Buk Aposel
Bo yei aro Aposel ya Yesus Krais
Yesus-a promis-a karao ke Holi Spirit-a nasalim yaꞌa nararo
1
Ma Tiofilus,
buk voro tija kaneꞌea ero,
kaneꞌe nore ao prumo Yesus-a kararerare ta skul-a karoiy aro bombiam.
Yesus-a ao en kararerare ven tija taim boꞌo ya baunke inyia kararerare.
2 Ao en kerekare kuinyia iu revo taim ve God-a kako yaꞌa kakoi heven.
Ya kopei kakai iꞌiy aposel yaꞌa veku kamompe ven tija ero.
Taim ve,
kupuana ya Holi Spirit-a kalpim yaꞌa ta awirai-ya kairai roiy aposelb rore boꞌo maramara neparepare,
ya kopei God-a kako yaꞌa kakoi heven.
3 Taim kepyeiya karai ya kopei kavariko varu,
kakai iꞌiy varu aposel.
Ao prumo va kararerare ke nariritai revo veka,
awakai kakei tare.
Inyia kepirikeiya konoi kuinyia iu umo 40-pla.
Ya awirai vou kingdom ya God minyiao inyia kairirai roiy.
4 Taim Yesus-a awei aposel yaꞌa kyiopokeo minyiao ya kairai roiy veka,
“Via Jerusalem-a nopepeo vai.
Mopu keta nokepikeo ao neman raꞌa,
Cha Tata nena promis-a karao ke naropu vo,
veka tija inyia kanairirai nopu kopurivo ero.
Jesus Ascends to Heaven (Aposel 1:4-11)
5 Cha Jon kabaptaisim yei beiyo row pii kanapo,
ta umo via ere mowmow ke God-a nabaptaisim mopu row Holi Spirit.”
6 Kopei tare aposel-a kyiopokeo piya Yesus ya inyia ketere poa veka,
“Biapako,
era mare keta namao kantri Israel-a nokupuana varu ya king-a raꞌa nakei naorerariy o bauni?”
7 Kopei Yesus-a kairai roiy veka,
“Ao en via ao mopu vai,
ta kopake taim o umo va nopuyarau.
Cha Tata unake po taim en kayarau,
yaꞌa veku ao en kaorerarire.
8 Kopei Holi Spirit-a nararo ipu,
keta kupuana ya Holi Spirit-a nopuko,
ya awirai-ya nopuirirai nonoi mataimon pako Jerusalem ta boko mowmow vou distrik Judia ta Samaria,
ta boko mowmow vou meꞌri ve row ao prumo kopupirikere ero.”
Yesus-a kakoi heven
(Mak 16.19-20; Luk 24.50-53)
9 Taim Yesus-a awirai ve kairaiki nau,
ya baunke inyia kekepi kepirikeiya,
ya God-a kako yaꞌa kakoi nake.
Ya kopei uteno raꞌa kokai kopoporariya,
ta via kuinyia iu nepirikeiya vova vai.
10 Taim aposel-a keropi ketoropukeiya inyia kakoi uteno nake,
kopei bererenki bia riepin-a keraikape kerairopi kakuke iꞌiy nau noreka wuto.
11 Keraiyirai poiy veka,
“Mopu aro Galili,
to korao bekaipe ta inyia koropi koporoko uteno nake?
Bia emo Yesus,
mare God-a kako yaꞌa repu kakoi heven.
Kopei ta nararo varu veka mare kopu pirikeiya kakoi heven ero.”
Cha Matias kemompe yaꞌa ke bo va nako vova Cha Judas
12 Aposel-a kepepeo tou ve keipinao Oliv,
ya keparo varu mataimon pako Jerusalem.
Tou Oliv kuinyia kakuke iu Jerusalem,
via orarapa vai.
Rarapa vou kuinyia iu veka kilomita moikera kanapon.c
13 Taim kerepio Jerusalem,
ya kenopi oꞌro ta kekope rum raꞌa inyia ekepi ero kuinyia nake.d
Yei aro ve kekope kekepi rum em,
awoꞌo yei:
Cha Pita,
Cha Jon,
Cha Jems ta Cha Andru,
Cha Pilip ta Cha Tomas,
Cha Bartolomyu,
ta Cha Matyu,
ta Cha Jems raꞌa (ma biam ya Cha Alfius) ta Cha Saimon (bia raꞌa yei aro Selot).e
Ta Cha Judas,
ma biam ya Cha Jems raꞌa.
14 Aro ve inyia kekepi po rimoꞌo moikera taim beten-a inyia kepao.
Ta aro bom ovu minyiao kerekeri iꞌiy,
moꞌo ya Yesus,
Kwa Maria awei aro raꞌai ya Yesus kekepi ta beten-a kepao piy minyiao.
15-17 Kopei taim ve Yesus-a kakoi ven nake ke Holi Spirit-a nasalim yaꞌa nararo,
ya Cha Pita kavariko karoi romoiy aro bombiam ebilip pova Yesus,
namba yei kuinyia iu veka 120.
Ya kairai roiy veka,
“Aro raꞌai,
tija Holi Spirit-a karao Cha Devit awirai raꞌa kuinyia buk ya God-a kairirai,
ta mare keta akai-ya noraonao veka Cha Devit kairai.
Ta awirai ve konoi iya Cha Judas.
Cha Judas yaꞌa raꞌa memi Yesus veku kamompe,
ke boꞌo yaꞌa narao,
ta rara va kariritai beiyo ya kyiaivia Yesus.”
18 (Yei aro ine epiatrotropu Yesus ketao va keupoa Cha Judas,
veka pe vou pasin taipo ve karao.
Ya kanoi meꞌri koraꞌa kako.
Ya kopei kareru ta raro karei meꞌri ve,
ya romoꞌo keiyapurutai ya merin koka keiyavereka upuo.f
19 Ya kopei aro mowmow ekepi Jerusalem awirai vou ao en kerivo.
Korao veka ta meꞌri ve poko yei keipinao veka “Akeldama.”
Ku vou awoꞌo ve korao veka,
“Meꞌri vou Noꞌo.”)
20 Ya Cha Pita kairai vova veka,
“Awirai ya Cha Devit kepeo kuinyia Buk Song kuirai veka,
‘Bo voro akei ero,
keta nuinyia kanapo,
via kuinyia iu namin ke bio raꞌa nakei vai.’g
Ya
‘bio raꞌa keta boꞌo va nako vova ya nanoi roiy beiyo va cha.’h
21 “Koneman,
mare aro ve inyia kyiute popomi keta raꞌa yei nemimompe.
Aro ve yei inyia kekepi imi taim Biapako memi Yesus-a kakei imi,
22 kostat iya Cha Jon taim boꞌo yaꞌa karao,
kabaptaisim yei aro bombiam kokai kuinyia iu taim Yesus-a kavariko varu ya God-a kako yaꞌa kakoi remi nake.
Bio veka keta nemimompe yaꞌa,
ero korao veka,
ao mowmow en kapirikere ine yaꞌa,
ke boꞌo va narao imi ya awirai-ya nairirai veka Yesus-a kavariko varu.”
23 Korao veka ta beiyo riepin kemompe,
Cha Matias eri Cha Yosep.
Cha Yosep keipinaka minyiao veka Cha Barsabas,
kopei awoꞌo raꞌa yaꞌa minyiao keipinaka veka,
Cha Jastus.
24 Ya beten-a kepao veka,
“Biapako,
riꞌi yei beiyo mowmow kamayarau iꞌiy ven.
Mema veku namiritami bia nape kamamompe,
25 ke popo va nako vova Cha Judas,
ke boꞌo aposel-a narao.
Ero korao veka,
Cha Judas kanoi bo voro karake nakei ero.”i
26 Korao veka ta aposel-a satu inyia keparai ke nepirike nape boꞌo ve nako,
ya satu va koreitaw awoꞌo ya Cha Matias.
Ya kemompe yaꞌa Cha Matias karoi iꞌiy aposel 11-pla.