Cha Judas ova korova ke Yesus-a naroiy eno yei ke nepyeiya narai
(Matyu 26.1-5,14-16; Mak 14.1,2,10,11; Jon 11.45-53)
22
Taim evo,
evo taim vou Aokorom Pako vou Beret-a Yis-a Kowauna keipinao Pasova,
ya inyia kokai kakuke.
2 Yei bikpris awei saveman vou lo rara va kyiorenao ke Yesus-a nepyeiya narai,
to keriri poiy aro bombiam keta roma nepao piy.
3 Ya Satan-a karikorow raꞌa yei disaipel 12-pla ya Yesus.
Awoꞌo yaꞌa Cha Judas,
awoꞌo raꞌa yaꞌa keipinao Cha Iskariot.
4 Ya Cha Judas kanoi iꞌiy bikpris awei manro yiorepariu tempel awei to va kairai minyiao ke rara bekaipe Yesus-a naroiy.
5 Ta yei bikpris awei manro ova koroꞌoi ya to va kyirai minyiao ke ketao va neupoa.
6 Cha Judas a va kairai iꞌiy minyiao ven ya rara va inyia kaorenao ke Yesus-a naroiy.
Taim aro bombiam mowmow via nekepi piy.
Disaipel riepin aokorom-a keraipao
(Matyu 26.17-25; Mak 14.12-21; Jon 13.21-30)
7 Ya De vou Beret-a Yis-a Kowaun korereka.
Taim evo,
sipsip ma moikera keta nepyeu ofa nepao ya nepa.
8 Yesus-a kairai roa Cha Pita eri Cha Jon nerai nopi,
ya kairai roiy veka,
“Norunopi aokorom vou Pasova norupao kemi ke nema.”
9 Kopei keraitere poa,
“To bo bekaipe kameremopi aokorom-a nepipao?”
10 Kopei kairaikireroiy veka,
“Taim norunopi mataimon pako,
bia raꞌa keta pii uro va poiy nakai navakakepu.
Oꞌro voro karake nanoi aꞌari,
keta pa nopikeiya nonopi pova aꞌari.
11 “Ya norupirai poa aka vou oꞌro va veka,
‘Tikse va katere roma veka,
“To rum bekaipe ke awei disaipel nena kuinyia iu aokorom vou Pasova nema?” ’
12 Keta aka vou oꞌro voro nairai ropu veka,
‘Rum pako raꞌa kuinyia nake.
Rum ve,
tebol-a nau ao va kerinyia.
Ya rum voro aokorom-a norupao.’ ”
13 Kerainopi ya keraipirike ao mowmow Yesus-a airairoiy ero,
ya aokorom vou Pasova keraipao.
Yesus-a beret-a nau wain-a karoiy aposel
(Matyu 26.26-30; Mak 14.22-26; 1 Korin 11.23-25)
14 Taim vou aokorom-a nepa kokai ven kakuke,
ta Yesus-a awei aposel-a kekape kekepi ke aokorom-a nepa.
15 Ya Yesus-a kairai roiy veka,
“Nena kanerenow revo Pasova nananipu vo,
ya kopei nai-ya nana poi.
16 Kanairainopu,
nena via kuinyia iu Pasova nana vova,b
ta nuinyia taim ao en noraonao iu revo kingdom ya God.”
17 Kap wain-a kako ya oꞌti kaoroa God,
ya kairai,
“Ao en nopuko ya nopu wani nonoi ropu.
18 Kanairainopu,
viake wain-a nanaton vova,
keta nuinyia taim kingdom ya God-a nokai.”
19 Ya beret-a raꞌa kako,
oꞌti kaoroa God ya kawetari ya kawani roiy.
Ya kairai roiy vova veka,
“Emo reka nena,
kanopu ke noelpim mopu.
Keta nopao veka,
ke ova nopu kinao pona.”
20 Taim aokorom-a kepa ven,
kap wain-a kako ya ao veka karao row beret tare karao ya kairai veka,
“Kap emo,
emo kontrak tarec vou noꞌo nena,
kowere ke noelpim mopu.
21 Nopurivo!
Bia ero keta nako nena naroiy eno yei aro taipo,
mare kakei ina tebol.
22 Ma ya Bio keta naute row rara voro tija God-a yaꞌa veku kairai ero.
Mereraka revo rova bia ero karake nako ya Yesus-a nanoi iꞌiy eno yei aro taipo.”
23 Kopei yei aposel veku inyia aotere kepao veka,
“To bia nape keta ao en narao?”
Aposel-a ketovetove bia nape keta nanoi roiy cha
24 Ta yei veku ketovetove bia nape nanoi roiy cha.
25 Ya Yesus-a kairai roiy,
“King yei aro via yiave Juda,
kekupuana revo ta kyiorepariy aro yei.
Ta yei aro epei kepi roko,
keipinai veka aro pasin neman-a kepao poiy.
26 Ta mopu via nopao veka vai.
Bio karake nanoi ropu cha nave bia beiy,
keta nave bia kanapo.
Bio naoreraripu,
keta nave bio bo arao ropu.
27 To bia nape kave bia beiy?
Era bia kakei tebol,
o bia ero aokorom-a kaive?d
Bia ero aokorom-a kara kabeiy.
Ta nena kaken romopu kanave bia bo arao ropu.
28 Taim ao va kerekare kere traim nena,
mopu inyia koropi ina.
29 Aka nena kingdom yaꞌa karona,
ta nena minyiao kingdom ve kanopu.
30 Keta nokepi tebol aokorom-a nopa iu kingdom nena.
Ya nokepi tatao sia neman neman,
ke kot-a nopurivo poiy aro 12-pla yei Israel.”
Yesus-a kairai veka Cha Pita keta natereriya
(Matyu 26.31-35; Mak 14.27-31; Jon 13.36-38)
31 Ya Yesus-a kairai roa Cha Pita veka,
“Ma Saimon,
Ma Saimon,
namarivo!
Satan-a katere roa God,
karake bilip mopu nataraim veka beiyo wit-a inyia kerovoru ke aomo rere nere pupuꞌpu.e
32 Ta nena beten-a kanaonoma ven ke bilip mema via kuinyia iu norei.
Ya kopei taim nakame varu,
nama pirikei aro raꞌai mema ya namalpim yei ke neropi kupuana.”
33 Kopei Cha Pita kairaikire roa veka,
“Biapako,
nena kaken po,
keta nanoni noma kalabus o narani.”
34 Ya Yesus-a kairai roa veka,
“Kanairai noma,
Ma Pita,
mare roro vo,
rukoko baunke via aororo,
ta namairai 3-pla taim veka kama roivinana.”
Yesus-a kairai roiy aposel keta ekoko nau bainat ta ketao va neko minyiao
35 Ya Yesus-a kairai roiy veka,
“Taim nanairai nopu nonopi,
ao veka ketao,
ekoko va nau kanro via nopuko.
Era taim voro ao raꞌa kowaun repu vai?”
Ta kyirai poa veka,
“Boun!”
36 Ya Yesus-a kairai roiy vova veka,
“Kopei mare,
bo paus vou ketao va nuinyia ima,
keta namako.
Keta ekoko va namaiti minyiao.
Bo bainat-a nowaun rema,
keta no mema nama salim ya bainat-a raꞌa namako.
37 Awirai-ya kepeꞌe kuinyia buk ya God-a kuirai veka,
‘Aro bombiam-a kepirikeiya veka,
via lo va aroi iu vai.’
Kanairainopu,
yei aro bombiam-a keta pasin em nepao pona.
Awirai ve kepepeꞌe pona kuinyia buk ya God,
ta noraonao.” f
38 Kopei aposel-a kyirai poa,
“Pirike,
Biapako,
bainat riepin-a ve.”
Ta Yesus-a kairai roiy,
“Ero kuinyia iu ke.”
Yesus-a kakei beten-a karao tou Oliv
(Matyu 26.36-46; Mak 14.32-42)
39 Ya Yesus-a mataimon-a karereo ya kakoi tou Oliv.
Kakoi veka inyia kararao,
ya disaipel-a pa kepekeiya.
40 Ya kakoi karoiko boko ve,
ya kairai roiy veka,
“Beten-a inyia nopao ke via norepi rovope sin”
41 Ya karerei kanoiki rarapa kuinyia iu mak vou topa nepurupi.
Ya boratapo katureriyo ya beten-a karao veka,
42 “Ma Tata,
bo nameremow,
ta kapg emo namakoki mena.
Via nameremow mina vai,
baun.
Mema veku pa namikeo awarape kameremow.”
43 Ensel raꞌa vou heven-a kararo iya,
ya kupuana kaoroa.
44 Riꞌi ya Yesus-a konai revo,
ta beten-a tare karao vova ke.
Bene yaꞌa korao veka noꞌo kotiro koraro meꞌri.
45 Taim beten-a karao ven ya kavariko kanoi iꞌiy varu disaipel,
ta kapirikei kevovo.
Ku vou korao veka,
riꞌi va korei nai revo.
46 Ta kairai roiy,
“To korao vekaipe ta kopuvovopu?
Nopu vereko beten-a nopao awenari traim-a nokai ipu ke norepi.”
Aro taipo keko ya Yesus
(Matyu 26.47-56; Mak 14.43-50; Jon 18.3-11)
47 A va baunke inyia kairai iꞌiy disaipel,
raꞌa yei disaipel 12-pla awoꞌo ya Cha Judas kakai roiy cha,
rara va kariritai aro bombiam koka.
Kakai kakuke iya Yesus ke iri neiya kirikiri.
48 Ta Yesus-a katere roa veka,
“Ma Judas,
to kamake iri nemia kirikiri miya Ma ya Bio vai,
ya rara vevo po,
kameriakime moiy eno yei aro taipo vai?”
49 Taim disaipel-a ao en kepirike ya kyirai poa Yesus,
“Biapako,
to era bainat-a nemyei neviri vai?”
50 Raꞌa yei disaipel ero,
bainat-a kayeiya wokboi ya hetpris vou tempel.
Ta teve awakai yaꞌa ero,
bainat-a keiyauro keiya pokum.
51 Ya Yesus-a kairai roiy veka,
“Yauke!
Mopu via ke ao en nopao vova.”
Ya teve ya bia emo keiyavo ya keiya poroke ya koneman varu.
52 Ya Yesus-a kairai roiy bikpris awei manro yiorepariu tempel awei aro ipipo kekape ke neko yaꞌa,
“Bainat-a nau titi va kopuna kokape kopake bia aokakana raꞌa nopaivia vai?
53 Umumoka inyia kakeni nipu tempel aꞌari,
ta mopu via ao va raꞌa opao pona vai.
Kopei mare ero taim mopu,
kupuana vou roro kopako revo.”
Cha Pita kairai karoivinaka Yesus
(Matyu 26.69-75; Mak 14.66-72; Jon 18.25-27)
54 Ya Yesus-a kyiaivia ya keko yaꞌa kanoi oꞌro ya hetpris vou tempel.
Ta Cha Pita inyia kaute pa va karikei.
Kaute rarapa mentan mentan.
55 Ya aiyerao va kepere reiy aꞌari ya kekepi pow ta Cha Pita yaꞌa minyiao kakei iꞌiy.
56 Taim wokmeri raꞌa kopirikeiya kakei kakuke iu aiyerao,
kowarakaki,
ya kuirai roiy veka,
“Bia emo yaꞌa minyiao kakei iya Yesus.”
57 Ta Cha Pita katereriu,
“Bia ero nena kana roivinaka ke.”
58 Kekepiki mentan mentan,
bia raꞌa vova kapirikeiya ta kairai roa veka,
“Mema raꞌa yei.”
Kopei Cha Pita kairaikire roa veka,
“Nena baun.”
59 Kopei aua raꞌa kovevenki,
bia raꞌa vova kairai,
“Awakai-ya kanairai nopu,
bia emo inyia kakei iya.
Bia emo yaꞌa Galili.”
60 Ta Cha Pita kairaikire roa veka,
“Nena awirai voro amairai ero,
kana roivinao.”
Bounke a va kairai,
bererenki rukoko kauroro.
61 Biapako karovoruka kapirikeiya Cha Pita,
ya ova kakinaoko row awirai Biapako airai roa ato ro.
“Taim rukoko baunke via aororo,
ta namairai 3-pla taim veka kama roivinana.”
62 Cha Pita awirai ve kakinaoko ya kanoiki upuo ya aoro koka karo.
A va kyiavo poa Yesus ya kepyeiya
(Matyu 26.67,68; Mak 14.65; Jon 18.22,23)
63 Ta yei aro kyiaivia Yesus kevereko a va kyiavo poa ya kepyeiya.
64 Ya no koraꞌa va kepiapo nau ine ya kyirai poa veka,
“Bo mema profet namairai momi,
bia nape kaiyema?”
65 Poko taipetaipe mowmow mara kyirai poa.
Kot-a kepiapao Yesus iu ine yei kansol
(Matyu 26.59-66; Mak 14.55-64; Jon 18.19-24)
66 Roronai ke,
hetman yei aro bombiam-a kekape kyiopoke.
Yei bikpris awei saveman vou lo,
yei minyiao kekape kyiopoke ya keko ya Yesus-a kakai karoi iꞌiy ine yei.
67 Ta kyirai poa veka,
“Bo mema Krais,
namairai momi revo.”
Kopei Yesus-a kairaikireroiy veka,
“Bo nanairai nopu,
awirai ve nena via kuinyia iu nopubilip.
68 Bo awirai ovu nanatere nopu,
mopu minyiao via kuinyia iu nopiraipona.
69 Mare to kokai paire,
Ma ya Bio keta nakei iu eno awakai ya God,
kupuana pako kuinyia iya.” h
70 Ta aro mowmow ketere poa veka,
“Era mema veku Ma Biam ya God?”
Kopei kairaikireroiy veka,
“Awirai yauke voro mopu veku kopirai ero.”
71 Ya kyirai veka,
“Viake aro va neimiy nekape pasin ya bia emo nyirai pomi vai?
Awirai yauke vere yaꞌa veku kairai romi row roꞌo yaꞌa ta kemi rivo ven va.”