Yesus-a kanoi kakei oꞌro ya Farisi raꞌa
14
De Sabat raꞌa,
Yesus-a kanoi aokorom-a kara iya oꞌro ya bio anoi roiy Farisi cha.
Taim kakei oꞌro voro,
yei Farisi ine kyiorepariya revo.
2 Taim evo,
bio raꞌa reka koiya putuputu kakai karoi revo cha,
kakuke iya Yesus.
3 Ya Yesus-a katereroiy Farisi awei saveman vou lo veka,
“Era kuinyia iu de Sabat aro bombiam a oraie nemaie neneman o bauni?”
4 Ta via a va raꞌa yiraikipe poa vai.
Korao veka ta Yesus-a kaivia bia emo reka eiya putuputu vo ya karaka kaneman varu ya kairai roa kanoi.
5 Ya kopei katereroiy veka,
“Bo raꞌa mopu ma biam-a nakei iya o bulmakau raꞌa naroi iya,
ta karei rovo pikamo de vou Sabat,
era ta nopin nakei o keta nonopi bereren nopaiviako nake?”
6 Ya roꞌo kowaunki rei.
Via awoꞌo mema veku namavoko
7 Taim Yesus-a kapirikei beiyo kekape ke aokorom-a nepa,
kekape ya kekepi tatare sia yei aro ipipo ta aꞌai-ya karariroiy.
8 “Bo bio raꞌa nairima nanomi aokorom pako ya bia raꞌa om-a kako,
via nanomi nakemi tatare sia yei aro beiy.
Ku vou korao veka,
sia ere kemompe poiy beiyo awoꞌo ketawomaki.
9 Bia ero airima ero,
keta nakai nairai roma veka,
‘Sia mema naomoa bia beiy ve.’
Keta reka noyoma revo ya nanomi nakemi revo paire.
10 Taim bio raꞌa nairima nanomi aokorom-a nama,
ta nakemi revo paire,
bo kopei aka vou aokorom-a nakai ta nairai roma veka,
‘Kura,
nakame nakemom revo bo akai.’
Ta narao veka ke awoꞌo pako namako miy ine yei aro ekepi aokorom-a epa pima.
11 Beiyo awoꞌo yei veku nyiavoko,
God-a keta awoꞌo yei nawore.
Beiyo awoꞌo yei nyiavope,
God-a keta awoꞌo yei navoko.”
Nemao moiy revo beiyo voro via kuinyia iu ao va nepomi varu
12 Kopei Yesus-a kairai roa bio airia anoi oꞌro yaꞌa veka,
“Taim aokorom pako va namao,
via kura mema naimiy,
o yei aro raꞌai mema,
o yei aro noꞌo ovu mema,
o yei aro okepi minyiao ketao koka uinyia iꞌiy.
Bo namao veka,
yei minyiao keta kopei neipima varu taim aokorom-a nepao.
13 Taim aokorom pako va namao,
ta naimiy beiyo ao owaunrei ero.
Beiyo kom-a nau eno erei taipo,
ta yei beiyo kom-a oreirai ta yei beiyo ine erei wuto.
14 Aro voro via kuinyia iu aokorom-a nepao ya neipima varu.
Kuinyia iu ova noroꞌoma.
Ku vou korao veka,
kokai paire,
God-a keta ao va naroma taim aro eniniu iu ine ya God-a nevereko varu.”
To piksa vou aokorom pako
(Matyu 22.1-10)
15 Kopei taim raꞌa yei aokorom-a kara iya awirai ve karivo,
ta kairaikire roa veka,
“Aro bombiam keta nekepi aokorom-a nepa iu kingdom ya God,
ta ova noroꞌoi.”
Ku vou korao veka,
God-a karao roiy revo.
16 Kopei Yesus-a kairai roa veka,
“Beiyo raꞌa karake aokorom pako narao,
ta kairiy aro prumo kekape.
17 Taim ve kamompe ke aokorom pako va narao.
Ya kairai roa wokboi yaꞌa kanoi kairiy aro airairoiy ato ro.
Ya wokboi em kaiy veka,
‘Nokape,
aokorom-a kemao ven.’
18 “Ta yei aro prumo airiy ero,
kyirai veka via kuinyia iu nenopi.
Bia raꞌa kairai veka,
‘Nena meꞌri koraꞌa kanako ven ta nanoni nana pirike voꞌo.
Ta kana okoku via kuinyia iu nakane.’
19 “Beiyo raꞌa vova,
yaꞌa minyiao kairai veka,
‘Bulmakau 10-pla kanako ke bo va nererao.
Keta nanoni nare bo va nererao nana pirikere voꞌo.
Ta kana okoku via kuinyia iu nakane.’
20 “Kopei bia raꞌa minyiao kairai veka,
‘Mare om-a kanako ta via kuinyia iu nakane.’
21 “Ya wokboi emo kakai varu ya awirai emo kairai roa bia beiy.
Ya bia beiy-a ova keiyaroro revo ta kabereren kairai roa wokboi yaꞌa veka,
‘Mareakai nanomi momore rara mowmow.
Rara mememe nau rara ipipo vou mataimon voro ya naimiy beiyo ao owaunrei ero awei beiyo kom-a nau eno erei taipo,
ta yei beiyo kom-a ereirai awei beiyo ine erei wuto.
Namako yei awei nakame oꞌro aꞌari nena.’
22 “Kopei wokboi-ya kairai roa veka,
‘Bia beiy,
awarape amairai ero kanao ven ta oꞌro mema baunke via rova ore.’
23 “Ya bia beiy-a kairai roa veka,
‘Mataimon-a namemeo nanomi momore rara ipipo ya namaute mow reiy ikika rere erora.
Taim aro bombiam-a nama vakakei,
keta to kupuana va namairai moiy nekape oꞌro nena.
Kanerenou revo oꞌro nena rova nore.
24 Kanairainopu,
ku vou korao veka,
beiyo prumo tija kainiy,
via kuinyia iu aokorom pa nepa wona vai.’ ”
Awarape keta nokai ima taim pa namikeiya Yesus
(Matyu 10.37-38)
25 Aro bombiam koka kyiute kenopi pova Yesus ya karovoruka iꞌiy ya kairai roiy veka,
26 “Bo bio naka ina ta via ine arei trotroru akamoꞌo yaꞌa,
om yaꞌa,
mevova yaꞌa,
aro raꞌai yaꞌa awere row yaꞌa ta laip yaꞌa veku minyiao,
via kuinyia iu nakei veka disaipel nena.
27 Bo bio aꞌai tiriki yaꞌa via napoi pa narenaroi,
bia ero minyiao via kuinyia iu nakei veka disaipel nena.a
28 “Bo bio raꞌa mopu karake oꞌro ririva narira.
Tija,
bia emo keta nakei naorerorow revo vo,
ketao amas keta nuinyia iu ao vou oꞌro naruna ke oꞌro emo narao nau.
29 Bo oꞌro va narira ta via narao nau,
aro mowmow keta oꞌro ve nepirike ya a va nyiavo poa.
30 Keta beiyo nyirai veka,
‘Bia oꞌro karira ero via arao nau vai.’
31 “Bo king raꞌa to va narivo veka king raꞌa keta roma narao iya,
ta nakei naorerorow revo rara bekaipe kuinyia iu yaꞌa awei 10 tausen soldia yaꞌa,
nenopi roma nepaopiya king rairo awei 20 tausen soldia yaꞌa.
32 Bo nayarau veka via ainyia iu,
keta beiyo ovu nasalim yei nenopipiya king rairo.
Taim baunke nakei rarapa,
keta to va nyirai nomoike ke via kuinyia iu roma nepao.
33 Korao veka ta bo mopu via oreva nopore ao mowmow mopu,
via kuinyia iu nokepi veka disaipel nena.”
Yesus-a aꞌai-ya karari row sol-a otaipo
(Matyu 5.13; Mak 9.50)
34 Yesus-a kairai vova veka,
“Sol-a koneman,
bo raravo vou nowauni,
to keta arape nemao mow ke noraravo varu?
35 Sol veka via oneman row meꞌri vai,
o via oneman ke nemi kororeu taw aꞌa rere bulmakau vai,
korao veka ta keverevereki.
“Beiyo teve neyainyia keta awirai ve narivo.”