Bia bom raꞌa am-a karai reu ofa koroa God
(Mak 12.41-44)
21
Taim Yesus-a ine kaureki,
kapirikei aro ketao koka uinyia iꞌiy inyia ofa kepikorovo koraro bokis vou ketaoa kuinyia tempel.
2 Ya kapirikeo bia bom mirarao raꞌa am-a karai reu ven.
Konoi ketao mentanaka riepin po korikorovo bokis vou ketao.
3 Ya kairai roiy veka,
“Awakai-ya kanairai nopu,
bia bom mirarao vo,
ketao va korikorovo kotawoi aro bombiam mowmow.
4 Aro bombiam mowmow ve ketao koka uinyia iꞌiy ero,
ofa yei koraꞌa mentanaka po keparaiyo.
Ta bia bom mirarao vo,
ao mowmow vou noavo nokei ero,
ya koraraiyo nau.”
Ao maramara keta noriritao taim vou las de
(Matyu 24.1-2; Mak 13.1-2)
5 Kopei aro ovu tempel-a kepirike ya kyirai veka,
“Topa neman-a kyiriri ta ao neman ovu yei aro bombiam-a kepoa God veka ofa,
ya tempel-a kyioropao.”
6 Ya kopei Yesus-a kairai roiy veka,
“Kanairainopu ao voro mare inyia opu pirikere ero,
taim raꞌa keta nokai,
via kuinyia iu nepin topa raꞌa nuinyia taw topab raꞌa vai.
Bauni.
Keta nevereꞌvere nereraro pika.”
Yesus-a kairai nai mowmow keta nere kamap
(Matyu 24.3-14; Mak 13.3-13)
7 Ya ketere poa Yesus-a veka,
“Ma Tikse,
to taim bekaipe keta ao en nerekare?
To ao arape keta noriritao veka ya kokai kakuke,
ke ao voro nerekare?”
8 Ya Yesus-a kairai roiy veka,
“O nopu kinao ke,
aro ovu via neropopepu.
Aro mowmow keta nekape awoꞌo nena ya nyirai veka,
‘Nena bia emo,’
ya ‘Taim-a kokai kakuke.’
Aro veka via pa nopikei.
9 Taim awirai vou roma pako nau awirai yei beiyo roma kepaopiya gavman nopurivo,
via nopuriri vai.
Ao en ta nerekare cha vo,
kopei las de,
via kuinyia iu nokaika bereren vai.”
10 Ya kairai roiy veka,
“Kantri ovu keta roma nepao warapoiy kantri raꞌa.
Kingdom raꞌa keta roma nepao warapoiy kingdom raꞌa.
11 Maiyeni ipipo keta neyerere.
Boko ovu keta aokorom-a nowaunrei ya a ipipo noraie.
Ao en ta norereka rorore boko mowmow.
Uteno nake keta mak ipipo nopupirikere nau ao mara keta nererao nopuriri.
12 “Ao mowmow en keta nerekare paire,
tija vou,
keta nyiavepu nepao popu toro voꞌo.
Kot-a keta nepepupao oꞌro lotu aꞌari,
ya nyiavepu neparai roki kalabus.
Keta neko mopu nonopi noropi iꞌiy ine yei king awei gavana ya ao en nepao popu.
Ero korao veka,
mopu inyia pa kopikena.
13 Ao en ta nerinyia veka rara mopu,
ke kuinyia iu awirai neman ya God-a nopiraipoiy.
14 Ta via ova nopu kinao po awirai bekaipe nopiraipoiy vai.
15 Ku vou korao veka,
nena veku keta ruru awakai-ya nau awirai-ya nanopu.
Kopei aro voro kepake kot-a nepepupao,
via kuinyia iu awirai mopu netawo o awirai mopu nepyevope vai.
16 Yei akamoꞌo mopu,
aro raꞌai mopu,
aro noꞌo mopu awei kura mopu,
keta neko mopu ya nepoiy eno yei aro ine epepu trotropu.
Ovu mopu keta nepyei neviri.
17 Aro mowmow keta nyioniy pepu,
ero korao veka,
mopu inyia pa kopikena.
18 Ta chapeꞌe moikera via kuinyia iu noparatao norei roki vai.c
19 Mopu keta noropi kupuana ya laip voro uinyia toratora nopuko.
Yesus-a kairai mataimon Jerusalem keta nobagarap nau
(Matyu 24.15-21; Mak 13.14-19)
20 “Taim nopupirikei soldia iri nyiape pariu mataimon Jerusalem,
ya kopu yarau veka taim yei kepake mataimon Jerusalem-a nechori ya inyia kokai kakuke.
21 Taim evo yei aro ekepi distrik Judia keta nepraprara nekope tou nake.
Yei aro ekepi mataimon aꞌari keta nepraprara nenopi upuo.
Kopei yei aro ekepi upuo,
via kuinyia iu nenopi mataimon aꞌari.
22 Ku vou korao veka,
ero taim ya God-a kopei nai-ya naroiy varu veka awirai-ya kepeꞌe kuinyia buk ya God.
Ao en ta akai-ya noraonao.
23 Mererare revo aro bom riꞌi va ereyoma ta rere aro bom toꞌo va inyia ere roiy meꞌe.
Ao taipetaipe akai keta nokamap row meꞌri ve,
ta God-a ova keta neiya roro roiy aro bombiam.
24 Yei aro ine epei trotropu,
keta bainat-a nepyei neviri.
Ovu yei keta neko yei nenopi nekalabus kantri mowmow vou meꞌri ve.
Yei aro via yiave Juda,
keta nyiorepariu mataimon Jerusalem ya nenyiapakiri nonoi nuinyia iu taim voro God-a kamompe ya nowaunki nau.”
Ma ya Bio keta nararo
(Matyu 24.29-31; Mak 13.24-27)
25 Yesus-a kairai vova veka,
“Keta mak mara nopupirikere nerekamap roa umo,
ura awere kaumo.
Aro bombiam vou meꞌri ve keta neriri toro ta via kuinyia iu ao va raꞌa nepao vai,
taim nerivo naomo naomo ipipo nere pururei.
26 Aro bombiam mowmow keta neririko toro ya ine nerei rorokeki ya ova nekinakinao pow arape keta norao row meꞌri ve.
Ero korao veka,
ao kupuana mowmow vou uteno keta neiyerere po.
27 Ya kopei taim evo keta aro bombiam-a nepirike Ma ya Bio nararo uteno nau kupuana nau lait pako yaꞌa.
28 Taim ao en nerekare,
keta nopu vereko noropi nake,
cha nopu topanko.
Ku vou korao veka,
taim ya God-a nako mopu varu ya inyia kokai kakuke.”
To piksa vou aꞌai fik
(Matyu 24.32-35; Mak 13.28-31)
29 Ya Yesus-a aꞌai-ya raꞌa karariroiy veka,
“Aꞌai fik ve nopupirike awere aꞌai ovu.
30 Taim peꞌe va nere marao,
ya kopu yarau veka taim ya umo va naviriri ya kokai kaku.
31 Korao veka ta,
taim nopupirike ao en nerekare,
ya kopu yarau veka kingdom ya God-a ya inyia kokai kaku.
32 “Awakai-ya kanairai nopu,
yei aro bombiam taim mare vo,
via kuinyia iu neviri.
Ao mowmow en keta nepirikere vo ya kopei neviri.
33 Meꞌri va nau uteno keta nerenopi nere waunki nau,
kopei awirai nena via kuinyia iu nowaunki vai.”
Disaipel-a keta ova nekinao ke
34 “Ova nopu kinao ke,
awenari nai-ya nokai ipu.
Via pii kupuana va noputon ke nopu spak ya pasin taipo va nopao vai.
Ta via nopu okoku pore ao mowmow vou meꞌri ve.
Bo nopao veka,
de voro keta norokorapu veka trep-a aomeꞌe koavei.
35 Korao veka ta ova nopu kinao ke,
ao en ta norokoraiy aro bombiam mowmow ekepi meꞌri ve.
36 Umumoka nokepi ova nopu kinao ya beten-a nopao poa God,
ke kupuana naropu.
Ke ao mara kererake nere kamap ropu,
kuinyia iu nopaviare.
Ya kuinyia iu noropi iu ine ya Ma ya Bio.”