Ova nopu kinao ke pasin yei Farisi via orao iu awirai yei
(Matyu 10.26-33)
12
Taim ve aro bombiam tausen-a kekape kyiopoke ta bo kotiki ya ovu kom-a keropi tatai yei veku.
Ta Yesus-a a va kairai roiy disaipel yaꞌa veka,
“Mopu keta noporepapiu revo row yis yei Farisi.
Yis yei Farisi ero,
ero pasin yei via orao iu minyiao awirai yei.
2 Ao prumo kerinyia roki,
God-a keta narao nerekare vatiron.
Awirai prumo kyirai roki,
God-a keta narao beiyo neyarare.
3 Korao veka ta awirai bekaipe kopirai roro,
keta umo ya nerivo.
Kopei awirai bekaipe kopu romerome oꞌro aꞌari,
keta neropi taw oꞌro nake ya nyirirai poiy aro bombiam.”
Beiyo keta neriri poa God unake
(Matyu 10.28-31)
4 Ya Yesus-a kairai roiy vova veka,
“Kanairainopu aro kura nena,
via nopuriri poiy beiyo epyei beiyo eviri ero.a
Ero korao veka,
via kuinyia iu ao va raꞌa nepao vova vai.
5 Kopei nena,
bio ve keta naniritapu keta nopuriri poa revo.
Keta nopuriri poa bio voro kupuana kuinyia iya ke beiyo va nayei neviri ya navereverei neparo hel.
Awakai!
Kanairainopu,
keta nopuriri poa.
6 Mopu kopuyarau veka,
ruꞌu mememe 5-pla kepere kerinyia maket ke beiyo va neko po 2-toea kanapo.
Kopei ya God,
via ova onaparaka row moike moike yei vai?
7 God-a chapeꞌe koka mopu kairinare ya kayarare ven.
Korao veka ta mopu via kuinyia iu nopuriri vai,
mopu kopaviare ruꞌu mememe mowmow.
Via reka noyomi row pa nemikeiya Yesus
(Matyu 10.32-33; 12.23; 10.19-20)
8 “Kanairainopu,
bio nairai roiy aro bombiam veka kakei ina,
bia ero Ma ya Bio minyiao keta nairai roiy ensel ya God veka bia ero kakei ina.
9 Kopei bo bio nairai roiy aro bombiam veka,
yaꞌa via raꞌa yei aro nena,
bia ero nena minyiao via kuinyia iu nanairai noiy ensel ya God veka kakei ina.
10 Kopei bio poko taipo nairairoa Ma yaꞌa Beiyo,
God-a sin yaꞌa keta napereo.
Kopei bio poko taipo nairairoa Holi Spirit,
God-a via kuinyia iu sin yaꞌa napereoki.
11 “Bo neko mopu nonopi oꞌro lotu ya noropi iꞌiy ine yei hetman awei gavana,
via nopu okoku pow awirai bekaipe nopiraikipe poiy o awirai bekaipe nopirai.
12 Taim evo,
Holi Spirit yaꞌa veku keta nariritapu row awirai bekaipe nopirai.”
To piksa ya bio ao prumo kuinyia iya
13 Bia raꞌa karoi romoiy aro bombiam prumo ya kairai roa Yesus veka,
“Ma Tikse,
nena kanerenoma namairai moa raꞌai nena ao yaꞌa aka mepi nawani koraꞌa riepin.
Koraꞌa yaꞌa,
koraꞌa nena.”
14 Ya Yesus-a kairaikire roa veka,
“Bokoko!
To nape kairai nakeni veka jas ta bia vou ao va nanawani nopu riepin?”
15 Ya kairai roiy aro bombiam prumo veka,
“Mopu ova nopu kinao ke!
Mopu via ao mowmow nopu popoiye revo ke nopuko.
Bo ao mowmow nopuna,
ao mowmow en via kuinyia iu norao nokepi revo.”
16 Ya Yesus-a aꞌai-ya raꞌa karariroiy veka,
“Beiyo raꞌa ao prumo va nau ketao koka kuinyia iya.
Meꞌri yaꞌa ao va akai-ya kereave revo kere prumo.
17 Ya bia emo yaꞌa veku ova kakinaoko veka,
‘To keta arape nanao?
Bo vou aokorom-a nanaopokeke kowaun rena.’
18 “Ya kairai veka,
‘Keta nanao veka,
oꞌro aokorom nena ta nanapereuki ya anaꞌnaiki po tare nanarira.
Ke nuinyiaiu revo ao va nau aokorom nena nanaopokere minyiao aꞌari.
19 Nena veku keta nanairai varu veka,
“Mema ao prumo kerinyia ima konoi kuinyia iu ainini mowmow.
Mema keta nakemi toropo aokorom-a nama pii va namaton ya mema veku oꞌto notema.” ’
20 “Kopei God-a kairai roa veka,
‘Mema bia ruru kowaun rema!
Mare roro vo ta narami.
To nape keta ao mema amere ero naruna?’
21 “Ao veka keta nokai roiy minyiao beiyo voro ao prumo kyiopokeke iꞌiy yei veku.
Kopei ao en via kuinyia iu norao neneman iu ine ya God vai.”
Mopu viake nopuriri
(Matyu 6.25-33)
22 Ya Yesus-a kairai roiy disaipel yaꞌa veka,
“Kanairainopu,
mopu viake nopu okoku pow revo laip mopu,
ke nopirai,
to aokorom arape keta nopa,
o reka mopu awarape ta nopikokope papiu.
23 Laip via ao vou aokorom vai,
kopei reka kotawo noreka.
24 Kopu pirikei aroi,
erora via epao o aokorom-a yiopokeke.
Ta oꞌro vou aokorom-a nyiopokeke kowaunrei,
ta ya God-a aokorom-a inyia karoiy.
Ta mopu aro bombiam kopu tawoi ruꞌu.
25 Bo raꞌa mopu naokoku row ao voro,
kopei ao voro via kuinyia iu norao nakei tare mentan mentan vova vai.
Boun ben!
26 Bo ao mentanaka evo mopu via kuinyia iu nopao,
to kopei korao vekaipe ta ao mowmow ve inyia kopu okoku pore revo?
27 “Nopu pirikere plaua,
inyia kerekore bo pako va via ererao ta no va via ere imime vai.
Kanairainopu,
King Solomon noreka neman-a inyia karikokore.
Kopei ti rere plaua kere kotawo noreka yaꞌa.
28 Pirimakao ve mare kerinyia,
kopei uri keta netaorao ya neverevereki nokoi taw aiyerao.
Pirimakao kanapo veka,
God-a karao ti kere bribriri veka noreka rere.
Korao veka ta mopu beiyo bilip mentanaka po kuinyia ipu,
ta nopu yarau veka,
God-a inyia noreka karopu minyiao.
29 Mopu via nopu okoku po arape noporenao ke nopa o arape noputon.
30 Aro bombiam via ebilip pova Biapako,
kekepi ta inyia keokoku po ao en nyiorenanare.
Aka mopu kayarau ven ao voro keta nopuna ero.
31 Korao veka ta God-a noperia nakei veka king mopu.
Ta yaꞌa kuinyia iu narin ao mowmow ve nerekare ropu.”
Rara vou ao neman-a nemorenao
(Matyu 6.19-21)
32 Yesus-a kairai vova veka,
“Mopu sipsip moimoi,
via nopuriri,
ku vou korao veka,
Aka mopu ova korova ta kingdom yaꞌa karopu.
33 Ao mopu nopu salim rere ya ketao va nopuko pore ao mopu.
Ya nopoiy beiyo ao va owaunrei ero.
Paus vou ketao via kuinyia iu notaipo po nopuna.
Ya ao neman neman erinyia heven po nopokere.
Heven,
bia raꞌa via kuinyia iu aokakana narao vai,
ta ao mememe veka umoi via ke ao va nereyoro vai.
34 Bo voro ao neman mopu erinyia ero,
keta oꞌo mopu minyiao keta nuinyia bo voro.”
Wokboi neman keta nekepi ova nekinao
(Matyu 24.42-44)
35 Yesus-a kairai vova veka,
“Noreka mopu nopu veveteko,
let-a noputi,
lam-a nopuri ya nokepi nopu redi.
36 Ya nokepi ova nopu kinao veka wokboi-ya kekepikeiya bia beiy yei.
Bia beiy yei kanoi iya bia raꞌa om-a kako ta aokorom pako karao.
Ya kopei bo nakai varu kamo va nakirikiri,
bererenki kamo va ta nepuri poa.
37 Yei wokboi kuinyia iu oꞌto notei taim bia beiy yei nakai napirikei veka via evovo.
Awakai-ya kanairai nopu,
keta bia beiy ve no naku ya nairai roiy nekepi tebol ya aokorom-a naive roiy.b
38 Kopei bo bia beiy yei nyieko nopanaki ya nakai o rukoko namba wan-a nyiororo ya nakai,
ta via apirikei veka evovo,
aro ve keta oꞌto va notei.
39 “Ta mopu awirai ve ova nopu kinao po revo.
Bo aka vou oꞌro taim bekaipe keta bia aokakana va nakai nayarau,
via kuinyia iu narin bia aokakana oꞌro va neyapereu.
40 Mopu minyiao ova nopu kinao ke.
Ma ya Bio minyiao ta narokorapu taim kopitoro veka via kuinyia iu nararo.”
To piksa ya wokboi neman eri wokboi taipo
(Matyu 24.45-51)
41 Kopei Cha Pita katere roa Yesus veka,
“Biapako,
aꞌai-ya kamari momi unake o aro bombiam koka minyiao?”
42 Ya Biapako kairai roa veka,
“Bia nape ruru awakai-ya nuinyia iya keta bo yaꞌa narao noneman?
Bia veka bia beiy keta namompe yaꞌa nanoi roiy wokboi-ya cha.
Ya kopei taim vou aokorom,
keta aokorom-a naroiy.
43 Bia emo keta ova norova taim bia beiy-a nakai bo yaꞌa napirike.
44 Awakai-ya kanairai nopu,
wokboi emo bia beiy yaꞌa keta nairai roa nanoi cha ao mowmow yaꞌa naorerariu.
45 Kopei wokboi emo,
yaꞌa veku kairai varu veka,
‘Bia beiy nena via kuinyia iu nakai bereren vai.’
Ya wokboi ve aokorom-a kara pii va katon kaspak ya wokboi awere wokmeri ovu kayei.
46 Kopei taim ya bia beiy em nakai varu,
wokboi emo karitoro veka via kuinyia iu nakai vai.
Bia beiy ve keta naoroaka koraꞌa riepin ya nairai roa nanoi iꞌiy aro voro via ebilip.
47 “Wokboi-ya kayarau ven awarape bia beiy yaꞌa karererow ero.
Ta via bo araoroa veka airai roa.
Bia emo keta nayeiya revo.
48 Kopei bo wokboi emo via nayarau revo awarape bia beiy yaꞌa arererow ero ta ao taipetaipe po nararerare,
wokboi emo via kuinyia iu nepyeiya revo.
Beiyo ao prumo God-a nariy,
keta kopei ao prumo neupoa varu God.
Bo bia raꞌa ao prumo beiyo va neupoa nuinyia eno peꞌe yaꞌa,
bia emo keta ao prumo vova neterepoa naroiy varu.”
Yesus-a kararo ke aro bombiam-a nawetari tintin
(Matyu 10.34-36)
49 Yesus-a kairai vova veka,
“Nena kakane ke aiyerao va nanere meꞌri ve,
ta kanerenow revo veka aiyerao va koviriri ven.
50 Nena keta baptais-a raꞌa nanako.c
Ta baunke via anako vai,
ta riꞌi nena konai revo ya mare ta nonoi nuinyia iu taim nanako.
51 Era kopitoro veka nena kakane ke roma mopu opao meꞌri ve nanaoroki vai?
Bauni!
Kanairainopu,
nena kakane ke aro bombiam-a nanawetari.
52 Mare ta inyia nonoi beiyo 5-pla kekepi minyiao oꞌro moikera ro keta nyiawetari nekepi koraꞌa riepin.
Beiyo 3-pla keta ine nepei trotropu beiyo riepin,
kopei beiyo riepin keta ine nepei trotropu beiyo 3-pla.
53 Keta nyiawetari kora kora,
ta yei aka keta meꞌe biam yei ine nepei trotropu,
kopei yei meꞌe biam minyiao keta aka yei ine nepei trotropu.
Rere moꞌo minyiao keta ine va nerei trotroru rire meꞌe bom rere,
kopei meꞌe bom rere minyiao keta ine va nerei trotroru rire moꞌo rere.
Korao veka ta oꞌoro tora keta ine noru trotroru oꞌoro tare,
kopei oꞌoro tare vou minyiao keta ine noru trotroru oꞌoro tora.”
Taim-a nopu save rere
(Matyu 16.2-3)
54 Ya Yesus-a kairai roiy aro bombiam mowmow veka,
“Taim uteno nopupirike para umo raro,
ya bererenki kopirai veka,
‘Aꞌ va keta noai,’
ya aꞌ va koai.
55 Taim puꞌu va noputu nokai saut,
ya kopirai veka,
‘Bo va keta noim,’
ya bo va koim.
56 Mopu aro roporere!
Mopu ao vou meꞌri va nau uteno kopu yarare revo.
To korao vekaipe ta mopu veku via ao va opu yarare inyia erekare taim evo?”
Kura namaivia bia ero kot-a karake neremarao ero
(Matyu 5.25-26)
57 Ya Yesus-a kairai vova veka,
“To korao vekaipe ta mopu veku via pasin niniu opu yarau ke nopute pow?
58 Bo bio raꞌa kot-a neremarao ta baunke inyia korupute korupu nopi rara,
keta awirai vou riꞌi mariri namairai moa nainai.
Bo nowaun,
keta narainyiama nanomi miya jas.
Ta kopei jas-a nairai roiy manro va nyiavema neparai roki nakemi kalabus.
59 Kanairai noma,
ta nakemi roki kalabus nonoi nuinyia iu taim voro ketao veka kemompe poma ero namoa varu bia ero.”