Salmo 132
1 Chios c̱haꞌ,
jadingachi dii Davinaꞌ
naꞌ yogꞌ yeḻꞌ zakꞌziꞌkaꞌ wdieꞌ.
2 Chios,
beṉꞌ yeḻꞌ wak choo yeḻꞌ wak xen,
beenaꞌ beꞌlaꞌo dii Jacobaꞌ,
jadingachi daa bc̱heb dii Davinaꞌ lawoꞌnaꞌ:
3 “Bi soakzꞌ ḻoo yoo lillaꞌnaꞌ
ni bi gataa ḻoꞌinnaꞌ yiziꞌlallaa,
4 ni bi wshodꞌ jalawꞌki,
ni shloll bi guesꞌ,
5 shlak biṉꞌ shaꞌ ibiṉ lill xḻatj X̱ancho Chiozaꞌ,
beenaꞌ nak beṉꞌ yeḻꞌ wak choo yeḻꞌ wak xen,
beenaꞌ beꞌlaꞌo dii Jacobaꞌ.”
6 Yell Éfratanaꞌ wyoo nagntoꞌ c̱he yiiṉaꞌ ganaꞌ yoo daa chonḻi daa bc̱heb Chiozaꞌ goneꞌ c̱hecho,
naꞌ billelintoꞌn lyix̱ꞌ c̱he yell Jáaraꞌ.
7 Ḻi shoꞌ ganaꞌ chiꞌ yiiṉaꞌ daa yoo daa chonḻi daa bc̱heb X̱ancho Chiozaꞌ goneꞌ c̱hecho.
Ḻi shoꞌ lljac̱hekꞌ xibcho xṉiꞌenaꞌ.
8 Dagach,
Chios c̱haꞌ;
dalengach yiiṉaꞌ daa nsaꞌ yeḻꞌ wak c̱hoꞌnaꞌ,
naꞌ soagachoꞌ gani nak lill xḻatjoꞌ.
9 Gakshga bx̱oz c̱hoꞌkaꞌ beṉꞌ ḻi beṉꞌ shaoꞌ,
naꞌ beṉꞌkaꞌ nonḻilallꞌ liꞌ goḻ iṉegakeꞌ liꞌ ḻega beṉꞌ chiba chizaki.
10 Daa ḻe gokiloꞌ dii Davinaꞌ,
beenaꞌ ben ka cheeniloꞌ,
bi kwej yic̱hjoꞌ beeni ba wlejoꞌ iṉabiaꞌ.
11 X̱ancho Chiozaꞌ bc̱hebeꞌ lao dii Davinaꞌ,
golleꞌneꞌ:
“Wzoaꞌ to xiiṉ dia c̱hoꞌnaꞌ iṉabiꞌe.”
Naꞌ daa bc̱hebeꞌ bi te bi goneꞌn.
12 Naꞌ ḻekzkaꞌ chiꞌe:
“Shi xiiṉ dia c̱hoꞌkaꞌ gongakeꞌ ka ba bc̱heboꞌ lawaꞌ,
naꞌ wzenaggakeꞌ diikaꞌ nlliaꞌ biaꞌ gongakeꞌ,
ḻekzkaꞌ xiiṉ dia c̱heꞌkaꞌ yizoagakeꞌ lo xḻatjoꞌ iṉabiaꞌgakeꞌ toshiizi.”
13 X̱ancho Chiozaꞌ ba wlejeꞌ yaa Siónni,
daa cheenileꞌ soan lill xḻatjeꞌnaꞌ.
14 Naꞌ neꞌ:
“Lo yaanin cheenidꞌ soaꞌ toshiizi;
lawinnin soaꞌ toshiizi,
ḻaꞌ kanꞌ ba wyazlallaa.
15 Naꞌ gonꞌ ka gatꞌ kweꞌ daa yeej gao beṉꞌkaꞌ lleꞌ ni,
naꞌ len beṉꞌ yeshꞌdoꞌkaꞌ wzesh wzeljidꞌ.
16 Wzenagꞌ c̱he bx̱oz c̱helekaꞌ katꞌ iṉabgakeꞌ siꞌxenꞌ c̱hele naꞌ yislaꞌ leꞌ,
naꞌ beṉꞌkaꞌ nonḻilallꞌ nadꞌ goḻ iṉegakeꞌ daa chiba chizakgakileꞌ.
17 Naꞌ nin gonꞌ ka yixe yizil yeḻꞌ wṉabiaꞌ c̱he dii Davinaꞌ,
beenaꞌ wlejꞌ,
naꞌ zejḻi kaṉi iṉabiaꞌ xiiṉ dia c̱heꞌnaꞌ.
18 Beṉꞌkaꞌ chakziꞌ chakzbangakileꞌneꞌ wsiꞌgakee yeḻꞌ ztoꞌ,
san ḻeꞌ,
gonꞌ ka iṉabiꞌe toshiizi.”