Keterepoa Yesus bia nape kupuana kaoroa
(Matyu 21.23-27; Mak 11.27-33)
20
Umo raꞌa,
Yesus-a kakei tempel aꞌari skul-a karoiy aro bombiam ya awirai neman ya God-a inyia kairirai roiy.
Ta bikpris vou tempel,
saveman vou lo awei aro beiy kekapepiya Yesus.
2 Ya kyirai poa,
“Namairai momi,
bia nape kupuana ve karoma,
ta ao en kamaremare?
To kupuana voro amako bekaipe?”
3 Kopei Yesus-a kairai roiy veka,
“Nena minyiao,
kanake ao raꞌa nanatere nopu ke nopiraipona.
4 Taim Cha Jon Baptais,
aro bombiam-a kabaptaisim yei,
ao en koraro heven o kokai iꞌiy beiyo?”
5 Kopei yei veku a va kyiriraivo veka,
“Bo nemirai veka,
‘Ao en koraro heven,’
keta natere romi veka,
‘To korao vekaipe ta via opubilip pova?’
6 Kopei bo nemirai veka,
‘Ao en kokai iꞌiy beiyo,’
aro mowmow keta topa va nepurupi pomi.
Ku vou korao veka,
yei kebilip veka Cha Jon Baptais yaꞌa profet.”
7 Ya kopei kyirai poa Yesus veka,
“Ao en via emi yarau bo okai bekaipe.”
8 Ya Yesus-a kairai roiy veka,
“Nena minyiao,
via kuinyia iu nanairai nopu,
bia nape kupuana karona ta ao en kanao.”
To piksa yei beiyo bo kepao erora
(Matyu 21.33-46; Mak 12.1-12)
9 Ya Yesus-a aꞌai-ya raꞌa karariroiy aro bombiam veka,
“Beiyo raꞌa kanoi erora wain-a karao.
Ya erora wain ve karoiy eno peꞌe yei aro ovu ke bo bisnis-a nepiapao.
Ta yaꞌa veku kanoi kakei boko raꞌa korarapaki ya koporuko naka.
10 Ya kopei taim vou wain-a akai-ya kereave ya kepake nepu,
ya kairai roa wokboi raꞌa kanoi iꞌiy aro bo bisnis-a epiapao ero,
ke wain akai-ya ipin-a neupoa.
Ta yei aro erora wain-a kyiorepariu ero,
wokboi em kepyeiya ya kyirai poa kanoi kanapo.
11 Kopei aka vou erora kairai roa wokboi raꞌa vova kanoi iꞌiy.
Bia emo minyiao,
kepyeiya kepao reka koyova ya kesalim yaꞌa kanoi kanapon.
12 Kopei kairai roa bia namba 3 kanoi vova.
Ta yaꞌa minyiao,
kepyeiya kepaopoa toro ya kyiaivia kepurupi kanoi upuo.
13 “Ya aka vou erora wain-a kairai veka,
‘To keta arape nanao?
Keta ma biam nena kanerenova revo ero nanairai noa nanoi.
Tara kuinyia iu awirai yaꞌa nerivo vai.’
14 “Ta yei aro kyiorepariu erora wain,
ma yaꞌa kepirikeiya,
ya veku kyiriraivo veka,
‘Bia emo ao mowmow ya aka yaꞌa keta nako.
Nemyeiya narai ya ao mowmow em nemiko nau meiya.’
15 Ya kyiaivia kepurupi kanoi erora upuo ya kepyeiya karai.
Kopei aka vou erora ve keta arape narao roiy aro erora yiorepariu?
16 Aka vou erora ve keta nakai ya aro erora yiorepariu keta nayei neviri.
Kopei erora ve keta naroiy aro ovu vova nyiorepariu.”
Taim awirai ve kerivo,
ya kyirai veka,
“Boun!
Via ao ero norao veka vai.”
17 Yesus-a ine katororu kei ya katereroiy veka,
“To korao vekaipe ta awirai emo kepeꞌe kuinyia buk ya God-a kuirai veka,
‘Topa ve yei aro oꞌro epao ero kyioniy pow,
ta kepitoro topa em kotaipo
kopei mare
topa ve koneman ke kuinyia iu oꞌro va noavo kupuana.’ a
18 Aro bombiam-a nerepi taw topa ve,
keta netaritari mememe.
Kopei bo topa ve norei nuinyia taka bia raꞌa,
keta natamtam nau.”
19 Ta yei saveman vou lo awei bikpris vou tempel mare akai rara va kyiorenao ke nyiaivia Yesus.
Ku vou korao veka,
keyarau ven veka,
aꞌai-ya karari konoi iꞌiy.
Ta keriri poiy aro bombiam.
Takis-a keupoa Cha Sisar
(Matyu 22.15-22; Mak 12.13-17)
20 Yei saveman vou lo awei bikpris ine kyiorepariya revo Yesus.
Ya beiyo ovu kyiraipoiy kenopi teve keteteiya.
Aro ve teve keteteiya evo,
keropopeiya veka,
awirai yaꞌa keperepow revo.
Ta teve keteteiya revo Yesus,
bo awenari awirai taipo raꞌa nairai,
ke neperiaki iꞌiy eno ya gavana ke kot-a neyarao.
21 Ya ketere poa veka,
“Ma Tikse,
kemi yarau veka awirai nau skul mema amoiy beiyo ero,
koniniu revo.
Awirai vou moikera kanapo inyia kamairirai moiy beiyo awoꞌo pako eko awei aro mererai.
Ta skul mema inyia amoiy ero,
korao iu minyiao awirai ya God.
22 To mema kamitoro kuinyia iu takis-a nemoa Cha Sisar o baun?”
23 Ta Yesus-a kayarai ven veka keropopeiya,
ya kairai roiy,
24 “Ketao raꞌa nopiritana.
To cha nau awoꞌo ya bia nape koporokeo ketao voro?”
Ya kyirai poa veka,
“Awoꞌo nau cha ya Cha Sisar.”
25 Ya kairai roiy,
“Bo ao ya Cha Sisar,
nopoa Cha Sisar.
Bo ao ya God,
nopoa God.”
26 Ya taim nakei iꞌiy aro bombiam,
via kuinyia iu awirai roporere nyirai poa vai.
Keririko toro row awirai airairoiy ero,
ya roꞌo kyeto.
Awirai yei aro eviri nevereko varu nau awirai vou marit
(Matyu 22.23-33; Mak 12.18-27)
27 Sadyusib ovu kekapepiya Yesus.
Aro ve awirai yei kyirai veka,
beiyo neviri ven,
via kuinyia iu nevereko varu.
28 Ya ketere poa veka,
“Ma Tikse,
Cha Moses awirai raꞌa kareꞌe kuirai veka,
‘Bo bia raꞌa bom-a nako ta meꞌe va via aru row ya narai kanapo,
kopei raꞌai raꞌa nako vova,
keta meꞌe va naru row vai.’ c
29 Tija raꞌai 7-pla kekepi.
Raꞌai anai yei om-a kako ta meꞌe va via aru row ya karai kanapo.
30 Kopei raꞌai raꞌa ainyia takavo,
yaꞌa minyiao bia bom ve kako.
31 Kopei raꞌai raꞌa ainyia tai raꞌai riepin evo,
yaꞌa minyiao bia bom ve kako.
Kepao konoi po veka ya raꞌai 7-pla ve keviri nau.
Meꞌe va via eperereiyo vai.
32 Ya kopei bia bom em vou minyiao korai.
33 Kopei taim aro eviri ven ero nevereko varu,
bia bom ve keta noave om yaꞌa bia nape?”
Ero korao veka,
yei raꞌai 7-pla keko vou bia bom ve.
34 Ya Yesus-a kairai roiy veka,
“Aro bombiam mare vo,
bom-a kepunare,
biam-a kererunai.
35 Ta yei aro bombiam God-a kamompe yei ke kuinyia iu nevereko ya nekepi piya paire,
aro emo via kuinyia iu bom-a nepunare o biam-a nererunai vai.
36 Ku vou korao veka,
via kuinyia iu neviri vova vai.
Kekepi veka ensel ya God.
God-a yaꞌa veku karaonai kevereko varu matmat ta kekepi veka mevova yaꞌa.
37 Cha Moses minyiao kariritami veka,
beiyo keviri ven ero kopei kevereko varu matmat.
Awirai vou aiyerao va koviriri taw aꞌai tarema vo kuirai veka,
‘Biapako kakei God ya Cha Abraham,
God ya Cha Aisak,
God ya Cha Jekop.’ d
38 God ve,
via God yei aro eviri vai,
bauni.
Yaꞌa God yei aro ekepi tare iu ine yaꞌa,
kapirikei mowmow yei kekepi tare.”
39 Ovu yei saveman vou lo kyirai veka,
“Ma Tikse,
awirai mema ro koneman.”
40 Keriri ta raꞌa yei via atere roa vova vai.
Krais yaꞌa ma ya bia nape
(Matyu 22.41–23.7; Mak 12.35-40)
41 Kopei Yesus-a karai roiy veka,
“Korao vekaipe ta inyia kyirai veka,
‘Krais yaꞌa ma ya King Devit?’e
42 Awirai ya King Devit kuinyia Buk Sam kuirai veka,
‘Biapako kairai roa Biapako nena veka,
“Mema kakemi eno awakai nena,
43 nonoi nuinyia iu taim aro ine epema trotropu nanao nai
nekepi roko kompeꞌe mema.” ’f
44 Ya King Devit veku karinaka Krais veka,
‘Biapako’ yaꞌa.
To korao vekaipe ta Krais em kakei veka ma yaꞌa?”
Saveman vou lo inyia pasin taipo kepao
(Matyu 23.1-36; Mak 12.38-40; Luk 11.37-54)
45 Aro bombiam koka baunke kekepi awirai yaꞌa Yesus-a kerivo,
ya kairai roiy disaipel yaꞌa veka,
46 “Mopu ine va noporepariy revo saveman vou lo.
Inyia no ririvag keperepow revo nyiaku ya nyiute nanare.
Keperepow revo beiyo eno nepei paraiyo maket.
Raꞌa vou minyiao,
keperepow revo nekepi tatare sia neman neman erinyia oꞌro lotu yei Juda,
taim vou aokorom pako.
47 Aro emo beten-a kepao keraikeki ke beiyo va nepitoro veka keneman revo.
Ta inyia keropopei aro bom am-a eviripere ven ero,
ta ao rere oꞌro rere kepuna pere kanapo.
Kopei taim vou kot,
keta nai pako akai-ya neko.”