Yesus-a kanoi oꞌro ya Cha Sakias
19
Yesus-a kanoi kareiki ven mataimon Jeriko ya inyia kaute kanoi row rara.
Jesus meets Zacchaeus (Luk 19:1-9)
2 Beiyo raꞌa kakei mataimon ve awoꞌo ya Cha Sakias.
Cha Sakias yaꞌa hetman yei aro takis-a eko.
Ketao koka va nau ao prumo va kuinyia iya.
3 Karake napirikeiya Yesus,
bia emo karao vekaipe.
Aro bombiam prumo kepopopariya,
ta via kuinyia iu napirikeiya Yesus.
Ku vou korao veka,
Cha Sakias yaꞌa bia korama.
4 Ya kopei kaparara kanoi cha kakoi kakeitaw aꞌai fik raꞌa keipinao “sikamo” ke napirikeiya Yesus.
Kayarau ven veka,
Yesus-a keta naute nakai row rara em.
5 Taim Yesus-a kaute kakai iu bo ve Cha Sakias akei em,
ya ine kaoreko nake ya kairai roa veka,
“Ma Sakias,
namaro bereren pika.
Mare roro vo keta nakeni oꞌro mema.”
6 Korao veka ta Cha Sakias ova korova ta kararo bereren kako yaꞌa Yesus ya kerai nopi oꞌro yaꞌa.
7 Aro mowmow ao en kepirikeo,
aomowme kyirai naka veka,
“Kanoi kakei iya bia raꞌa inyia sin-a arao ero.”
8 Taim kerai kepi oꞌro,
Cha Sakias kavariko karoi ya kairai roa Biapako,
“Nama pirike,
Biapako!
Mare keta ao mowmow nena nanawani kora riepin.
Puru moikera keta nanawani noiy aro ao owaunrei ero.
Kopei bo aokakana va nanao voiy aro ovu,
keta puru 4-pla naneretawone noiy varu.”
9 Ya Yesus-a kairai roa Cha Sakias veka,
“Mare God-a kako yei varu aro bombiam vou oꞌro em.
Bia emo yaꞌa minyiao apoti ya Cha Abraham.a
10 Ma ya Bio kararo ke naorenai beiyo kerepi rovope sin ke nako yei varu.”
To piksa yei beiyo 10-pla ketao va keko
(Matyu 25.14-30)
11 Aro bombiam-a kekepi awirai ya Yesus-a kerivo,
ya aꞌai-ya raꞌa karariroiy.
Aꞌai-ya karariroiy,
ku vou korao veka,
yaꞌa veku kareiyo ven kakuke iu mataimon Jerusalem.
Ta aro bombiam prumo kepitoro kingdom ya God-a keta nokai vatiron.
12 Kairairoiy veka,
“Bia beiy raꞌa karake nanoi kantri raꞌa kuinyiaki rarapa reu kantri yaꞌa,
ke nemompe yaꞌa nave king.
Kopei nakai varu keta kantri yaꞌa naorerariu.
13 Korao veka ta kairiy wokboi 10-pla yaꞌa kekape ya ketao vou fotnait 10-pla karoiy.
Ya kairai roiy veka,
‘Ketao ve nopuko ya nonopi bo bisnis-a nopao po,
nuinyia iu taim nakane varu.’
14 “Ta yei aro boko yaꞌa veku kyioniy peiya.
Ya taim kanoi ven,
aro ovu to va keko pa kepekeiya kenopi kyirai veka,
‘Bia ero memi via emeremova nave king memi vai.’
15 “Ta yei kepaonaka bia beiy em kave king,
ya kakai varu boko yaꞌa.
Ya kairiy wokboi 10-pla,
tija ketao va kawani roiy.
Karake nayarau ketao amas eko taw vova.
16 “Bia akai cha kairai roa veka,
‘Bia beiy,
ketao vou fotnait 10-pla bo bisnis-a kanao nou ya kopei ketao vou 100 fotnait-a kanako taw noma.’
17 “Ya king-a kairai roa veka,
‘Neman,
mema wokboi akai.
Mema ao mentanaka evo kamaoremamiu revo.
Kopei mare,
mataimon 10-pla keta namaoremamire.’
18 “Kopei wokboi raꞌa kakai kairai roa king,
‘Bia beiy,
ketao vou fotnait 10-pla mema,
bo bisnis-a kanao nou ya ketao vou 50-pla fotnait-a kanako taw noma.’
19 “Ya king-a kairai roa veka,
‘Mema keta mataimon 5-pla namaoremamire.’
20 “Kopei wokboi raꞌa vova kakai kairai roa king,
‘Bia beiy,
ketao vou fotnait 10-pla mema,
kanakokane noma varu.
Kano nau no to koraꞌa ya kanere kuinyia revo.
21 Kanariri noma,
mema bia rarai.
Mema ao yei aro ovu kepere kamuna,
ta aokorom yei aro ovu kyiora,
kanomi kamako voiy.’
22 “Kopei king-a kairai roa veka,
‘Mema wokboi taipo,
awirai mema veku keta kot-a nenemanao.
Mema kama yarau ven veka,
nena bia rarai.
Ao yei aro ovu kepere kuinyia ta kanako voiy,
kopei aokorom yei aro ovu kyiora,
ta kanako voiy.
23 To via kuinyia iu ketao nena namere nuinyia benk,
bo kopei nakane varu,
keta kora nanako vova.’
24 “Ya kairai roiy aro eropi kakuke vo,
‘Ketao vou 10-pla fotnait-a nopuko peiya,
ya nopoa bia voro ketao vou 100 fotnait-a avo ero.’
25 “Ya kyirai poa king-a veka,
‘Bia beiy,
bia emo ketao vou 100 fotnait-a kavo ven!’
26 “Ya king-a kairai roiy veka,
‘Kanairainopu,
beiyo mowmow ao va nerinyia iꞌiy ven,
keta ovu nanoiy vova.
Kopei bio ao va nerewaunreiya,
ta ao mentanaka po nerinyia iya,
keta nanako neiya.
27 Ta yei aro ine epena trotropu via eperepona nakeni veka king,
ke nanaorenaniy.
Nopuko yei nekape ya nopyei neviri iu ine nena.’ ”
Yesus-a kanoi mataimon Jerusalem veka king
(Matyu 21.1-9; Mak 11.1-10; Jon 12.12-15)
28 Yesus-a awirai ve kairai ven,
ya kavariko kaute row rara kanoi mataimon Jerusalem.
Triumphal Entry (Luk 19:28-44)
29 Taim karoiko iu boko Betfage eri Betani kakuke iu tou keipinao Oliv,
ya kairai roiy disaipel riepin yaꞌa kerai nopi.
Ya kairai roiy veka,
30 “Norupu nopi iu boko vere kuinyia ropu chaire.
Ya norupu pirike donki primo raꞌa,
tiꞌi va kyiapo naka karoi boko voro.
Donki primo ve,
tija bio raꞌa via akei taka vai.
Tiꞌi va norupu raritou ya norupuko norukape naka ve.
31 Bo bio raꞌa natere ropu veka,
‘To donki tiꞌi va korupu raritou ke arape norupu pao?’
Norupu pirai poa veka,
‘Biapakob bo va kuinyia iya ta karererow.’ ”
32 Bia riepin Yesus-a kairai roiy kerai nopi,
ya ao mowmow kerai pirike veka Yesus-a kairai roiy ero.
33 Taim donki ve tiꞌi va inyia kepia raritou,
aka vou donki ve ketere poiy veka,
“To donki tiꞌi va korupu raritou ke arape norupupao?”
34 Ya kerai yirai poiy veka,
“Biapako bo va kuinyia iya ta karererow.”
35 Ya donki kerainyiaka keraikape poa Yesus.
No ririva yei kerairevu taw oreva ya donki vo ya keraielpim yaꞌa Yesus-a kakei taka.
36 Kakei taka donki ya kaute kararo row rara,
ta yei aro bombiam no yei kerevu pow rara.
37 Taim kararo kakuke iu rara koraro iu tou Oliv,
yei disaipel mowmow ova koroꞌoi.
Ta ova kekinakinao pore mirakol epirikere ven ya kyepi pako,
awoꞌo ya God-a kyiavoko nake.
38 Kyepi veka,
“God-a karao roa revo king em.
King emo kararo awoꞌo ya Biapako.
c
Awoꞌo ya God Bia Nake nemavoko, riꞌi mariri kuinyia heven.”
Yesus-a karo row Mataimon pako Jerusalem
39 Kopei yei Farisi ovu keropi rovope iꞌiy aro bombiam koka vo,
kyirai poa Yesus veka,
“Ma Tikse,
nama tovei aro disaipel moma,
ke awirai ve via nyirai.”
40 Ya Yesus-a kairai roiy,
“Kanairainopu,
bo roꞌo va nepikim,
topa veku keta nereyeri ya awoꞌo ya God-a neiyavoko.”
41 Taim Yesus-a kakai kakuke iu mataimon Jerusalem,d
kapirikeo ya karo row.
42 Ya kopei kairai veka,
“Mataimon Jerusalem,
umo mare vo,
kanerenomu,
nonyarau revo ao voro keta norao nokemi riꞌi mariri.
Ta mare ao voro kerinyia roki ine mom,
keta via kuinyia iu nomu pirikere vai.
43 Kopei taim raꞌa kokai paire,
aro ine epemu trotropu keta meꞌri va neti nokoi reiy pako vou mataimon.
Ya iri va keta nyioroka parimu nau.
44 Ta nyiavemu neraipamu nomaro meꞌri,
awei aro meva momu kekepi kuro.
Ta via kuinyia iu nepin topa mom raꞌa nuinyia taw topa raꞌa tirin vai.
Ku vou korao veka,
momu via onyarau revo taim ya God-a nararo eno va naromu vai.”
Yesus-a kanoi tempel
(Matyu 21.12-16; Mak 11.15-18; Jon 2.13-16)
45 Yesus-a kanoi tempel aꞌari ya karerekei aro bombiam inyia ao va kesalim rere aꞌari.
46 Ya kairai roiy veka,
“Buk ya God-a kuirai veka,
‘Oꞌro nena,
keta nuinyia veka oꞌro vou beten.’
e Ta kopao korao veka bo yei aro aokakana.” f
47 Umo mowmow inyia kanoi skul-a karoiy aro bombiam tempel aꞌari.
Ta yei bikpris,g
saveman vou lo awei hetman yei aro bombiam,
rara kyiorenao ke Yesus-a nepyeiya narai.
48 Ta via kuinyia iu rara akai-ya raꞌa nyiorenao ke nepyeiya narai.
Ku vou korao veka,
aro bombiam koka keperepova revo ke awirai yaꞌa nerivo.