Salmo 135
1 Ḻi weꞌlaꞌo X̱ancho Chiozaꞌ.
Ḻi weꞌlaꞌwee,
leꞌ ba wlejeꞌ kwenc̱he kooleneꞌ balaaṉ,
2 leꞌ lleꞌle ḻoo lill xḻatj X̱ancho Chiozaꞌ
naꞌ leshꞌ lill xḻatjeꞌnaꞌ.
3 Ḻi weꞌlaꞌo X̱ancho Chiozaꞌ daa nakeꞌ beṉꞌ wen;
ḻi goḻ to dii koon ḻeꞌ balaaṉ,
daa nakeꞌ beṉꞌ wen beṉꞌ shaoꞌ.
4 Ḻaꞌ ḻeꞌ wlejeꞌ xiiṉ dia c̱he dii Jacobaꞌ,
beṉꞌkaꞌ nak beṉꞌ Israel,
kwenc̱he gakgakeꞌ yell c̱heꞌ.
5 Nadꞌ ṉezyeṉidꞌ X̱ancho Chiozaꞌ nakeꞌ beṉꞌ choo beṉꞌ xen;
beṉꞌ choo beṉꞌ xench nakeꞌ aga ka yogꞌ chioskaꞌ nx̱enilallꞌ beṉꞌ.
6 X̱ancho Chiozaꞌ choneꞌ daa cheenileꞌ
yabanaꞌ naꞌ lo yell-lioni,
ḻoo nisdoꞌnaꞌ naꞌ ax̱t ganaꞌ zeelo zitj.
7 Ḻenꞌ chizieꞌ bejkaꞌ doxen zbii zkaaṉ yell-lioni,
naꞌ choneꞌ kwenc̱he chep yes naꞌ chyix̱jeen gak yejaꞌ,
naꞌ chbejeꞌ beꞌnaꞌ ganaꞌ ngooshaween.
8 Ḻenꞌ beteꞌ yogꞌḻoḻ xiiṉ nech beṉꞌ Egíptokaꞌ
naꞌ yogꞌḻoḻ xiiṉ nech bayix̱ꞌ c̱heꞌkaꞌ.
9 Naꞌ bseḻee yeḻꞌ zakꞌziꞌkaꞌ yell Egíptonaꞌ daa ben ka bibangakileꞌ,
kwenc̱he bsakꞌziꞌe faraónnaꞌ len beṉꞌkaꞌ chon xshineꞌnaꞌ.
10 Blliayee yell zan,
naꞌ beteꞌ beṉꞌ wṉabiaꞌ xenkaꞌ.
11 Beteꞌ Sehónnaꞌ,
beṉꞌ wṉabiaꞌ c̱he beṉꞌ amorreokaꞌ,
naꞌ Ogaꞌ,
beṉꞌ wṉabiaꞌ c̱he ganaꞌ mbani Basánnaꞌ,
naꞌ yogꞌte beṉꞌ wṉabiaꞌkaꞌ wzoa yell-lio Canaánnaꞌ.
12 Naꞌ biꞌe beṉꞌ Israelkaꞌ,
beṉꞌkaꞌ nak yell c̱heꞌ,
yell-lio daa goki c̱he beṉꞌ wṉabiaꞌkaꞌ beteꞌ.
13 Chios c̱haꞌ,
zejḻi kaṉi zoꞌ,
naꞌ zejḻi kaṉi lljadingakileꞌ daa benoꞌ.
14 X̱ancho Chiozaꞌ chakleneꞌ beṉꞌkaꞌ nak yell c̱heꞌ,
naꞌ chiyeshꞌlallileꞌ ḻegakeꞌ daa nakgakeꞌ beṉꞌ chon ka cheenileꞌ.
15 Diikaꞌ choeꞌlaꞌo beṉꞌ yell zitꞌkaꞌ nakgakan de or naꞌ de plat,
naꞌ nakgakan dii choni ṉiꞌa neekaꞌ.
16 Zoa choꞌagakin per bi chak wshaljgakan;
zoa jalaogakin per bi chleꞌgakin;
17 zoa naggakin per bi chengakin;
ni bibi bishbe yoogakan.
18 Naꞌ kon ka nakgakan
kaꞌ nak beṉꞌkaꞌ chon ḻegakan,
naꞌ ḻekzkaꞌ nak beṉꞌkaꞌ chx̱enilallꞌ ḻegakan.
19 Leꞌ beṉꞌ Israel,
ḻi weꞌlaꞌo X̱ancho Chiozaꞌ.
Leꞌ xiiṉ dia c̱he dii Aarón,
leꞌ nakle bx̱oz,
ḻi weꞌlaꞌo X̱ancho Chiozaꞌ.
20 Leꞌ xiiṉ dia c̱he dii Leví,
ḻi weꞌlawee.
Leꞌ chaple X̱ancho Chiozaꞌ balaaṉ,
ḻi weꞌlawee.
21 Leꞌ zoale Jerusalénnaꞌ,
ḻi weꞌlaꞌo X̱ancho Chiozaꞌ
beenaꞌ zoa lo yaa Siónnaꞌ ganaꞌ noni lill xḻatjeꞌ.
Ḻi weꞌlaꞌo Chiozaꞌ.