To piksa vou sipsip-a koreiroki
(Matyu 18.12-14)
15
Yei beiyo takis-a eko ero awei beiyo sin-a epao ero,
kekape kakuke iya Yesus ke a va nerivopoa.
2 Ta yei Farisi awei saveman vou lo aomowme keture ta kyirai veka,
“Bia em kura kavei aro sin-a epao ero ta inyia kakei aokorom-a kara iꞌiy.”
3 Kopei Yesus-a aꞌai-ya karariroiy veka,
4 “Bo bio raꞌa mopu 100 sipsip-a naorerarire,
ta raꞌa rere 100 sipsip ro koreiroki.
To era aka rere sipsip ve keta sipsip ovu narerere nererori aokorom-a nerera,
ya yaꞌa po nanoi naorenanao nonoi nuinyia iu napirike vai?
5 Ya kopei taim naorenao ven,
keta ova norova ya sipsip emo naorataw tom yaꞌa ya napoi.
6 Taim nakai oꞌro,
keta naiy roiy aro kura yaꞌa awei aro oꞌro ekepi piya kakuke nekape nyiopoke piya ya nairai roiy veka,
‘Ova noropu ina minyiao,
sipsip nena koreiroki ta kanaoreꞌnanao ya kanavo varu.’
7 Kanairainopu,
oꞌto veka keta nokamap heven taim bio raꞌa sin-a arao ero riꞌi va narovoru.
Awakai,
keta oꞌto notei roiy beiyo 99 keniniu ven iu ine yaꞌa God ta riꞌi va kerovoru.
Kopei bo bia raꞌa sin-a inyia arao ero riꞌi va narovoru,
keta ova noroꞌoi rova pakoki vova ke.”
To piksa vou ketao va koreiroki
8 Ya Yesus-a kairai roiy vova veka,
“Bo bia bom raꞌa ketao silva 10-pla nuinyia iu,
ta raꞌa korao koreiroki.
Keta lam-a noruri ya bo mo noriri norenao nonoi nuinyia iu noko varu.
9 Kopei taim ketao voro koreiroki koko ven,
ya kura vou koirire awere aro oꞌro erekeri iu kakuke minyiao kerekare kereopokeo ya kuirai rore veka,
‘Ova norove ini minyiao,
ketao neni koreiroki ya kopei kenorenao ya kengo ven.’
10 Kanairainopu,
ensel ya God minyiao oꞌto veka keta notei taim bio raꞌa riꞌi va narovoru ya sin-a narereo.”
To piksa ya ma biam-a karei roki
11 Yesus-a kairai vova veka,
“Bia raꞌa meꞌe biam riepin-a kekepi piya.
The Prodigal Son (Luk 15:11-32)
12 Kopei raꞌai mentanaka kairai roa aka yaꞌa veka,
‘Ma Tata,
ao mowmow mema nama wani mopi raꞌai nena.
Koraꞌa nena namona.’
Yauke aka va ao va kawani konoi roiy meꞌe biam riepin.
13 “Kovevenki,
ya raꞌai mentanaka evo ao mowmow yaꞌa kairiri ya kanoi kantri raꞌa kuinyiaki rarapa.
Boko vere,
ketao yaꞌa kataraꞌtarao rore pasin taipetaipe vou meꞌri.
14 Ya kopei ao mowmow yaꞌa kere waunki nau,
ya kantri vere minyiao taim vou aokorom-a kowaunki korereka iꞌiy ta a va kowaunki reiya nau.
15 Korao veka ta kanoi kapirikeiya bia raꞌa vou boko voro ya katere roa ke bo va naraoroa.
Ya bia emo kairai roa kanoi rao yaꞌa kaorerarire.
16 Bia raꞌa via aokorom-a aoroa vai,
ta koraiyova revo.
Korao veka ta kapirikere rao va bainono tao va kerera,
ta yaꞌa minyiao ova korakako revo karake bainono tao va nara rire rao.
17 “Ya kopei ruru akai-ya kako ya ova kakinaoko varu rova aka yaꞌa,
ya kairai veka,
‘Wokboi mowmow kekepi piya aka nena,
aokorom prumo kuinyia iꞌiy ta inyia kepa.
To kopei bo emo,
aokorom-a kowaun ta koraiyona ta kanake naran.
18 Keta nanavariko ya nanoni niya varu aka nena,
ya nanairai noa veka,
“Ma Tata,
sin-a kanao noa God ta mema.
19 Mare via ananeman ke naimina veka ma moma vova vai.
Namin nakeni veka raꞌa yei wokboi mema.” ’
20 Ya kavariko ya kaute kanoi iya varu aka yaꞌa.
“Taim baunke kaute kakai rarapa,
aka yaꞌa kapirikeiya ya riꞌi koiya eperu rova ma yaꞌa.
Ta kaparara kanoi iya ma kaivia kaororova iri keiya kirikiri.
21 “Ya kopei ma biam-a kairai roa veka,
‘Ma Tata,
sin-a kanao noa God ta mema.
Nena via ananeman ke naimina veka ma moma vova vai.’
22 “Ya kopei aka yaꞌa kairai roiy wokboi yaꞌa veka,
‘Bereren,
noreka ine neman-a nopuko nokape nepia pikokope.
Bona raꞌa nepia pikokope eno ya sandel-a nepia pikokope kom.a
23 Nonopi bulmakau ma purupuru moikera po nopavoka nopyeu norai.
Keta nema ya oꞌto notemi minyiao.
24 Ku vou korao veka,
ma biam nena voꞌo karai ven ta mare kakei tare.
Karei roki ven ta mare kemorenaka.’
Korao veka ta aokorom pako va kepao ya oꞌto kotei minyiao.
25 “Taim aokorom-a inyia kepa ta oꞌto va kotei,
ma biam anai-ya baunke kakei erora.
Ya kopei kaute kakai kakuke iu oꞌro ya musik-a karivo ta aro bombiam-a kom-a kenyiapa.
26 Ya kairia wokboi raꞌa ya aka yaꞌa ya katere roa,
‘To arape epao?’
27 Kopei wokboi ya aka yaꞌa kairai roa veka,
‘Raꞌai mentan mema kakai varu.
Ta aka moma bulmakau ma purupuru moikera po koroi kavoka kayeu roa.
Ku vou korao veka,
raꞌai mentan mema kanoi ta kopei kakai varu kaneman via ataipia.’
28 “Ma biam anai-ya to evo karivo ya ova keiyaroro revo,
ta koinyia via nanoi oꞌro aꞌari.
Korao veka ta aka yaꞌa kakai upuo a va inyia kairirai roa ke nanoi oꞌro aꞌari.
29 Ya kopei ma biam ve kairai roa aka yaꞌa veka,
‘Nama pirike!
Ainini mowmow,
bo pako va inyia kanaonoma kakeni veka wokboi moma.
Awirai mema pa kanikeo.
Ta moma via ao veka meme mentanaka raꞌa amona ke awei aro kura nena oꞌto notemi.
30 Kopei ma biam mema ero,
kanoi ao mowmow mema kararai kire rore aro bom rara.
Ya kopei kakai varu oꞌro,
bulmakau ma purupuru moikera kaimyeu moa.’