Beiyo via abilip keta laip ya norei roki
13
Taim ve,
yei aro ovu kekape kekepi ya kyirai poa Yesus row awirai yei Galili ovu.
Ofa kepao ta Pailat-a kayei keviri ya noꞌo yei kakororeu taw ofa yei.
2 Ta Yesus-a katereroiy,
“Era mopu kopitoro veka,
Galili ve sin pako kepao ketawoi Galili mowmow ta nai ve kepoiy vai?
3 Boun ben!
Kanairainopu,
bo riꞌi va via nopu rovoru,
mowmow mopu minyiao keta nopu viri veka yei veku.
4 Tija oꞌro ririva koroi mataimon Siloam ta kopureritai beiyo 18-pla ya keviri.
Era kopitoro veka sin yei epao ero kotawoi sin yei aro ovu ekepi mataimon Jerusalem vai?
5 Boun ben!
Kanairainopu,
bo mopu minyiao riꞌi va via nopu rovoru,
mowmow mopu minyiao keta nopu viri veka yei.”
To piksa vou aꞌai via akai-ya oave
6 Ya aꞌai-ya raꞌa karariroiy veka,
“Beiyo raꞌa aꞌai fik moikera kaora koroi erora wain yaꞌa.
Ya kopei kanoi ke akai-ya nairiri,
ta aꞌai fik evo via oave.
7 Korao veka ta kairai roa bio inyia aorerariu erora wain-a veka,
‘Mare ainini 3-pla konoi ven ta kakane niu aꞌai fik em ke akai-ya nanairiri.
Ta aꞌai fik em,
via akai-ya oave vai.
Korao veka ta aꞌai emo namairoki.
Koroi ta rere vou meꞌri koko reu.’
8 “Kopei bio erora kaorerariu kairai roa aka vou erora veka,
‘Bia beiy,
aꞌai fik ve ta nuinyia ainini raꞌa vova vo.
Keta meꞌri va nanakanaka ku vou ya aꞌa rere kau va nanikorou.
9 Kopei bo ainini raꞌa vova akai-ya noave,
keta noroi,
bo nowaun ta namairoki.’ ”
De Sabat Yesus-a karao bia bom raꞌa koneman varu
10 Sabat raꞌa,
Yesus-a kanoi oꞌro lotu aꞌari yei Juda skul-a karoiy aro bombiam.
11 Ta bia bom raꞌa kokei iꞌiy minyiao,
spirit taipo kokei iu konoi kuinyia iu ainini 18-pla.
Ta kute kokoru konoi po via kuinyia iu notopanko vai.
12 Taim Yesus-a kapirikeo,
kairiu kokai iya ta kairai row veka,
“Bia bom,
a oram ero kana ririkeuki ven.”
13 Ya Yesus-a eno karere taw ya bererenki oreva korou topanko varu ya koroi awoꞌo ya God-a kwavoko.
14 Kopei hetman vou oꞌro lotu ova keiyaroro rova Yesus.
Ero korao veka,
de Sabat bia bom ve karao koneman varu.
Ya kairai roiy aro bombiam veka,
“Umo 6-pla keta bo va nemao.
Bo kopake nokape,
ta nokape de raꞌa vou bo ke nanao nopu neman varu.
De Sabat via ke nokape.”
15 Kopei Biapako kairaikire roa veka,
“Mopu aro roporere!
Taim vou de Sabat,
ta inyia konopi oꞌro rere kau va nau donki tiꞌi va kopuraritou pere ya kopu rainyiare kerenori pii va kere tonton.
16 Ta bia bom ve,
vou ma ya Cha Abraham.
Satan-a kavo karaike kokei konoi kuinyia iu veka ainini 18-pla.
To era de Sabat via kuinyia iu a orao ero nanao norereu vai?”
17 Taim awirai ve kairai,
yei aro ine epia trotropu reka koyoe revo.
Ta aro bombiam mowmow ova koroꞌoi row ao neman neman-a inyia kararerare.
To piksa vou yis-a nau iri vou aꞌai mastet
(Matyu 13.31-32; Mak 4.30-32)
18 Ya Yesus-a katere veka,
“To Kingdom ya God-a korao vekaipe?
To arape korao iu minyiao Kingdom ya God?
19 Kingdom ya God-a korao veka iri vou aꞌai mastet,a
bio raꞌa kako kaora koroi erora yaꞌa.
Mastet iri kerekore kerepako ya ruꞌu va kerekare u kererere taw aꞌai uꞌ.”
To piksa vou yis
(Matyu 13.33)
20 Ta Yesus-a tare katereroiy vova veka,
“Ao arape korao iu minyiao kingdom ya God?
21 Kingdom ya God-a komentanaka korao iu yis,
bia bom raꞌa koko ya kokororeu taw plaua ya korikorovo daram anai raꞌa ya plauab koputu.”
Kamo mentanaka
(Matyu 7.13-14; 7.21-23)
22 Taim Yesus-a kaute row rara kanoi mataimon Jerusalem,
kanoi rorore mataimon nau rere boko skul-a karoiy aro bombiam.
23 Ya kopei bio raꞌa katere roa veka,
“Biapako,
era God-a aro moike moike po ta nako yei vai?”
Kopei Yesus-a kairai roiy veka,
24 “Nopu reva pana ke nonopi kamo mentanaka.
Kanairainopu,
beiyo prumo kepake nenopi kamo mentanaka vo,
ta via inyiapi nenopi aꞌari.
25 Taim aka vou oꞌro voro navariko kamo va natire,
mopu keta noropi upuo kamo va nopukirikiri nopirai veka,
‘Biapako,
kamo namuriki momi.’
Ta kopei nairai ropu veka,
‘Kana roivinapu,
bo okape boko bekaipe.’
26 “Kopei mopu keta nopirai poa veka,
‘Memi inyia aokorom-a kema pii va kemiton mima ta karomi mow rara inyia skul-a kamomi.’
27 “Ta kopei nairai ropu veka,
‘Kana roivinapu,
bo okape boko bekaipe.
Nopepenaire,
mopu aro pasin taipetaipe akai-ya koparepare.’
28 “Nopu pirikeiya Cha Abraham,
Cha Aisak,
Cha Jekopc awei profet mowmow kekepi kingdom ya God.
Keta neririkepu nonopi upuo ya nopuro eu va nopori.
29 Yei aro umo raro,
umo koi,
para not awei para saut ta nekape aokorom-a nepa minyiao iu kingdom ya God.
30 Nopurivo,
beiyo ovu mare kekepi pa keta nekepi revo cha.
Kopei beiyo ovu mare ekepi cha,
keta nekape revo paire.”
Yesus-a karo row mataimon Jerusalem
(Matyu 23.37-39)
31 Taim emo,
yei Farisi ovu kekapepiya Yesus ya kyirai poa veka,
“Bo ve namemeo ya nanomi boko raꞌa,
ku vou korao veka,
King Herot karake nayema naram.”
32 Ya Yesus-a kairai roiy veka,
“Nonopi nopirai poa rapa uka veka,
‘Mare to uri keta spirit taipetaipe nana ririkeiki.
Ta yei aro a oraie keta nanaie neneman varu.
Kopei umo riepin raꞌa moike,
keta bo nena nanao nau.’
33 Mare to uri to uri raꞌa vova,
ta nanaute nanoni.
Ero korao veka,
via kuinyia iu profet-a nepyeiya narai boko raꞌa vai.
Keta nepyeiya narai po mataimon Jerusalem.
34 “O Jerusalem!
O Jerusalem!
Momu inyia profet-a komyei keviri ta inyia topa komprume komyei aro voro God-a kasalim yei kekape pimu.
Taim mowmow eno kana tarara naniy mevova momu,
ke nerekeri minyiao veka rukoko moꞌo,
kokoru tare meꞌe vou.
Ta inyia kerekeri paraparako iu aotaku vou.
Ta momu via omeremow revo!
35 Pirike!
Mare oꞌro momu keta notaipo ya nuinyia kanapon.
Kanairainopu,
mopu via ke nopupirikena vova vai,
keta nopirai veka,
‘God-a,
ta naraoroa revo bia ero kakai row awoꞌo ya Biapako.’ ” d