To piksa ya bosboi taipo
16
Yesus-a kairai roiy disaipel yaꞌa veka,
“Bia raꞌa ketao koka kuinyia iya ta bosboi raꞌa kakei iya.
Ya bosboi emo aro ovu kevitikeiya veka,
ao prumo ya bos yaꞌa,
kataratarao kanapo.
2 Korao veka ta bos-a kairia bosboi yaꞌa kakai iya.
Kakai ya katere roa veka,
‘To korao vekaipe ta awirai vou pasin mema kana rivo?
Nanomi ripot vou ao prumo kerinyia eno peꞌe mema ero,
name nokai rona.
Ku vou korao veka,
mema via kuinyia iu nakemi veka bosboi nena vova vai.’
3 “Ya bosboi veku kairai varu veka,
‘To mare keta arape nanao?
Ku vou korao veka,
bos nena karirikenaki ven row bo nena.
Kupuana nena kowaun ke bo va nanao noa bia raꞌa ke meꞌri va nauni vai.
Ta nena reka koyona revo ke aro ao va nanatere noiy.
4 Kopei mare kana yarau ven arape keta nanao.
Aro dinau epaopiya bos nena,
keta neko nena nanoni oꞌro yei.’
5 “Ya kopei kairiy aro dinau epaopiya bos yaꞌa kekape.
Ya katere roa bia akai cha,
‘To mema dinau amas amao miya bos nena?’
6 “Ya bia emo kairai roa,
‘800 galen wel dram ero dinau nena.’
Ya bosboi-a kairai roa veka,
‘Pepa voro dinau mema kepeꞌe ero namako,
ya nakemom bereren ya nameꞌe po veka dinau mema 400 galen kanapo.’a
7 “Ya bosboi-a katere roa bia raꞌa vova,
‘Dinau mema amas?’
Ya bia emo kairai roa veka,
‘1,000 bek wit em dinau nena.’b
Ya bosboi-a kairai roa veka,
‘Pepa voro dinau moma kepeꞌe ero namako ya nameꞌe po veka 800 kanapo.’
8 “Bosboi taipo em,
bos yaꞌa karirikeiyaki ven row bo,
ta awoꞌo yaꞌa po bos-a kavoko nake.
Ku vou korao veka,
bosboi en ruru neman-a kuinyia iya ta yaꞌa veku kaorerariya.
Beiyo pa kepikeo ao vou meꞌri ve,
rara mememe vou bo yei epao ero ta kesave revo,
ke neropopei ya ruru nepei rovoru aro ovu.
Ya rara ve bo yei inyia kepao kotawo save yei aro pa kepikeo ao vou lait.
9 Kanairainopu,
ketao va nau ao vou meꞌri ve ta nopao aro bombiam-a nyiave kura mopu.
Kopei taim ketao va nau ao vou meꞌri ve nowaunki,
keta oꞌto notei ropu taim nokepi oꞌro voro kuinyia toratora.c
10 “Bo bio raꞌa ao mememe naorerarire revo,
bia ero kuinyia iu ao ipipo naorerarire minyiao.
Kopei bo bio pasin taipo narao taim ao mememe naorerarire,
bia ero keta pasin taipo narao taim ao ipipo naorerarire minyiao.
11 Bo ketao va nau ao vou meꞌri ve via noporeparire revo,
nape keta ao neman akai-ya naropu noporeparire?
12 Bo ao yei aro ovu via noporepapire revo,
nape keta ao mopu naropu?”
13 “Wokboi moikera via kuinyia iu bo va narao roiy bos riepin.
Raꞌa via kuinyia iu narererova revo,
keta narererova po bos raꞌa.
A va ta narivo roa raꞌa,
kopei raꞌa viake a va narivo roa.
Korao veka ta via kuinyia iu bo va nopao poa God nau ketao.”d
Yesus-a awirai vou lo kairirai nau kingdom ya God
14 Farisi ketao va keperepow revo.
Korao veka ta awirai ya Yesus-a kerivo ta uvo va kevatinaka.
15 Kopei Yesus-a kairai roiy veka,
“Mopu kopao ke aro bombiam-a nepitoro veka pasin neman-a kopao.
Kopei God,
arape erinyia roki riꞌi mopu kayarau ven.
Ao arape beiyo kepitoro veka kere neman,
God-a kapirikere veka kere taipo revo iu ine yaꞌa.
Yesus-a kairai row lo nau kingdom ya God
16 “Awirai vou lo awei profet,
inyia kyirirai kokai kuinyia iu taim ya Cha Jon.e
Kopei taim ya Cha Jon,
awirai neman vou kingdom ya God-a inyia kyirirai.
Ta aro bombiam-a kereva pana ke nenopi kingdom aꞌari en.
17 Uteno nau meꞌri keta nere nopi nere baunki nau,
kopei awirai korama ya God,
via kuinyia iu nowaunki vai.”
Yesus-a kairai row pasin vou marit-a noawetari
(Matyu 5.31-32; 19.9; Mak 10.11-12)
18 Yesus-a kairai vova veka,
“Bia nape narereo om yaꞌa ya om tare va nako,
bia ero pasin pamuk-a karao.
Kopei bia bom ve am vou karereo ta bia nape nako,
bia emo minyiao pasin pamuk-a karao.”
Awirai ya bia ao prumo kuinyia iya eri Cha Lasarus
19 Yesus-a kairai vova veka,
“Tija,
bio raꞌa kakei ketao koka va kuinyia iya.
Ta umumoka noreka ine neman nau no biriri karikoko.
Umumoka bia emo aokorom rere neman neman po kara.
20-21 Kopei kakuke iu kamo vou reiy vou oꞌro yaꞌa,
aro ovu bia marapepu raꞌa kyiaivia kekape keperia kakei.f
Awoꞌo ya Cha Lasarus.
Reka yaꞌa aoka ipipo kakirari ta yei rapa va inyia kekape aoka va kepiaprepu.
Ta Cha Lasarus karererow revo aokorom kora kora,
kerinyia roko tebol ya bia emo ketao koka kuinyia iya ero,
nako nara.
22 “Kopei taim Cha Lasarus karai,
ensel-a keko yaꞌa keperia kakei iya Cha Abraham.g
Kopei bia emo ketao koka uinyia iya ero,
yaꞌa minyiao karai ya kepere.
23 Kanoi kakei helh ta reka koararaka revo.
Kopei ine kaoreko nake ya kapirikeiya Cha Abraham kakeireiya rarapa,
ta ya Cha Lasarus kakei iya.
24 Ya kairia Cha Abraham kairai roa veka,
‘Ma Tata Abraham,
nama okoku mona,
ya namairai moa Cha Lasarus nanoi kainyieto yaꞌa nateporo pii ya nareretavo piarutu nena,
ke nerena mariri.
Ku vou korao veka,
kakeni aiyerao ve ta nai pako akai-ya kanako.’
25 “Kopei Cha Abraham kairai roa veka,
‘Ma,
O nama kinao taim kakemi tare,
ao neman neman-a kamuna.
Ta ya Cha Lasarus,
ao taipetaipe po karuna.
Ta mare,
kakei riꞌi keiya neman,
ta moma nai pako akai-ya kamako.
26 Ao raꞌa minyiao,
God-a baret pako raꞌa karere kuinyia romomi.
Korao veka ta bo aro ekepi para memi kepake nenopi pipu,
via kuinyia iu nenopi.
Mopu minyiao kopake nokape pimi,
via kuinyia iu nokape.’
27 “Ya kairai roa Cha Abraham veka,
‘Bo norao veka,
mah tata,
kanatere noma ke namairai moa Cha Lasarus nanoi oꞌro ya aka nena.
28 Raꞌai 5-pla nena kekepi.
Nanoi awirai kupuana nairai roiy veka,
via kuinyia iu nekape bo vou nai pako va nau reka noaraꞌrai vai.’
29 “Kopei Cha Abraham kairai roa veka,
‘Yei aro raꞌai moma,
awirai ya Cha Moses awei profeti kuinyia iꞌiy.
Kuinyia iu awirai ve nerivo.’
30 “Kopei kairai roa Cha Abraham veka,
‘Bauni,
Ma Tata Abraham,
bo bio raꞌa narai ven kopei navariko varu nanoi nairai roiy,
keta riꞌi va nerovoru.’
31 “Kopei Cha Abraham kairai roa veka,
‘Bo awirai ya Cha Moses awei profet-a via nerivo,
ta bia raꞌa arai ven navariko varu nanoi nairai roiy,
keta via nebilip.’ ”