To piksa vou bia bom raꞌa inyia konoi kokai iya jas ke naelpim vou
18
Ya Yesus-a aꞌai-ya karariroiy disaipel yaꞌa ke noriritai veka,
umo mowmow beten-a keta nepao,
viake nyioniy.
2 Kairairoiy veka,
“Mataimon raꞌa,
jas-a raꞌa kakei.
Jas emo via ariri roa God vai,
ao raꞌa minyiao,
via ova akinao roiy aro bombiam vai.
3 Ta bia bom raꞌa am-a karai reu kokei mataimon voro.
Inyia konoi kokai iya jas ya kuirai roa veka,
‘Beiyo raꞌa ine karen trotroru,
ta kot-a kenake nenianao.’
4 “Tija,
jas-a via arererow ke nalpim vou bia bom ve vai.
Ta kopei yaꞌa veku kairai varu veka,
‘God-a via anariri noa ta ova anakinao noiy aro bombiam vai.
5 Ta bia bom ve am-a karai reu,
peva inyia kwei konoi kokai ina ke kot-a nanarivo nou.
Korao veka ta koneman bo pasin neman-a nanao nou.
Kot vou nana rivo nou ke via kuinyia iu nokai a va nuirai norana vova vai.’ ”
6 Ya Biapako kairai roiy veka,
“Jas emo via pasin neman-a arao ta a va kopurivo poa vai.
7 Ta yei aro bombiam God-a veku kamompe,
umo roro inyia kero kepaka.
Era via kuinyia iu a va narivo roiy ke nalpim yei vai?
To era via kuinyia iu naelpim yei bereren vai?
8 Kanairainopu,
bererenki,
God-a keta napirikei revo ya pasin neman-a narao roiy.
Kopei taim Ma ya Bio nararo,
keta napirikei aro ekepi meꞌri kebilip o boun?”
To piksa ya Farisi raꞌa eri bia takis-a ako kerai beten
9 Aro ovu kepitoro veka,
yei veku keniniu revo iu ine ya God ta keneman pei aro ovu.
Yesus-a aꞌai-ya karariroiy aro epao veka.
10 “Bia riepin-a kerai kope tempel ke beten-a neraipao.
Raꞌa yei bio vo,
yaꞌa Farisi,
kopei raꞌa,
yaꞌa bio takis-a ako.a
11 Farisi ve karoi ya veku beten-a karao varu varu veka,
‘God,
nena oꞌti kanoma,
via anaka aro ovu vai.
Nena via aokakana va anao,
pasin taipo va nau pasin pamuk-a anao vai.
Nena via anaka bia ero takis-a ako ero vai.
12 Umo riepin vou wik moike moike aokorom-a inyia kaken yao.
Ao mowmow kanuna,
kanere nou puru 10-pla ya kopei puru moikera kanoma.’
13 “Kopei bia ero inyia takis-a ako ero,
karoi rarapaki ta via ine aoreko heven,
baun!
Karoi uruku kayeyeub kairai veka,
‘God nama marimari mona.
Nena bia sin-a inyia kanao.’
14 “Kanairainopu,
bia ero inyia takis-a ako ero kanoi varu oꞌro yaꞌa,
God-a kapirikeiya veka yaꞌa po kaniniu.
Kopei yaꞌa Farisi via aniniu.
Ero korao veka,
beiyo awoꞌo yei veku nyiavoko,
God-a ta naweiyo.
Kopei beiyo awoꞌo yei veku nyiavope,
God-a ta naweiko.”
Yesus awei aro mevova mememe
(Matyu 19.13-15; Mak 10.13-16)
15 Aro bombiam mevova mememe kyiavei kekape poa Yesus ke eno va nareretai ke blesin-a neko.
Taim disaipel-a kepirikei,
ketovetovei.c
16 Ya kopei Yesus-a mevova mememe kairiy kekapepiya,
ya kairai roiy disaipel-a veka,
“Mevova mememe nopin nekape ina,
via nopaopariy vai.
Kingdom ya God,
ero yei aro mevova veka.
17 Awakai-ya kanairai nopu,
bo bia raꞌa kingdom ya God-a via nako veka yei aro mevova em,
via kuinyia iu nanoi aꞌari.”
Beiyo ao prumo kuinyia iya kanoi a va kairai iya Yesus
(Matyu 19.16-29; Mak 10.17-30)
18 Hetman raꞌa katere roa Yesus veka,
“Tikse awakai,
to arape nanao ke kuinyia iu nakeni revo toratora?”
19 Ya Yesus-a kairaikire roa veka,
“To korao vekaipe ta kaimina tikse awakai?
Beiyo raꞌa po kaneman.
God-a yaꞌa unake po.
20 Lo ya Cha Moses kama yarau ven,
Via pasin pamuk-a namao,
beiyo va naimyeiya narai,
aokakana va namao.
Ta via beiyo va nama ropomei ya kot-a nameimao aro ovu.
A va ta namarivo moa aka eri moꞌo mema ya namao moiy revo.’ ” d
21 Ya bia emo kairai roa Yesus-a veka,
“Ao mowmow en pa kanikeo taim kana mentanaka kokai kuinyia iu mare vo.”
22 Yesus-a awirai ve karivo,
ya kairai roa bia emo veka,
“Ao moikera po via amao.
Nanomi ao mowmow mema nama salim moiy beiyo ya ketao voro amako ero nama wani moiy aro mererai.
Namao veka,
ke ao mowmow neman erinyia heven keta namako.
Ya nakame pa namikena.”
23 Taim bia emo awirai em karivo,
riꞌi keiya okoku revo.
Ku vou korao veka,
ao va kere prumo iya revo.
24 Yesus-a kapirikeiya bia emo riꞌi keiya okoku ta kairai veka,
“Beiyo ao prumo nuinyia iꞌiy,
keta via nomariro roiy ke nenopi kingdom ya God.
25 Komariro row kamel-ae nonoi roki nidel kamo,
to kopei bio ao prumo uinyia iya,
kwapata naka revo ke nanoi roki kingdom ya God.”
26 Aro kekepi awirai ve kerivo ketere poa veka,
“Bo norao veka,
to nape kuinyia iu nakei iya God?”
27 Ya kopei Yesus-a kairai roiy veka,
“Awarape via kuinyia iu beiyo va nepao,
God-a kuinyia iu narao.”
28 Ya Cha Pita kairai roa Yesus,
“Nama pirikeo.
Ao mowmow memi kememere nau ya pa kemikema.”
29 Ya Yesus-a kairai roiy veka,
“Awakai-ya kanairai nopu,
beiyo inyia ova nekinao po kingdom ya God,
keta oꞌro yei nepepeo,
om yei,
aro raꞌai yei,
akamoꞌo awei mevova yei,
30 taim baunke nekepi meꞌri,
God-a keta ao mowmow va naroiy notawo ao tija uinyia iꞌiy ero.
Kopei kokai paire,
keta nekepi revo toratora.”
Yesus-a tare kairai vova veka keta narai
(Matyu 20.17-19; Mak 10.32-34)
31 Yesus-a disaipel 12-pla kako yei ikaki ya kairai roiy veka,
“Nekome mataimon Jerusalem.
Ao mowmow tija profet-a kepepeꞌe ta kuirai rova Ma ya Bio,
mare keta akai-ya noraonao.
32 Bia emo ta nerokoperiaki iꞌiy eno yei aro via yiave Juda.f
Ya a va nyiavo poa,
neteriaka,
ropi nyiurakeiya.
33 Ya wip-a neko ya nepyeiya narai.
Kopei umo riepin raꞌa moike keta navariko varu.”
34 Ta yei disaipel via eyarau revo ku vou awirai em.
Ku vou awirai ve kuinyia roki rei.
Ta via eyarau revo awirai airairoiy em.
Yesus-a bia ine taipo karaka kaneman varu
(Matyu 20.29-34; Mak 10.46-52)
35 Yesus-a kakai kakuke iu mataimon Jeriko,
ta bia ine taipo raꞌa kakei row rara ika.
Bia emo,
ta inyia katereroiy beiyo ke ketao va nau ao va neupoa.
36 Taim bia ine taipo karivo aro bombiam prumo kyiute kekape,
ta katereroiy,
“To arape opao?”
37 Ya kyirai poa veka,
“Yesus vou Nasaret-a kakai.”
38 Ya bia ine taipo kaiy kairai veka,
“Yesus,
mema apoti ya King Devit,g
nama okoku mona.”
39 Aro voro kyiute kenopi cha ketoivia,
kyirai poa rova naito.
Ta yaꞌa inyia kaiy pako ta kairai veka,
“Apo ti ya King Devit,
nama okoku mona.”
40 Yesus-a kariraki ya kairai roiy kyiaivia kekape poa.
Bia emo kakai kakuke iya Yesus ya katere roa veka,
41 “To kamake arape nanaonoma?”
Ya bia emo kairai roa veka,
“Biapako,
kanake ine nana peri varu.”
42 Ya Yesus-a kairai roa veka,
“Ine nama periki.
Bilip mema veku korao kama neman varu.”
43 Bererenki po ine keiya periki ya pa karikeiya Yesus awoꞌo ya God-a kavoko.
Taim aro mowmow ao en kepirikeo,
yei minyiao awoꞌo ya God-a kyiavoko.