma.
Ya kuinyia iu nepirikeo veka mema minyiao inyia pa va kamikeo lo.
25 Kopei yei aro voro via yiave Juda ero,
kebilip pova Yesus.
Pas-a kemeꞌe konoi roiy ven,
ya kemirai moiy awirai tija kemirai minyiao ero.
Kemirai moiy via kuinyia iu aokorom voro beiyo ofa kepao poiy god roporere via nepa,
ta aomeꞌe noꞌo va erinyia ero ta aomeꞌe opo epei tororo ero.
Ya pasin pamuk minyiao via nepao.”
26 Kopei uri,
Cha Pol beiyo 4-pla ve promis-a kepao poa God kako yei.
Ya pasin vou neniniu iu ine ya God awei karao.
Ya kopei Cha Pol kanoi tempel aꞌari ke nairai roiy aro pris veka,
umo bekaipe keta neniniu ya ofa yei moike moike nepuna nekape.
Kyiaivia Cha Pol
27 Kopei taim umo 7-pla korake nonoiki,
Juda ekape provins Esia kepirikeiya Cha Pol karoi reiy aꞌari vou tempel.
Ya kepao aro bombiam mowmow riꞌi va kokokorenai rova Cha Pol ya kenopi kyiaivia.
28 Ya kyepi pako veka,
“Mopu aro Israel,
nopu helpim memi.
Bia emo inyia skul-a karoiy aro bombiam mowmow vou boko mowmow keta neteremi nau lo ya Cha Moses ta tempel ve minyiao.
Ao raꞌa minyiao,
kakoi yei Grik-a kekape reiy aꞌari vou tempelb ya kepao bo ya God-a via oniniu.”
29 Ku vou awirai ve korao veka,
tija kepirikeiya Cha Trofimusc yaꞌa mataimon Efesus kakei iya Cha Pol mataimon ve,
ta kepitoro veka Cha Pol kako yaꞌa kakai kakei reiy aꞌari vou tempel.
30 Kopei aro bombiam awirai ve kerivo ya aro mowmow vou Jerusalem keririko toro,
ya aro bombiam-a kepraprara kekape kyiopokeo.
Kyiaivia Cha Pol ya keraipaka kanoi reiy upuo vou tempel,
ya bererenki reiy kamo vou tempel-ad ketipetipe.
Soldia yei Rom-a keko ya Cha Pol
31 Taim inyia kepyeiya Cha Pol ke narai,
kopei opisa anoi roiy soldia cha vere Rom ere,
awirai-ya karivo veka,
“Aro mowmow yei mataimon pako Jerusalem ketovetove ta roma inyia kepao.”
32 Ya kopei kavariko bereren opisa awei soldia ovu kako yei ya keparara keparo bo ve aro bombiam-a roma epao ero.
Ya kopei Juda kepirikeiya opisa awei soldia,
ya kerokoperia Cha Pol ya via epyeiya vova vai.
33 Ya opisa anoi roiy soldia cha kakai kakuke ya kaivia kaororova Cha Pol,
ya kairai roiy soldia sen riepin nyiaponaka.
Ya katere roiy Juda veka,
“Bia emo yaꞌa bia bekaipe?
To arape arao?”
34 Aro bombiam koka kekepi bo ve,
ovu yei kyepi tintin ta awirai maramara kyirirai.
Riri va keko ta opisa anoi roiy soldia cha ero,
via ayarau revo ku vou etovetove ero.
Ya kopei awirai kupuana kairai roiy soldia keko yaꞌa Cha Pol kararo oꞌro yei.
35 Taim Cha Pol kararo kom-a kareretawo aikeke vou oꞌro,
ya soldia kepirikeo veka,
aro bombiam-a kekupuana revo Cha Pol nepyeiya narai.
Korao veka ta soldia veku kyiaivia kenopi.
36 Aro bombiam koka baunke inyia pa va kepikei kekape inyia kyepi pako veka,
“Nopyeiya narai.”
Cha Pol a va kairai roiy aro bombiam koka
37 Taim soldia kepake neko yaꞌa Cha Pol nanoi aꞌari iu bo yei ekepi ero,
ya Cha Pol poko Grik-a kairai roa opisa yei soldia veka,
“Era kuinyia iu awirai raꞌa nanairai noma vai?”
Kopei opisa yei soldia katere roa veka,
“Era mema poko Grik-a kamairai vai?
38 Kanitoro veka mema bia Isip tija roma karao wararoiy gavman,
ta kako yei 4,000 beiyo kyiopa bainat ya kako yei kenopi bo beiyo ewaun.”
39 Kopei Cha Pol kairai veka,
“Nena Juda,
mataimon nena Tarsus kuinyia distrik Silisia.
Mataimon nena awoꞌo kopako,
plis kanake a va nanairai noiy aro bombiam vo.”
40 Ya kopei opisa karin Cha Pol awirai yaꞌa kairai.
Ya Cha Pol karoitaw aikeke ve ya eno karao roiy aro bombiam ke roꞌo va nyetoko.
Ya roꞌo va kyetoko ya a va kairai roiy poko Hibru.