Pasin taipo inyia bilip-a kobagarapim
(Matyu 18.6-7; 18.21-22; Mak 9.42)
17
Yesus-a kairai roiy disaipel yaꞌa veka,
“Ao ovu keta nerekare ke nere raipaiy aro bombiam-a nerepi rovope sin.
Mereraka revo rova bia voro karao aro bombiam-a kerepi rovope sin.
2 Bo narao bia raꞌa yei aro mevova narei rovore sin,
God-a keta nai pako akai-ya naroa.
Nai emo keta notawo nai voro beiyo topa pako kepiaponao poko ta kyiaivia keparaiyo kararo nao.
3 “Korao veka ta mopu veku noporeparipu.
“Bo raꞌai mema sin-a narao,
awirai-ya namairirai naka ke pasin ve via narao vova vai.
Bo awirai mema narivo ya riꞌi va narovoru,
namapogivim yaꞌa.
4 Bo umo moikera,
sin-a narao roma 7-pla taim,
kopei 7-pla taim nakairima varu nairai roma veka,
‘Kanaokokunore ao voro anao ero,’
ya namapogivim yaꞌa.”
Yesus-a kairai row pasin vou bilip
5 Kopei aposel-a kyirai poa Biapako,
“Bilip memi namao nokoi nopako.”
6 Yesus-a kairai roiy veka,
“Bo bilip mopu nomentanaka norao veka iri vou aꞌai mastet,a
kuinyia iu nopirai pow aꞌai raꞌa veka,
‘Nom parataw nau kaꞌa momu ya nomaro nokome nao re.’
Ya aꞌai ve keta awirai mopu norivo.
Yesus-a kairai row pasin ya wokboi
7 “Bo bia raꞌa mopu nairai roa wokboib raꞌa nanoi erora va narao o sipsip-a naorerarire,
ya kopei nakai varu oꞌro,
era bos yaꞌa ta nairai roa veka,
‘Bereren,
mare akai nakemom aokorom-a nama?’
8 Bauni.
Keta nairai roa wokboi veka,
‘Nanomi aokorom nena namaraivi,
no namaku ya aokorom-a konakam mona nana ya pii va nanaton voꞌo.
Ya kopei mema minyiao aokorom-a nama pii va namaton.’
9 Era bos ve kuinyia iu oꞌti nairai roa wokboi yaꞌa taim awirai yaꞌa narivo?
Bauni.
10 Korao veka ta mopu minyiao,
taim ao mowmow God-a nairai ropu nopao,
keta nopirai veka,
‘Memi wokboi kanapo,
awarape keta nemao,
ao en po keta nemao.’ ”
Yesus-a beiyo 10-pla lepro koraie karaie keneman varu
11 Yesus-a kaute row rara konoi iu mataimon Jerusalem,
ya kanoiromoiy meꞌri para yei distrik Samaria awei distrik Galili.
12 Kanoi boko raꞌa ta beiyo 10-pla leproc koraie kevakakeiya.
Keropi rarapaki,
13 ya kyepi pakod kyirai poa veka,
“Yesus,
Bia beiy,
nama okoku momi.”
14 Taim Yesus-a kapirikeiki kairai roiy veka,
“Nonopi reka mopu nopiritai pris.e
Kopei taim kenopi,
reka yei koniniu varu.”
15 Ta raꞌa yei kapirike veka reka yaꞌa koniniu varu,
ya kakai varu kaiy pako awoꞌo ya God-a kavoko.
16 Kakai iya Yesus ya boratapo katureriyo koraro meꞌri kakuke iu kom yaꞌa,
ya oꞌti kaoroa.
Bia emo kakai varu iya Yesus ro,
yaꞌa Samaria.
17 Yesus-a kapirikeiya bia emo ya kairai,
“Era 10-pla reka yei via oneman varu vai?
To kopei yei 9-pla ekepi bekaipe?
18 Era beiyo nekape varu awoꞌo ya God-a nyiavoko nake kewaun vai?
Era bia raꞌa yei aro raꞌa tirin po vai?”
19 Ya Yesus-a kairai roa bia Samaria veka,
“Nama variko ya nanomi,
bilip mema korao kama neman varu.”
Kingdom ya God keta nokai
(Matyu 24.37-39)
20 Farisi ovu ketere poa Yesus veka,
“To taim bekaipe ke kingdom ya God-a nokai?”
Kopei Yesus-a kairai roiy veka,
“Taim kingdom ya God-a nokai,
via kuinyia iu ao va raꞌa nokamap ke noriritai aro bombiam-a nepirike vai.
21 Ao raꞌa minyiao,
via kuinyia iu nyirai veka,
‘Nopu pirike,
kuinyia em’,
o ‘Kuinyia vere.’
Ku vou korao veka kingdom ya God-a kuinyia romopu.”
22 Kopei Yesus-a kairai roiy disaipel yaꞌa veka,
“Taim-a inyia kokai pa,
keta noperepow revo nopupirike de raꞌa rere de ya Ma ya Bio.
Ta via kuinyia iu nopupirikeiya vai.
23 Beiyo keta nyirai popu veka,
‘Nopu pirikeiya,
kakei vere,’
o ‘Nopu pirikeiya kakei em!’
Ta mopu via pa nopikei vai.
24 Taim Ma ya Bio nararo,
keta nararo vatiron veka bo koperem koviriri konoi rorore boko mowmow ta aro bombiam mowmow keta nepirike.
25 Kopei tija vou,
yei aro taim mare vo keta oreva neupoa ya nai pako va nako.
26 “Pasin veka kepao taim ya Cha Noa,f
keta norao iu minyiao taim Ma ya Bio nararo.
27 Taim ya Cha Noa,
aro bombiam-a kekepi aokorom-a kepa,
pii va keton,
bom-a kepunare,
biam-a kererunai kokai kuinyia iu taim Cha Noa kararo wua pako.
Taim kararo ven wua kuro,
pii va koputu ya koyei aro bombiam koka keviri nau.
28 “Taim ya Cha Lotg korao iu minyiao.
Kekepi aokorom-a kepa,
pii va keton,
ao va kebaim ya kesalim rere,
erora va kepao,
ta oꞌro va keparepare.
29 Kopei taim Cha Lot karereo ven mataimon Sodom,
ta aiyerao va nau topa salfa kowere koraro heven veka aꞌ ya koyei aro mowmow keviri.
30 “De ve Ma ya Bio nararo,
keta norokorao veka ao erekamap roa Cha Noa eri Cha Lot.
31 Taim ve,
bo bio raꞌa nakei taw oꞌro nake,h
via kuinyia iu nararo nanoi ao yaꞌa erinyia oꞌro aꞌari naruna vai.
Korao veka ta bo bio nakei erora,
via kuinyia iu nanoi varu oꞌro ao yaꞌa naruna.
32 O nopu kinao,
ao arape orao row om ya Cha Lot.i
33 Bo bio laip yaꞌa veku navo kupuana,
laip yaꞌa keta norei roki.
Kopei bo bio laip yaꞌa narereo,
laip yaꞌa viake norei roki.
34 “Kanairainopu,
Ma ya Bio nararo roro,
bia riepin kerai inyia minyiao bet moikera,
God-a keta raꞌa nako yaꞌa,
kopei raꞌa keta narereiya nakei.
35-36 Bia bom riepin-a kerai kepi wit iri va kerai kuku minyiao,
raꞌa keta nako vou,
kopei raꞌa keta narereo nokei.”
37 Ya disaipel-a keterepoa Yesus veka,
“Biapako,
ao en ta nokamap boko bekaipe?”
Kopei Yesus-a kairai roiy veka,
“Boko bekaipe ao va eviri inyia ero,
boko voro maintakao va ta kekape kyiopokeke.”j