Yayugustari arama puranga
2
Kristu uxari rame yayumusuuri, uxari rame yayugustari, uxari rame yepewasu yariku kua Espiritu, uxari rame puranga yayumaa pirasua yuiri yayumaa, 2 Ape, pemusuuri ixe yepewasu resewara pemanduarisawa, peyugustari resewara yepewasu, yepewasu arama kuri pepia, yepewasu yuiri kuri pemanduarisawa. 3 Tepemunya penye aramapawantu pemanduari resewara purangawaita penye aintasui, maa pirasua penye pemanduari purangawaita ainta pesui 4 Tepemanduari peyaraita resepawantu, maa pemanduari yuiri amuita yaraita rese.Kristu umanduarisawa
5 Pesikari kuri pemanduarisawa kuaye Kristu umanduarisawa yawe. 6 Uiku rameana yepewasute Deus irumu timaa umanduari sesepawantu yepewasu ae Deus irumu. 7 Asui uxari isui panye ipurangasawa, uiku arama kuaye upurakiwaa yawe amu supe arama, asui unaseri ae kuaye mira yawentu, asui aintaukuawa ae kuaye apigawa yawe. 8 Asui uyuxariwaa aintawira kiti aepawate, asui uruyari ipaya nyenga ate umanu ae, umanu ae kurusa rese. 9 Sesewara Deus usupiri ae aintaara kiti piriwaa, asui uxari sera puranga piri panye aintarera sui. 10 Aintaumunya arama benditu ixupe panye aintausenduwaa irumu Jesus rera, panye iwaka kiti, panye kua mundu upe yuiri, panye iwi wira kiti yuiri. 11 Aintaumbeu arama aintaapeku irumu panye aintaruixawa Jesus Kristu, aintaumee arama purangawaa yanepaya Deus supe.
Yamuturi arama puranga kua mundu upe
12 Ape hagustariwaita, peruyari puranga kuaye peruyariwaa yawe yawewarawate haiku rame peirumu; maa kuiri kirimbawa piri peruyari tirame haiku peirumu; kuiri pexari uyukiriari puranga perese kua salvasão pemanduari resewara ae puranga, pesikie resewara isui yuiri. 13 Nyãse Deus upuraki pepia upe, uxari suuri penye pemunya arama kuaye uputariwaa yawe. 14 Tepepurupurungita penye pemunya irumu panye maantu, tiyuiri peyuyakawa. 15 Tiarama periku perese puxuwerasawa, supiwa arama penye ikiaimawaita arama penye, Deus rairaita penye aintapiterupi kuaita miraita puxuwerawaita ugananiwaita, pemuturi arama kua mundu upe kuaye turi yawe. 16 Peiku santa sese kua nyenga upakawaa hambeu arama kuri purangawaa seresewara nyã ara Kristu uri rame, tiarama hambeu retentu hayana retentu hapuraki yuiri pepiterupi. 17 Maa aintauyuká rame ixe sesewara kua hapurakiwaa pepiterupi peruyari arama, suuri kuri ixe peresewara. 18 Yawete yuiri penye, perikute peyumusuuri seirumu.
Timuteu Epafruditu yuiri
19 Hasaru yaneruixawa Jesus uxari kuri hamundu pepiri kutara kua Timuteu suuri arama kuri ixe hasendu irumu kuri peresewara. 20 Nyãse timaa hariku amu isui umanduariwaa penye puranga kuaye iyawe. 21 Anyunte aintaumanduari aintayara rese, timaa aintaumanduari Kristu Jesus yaraita rese. 22 Maa pekuawate Timuteu resewara, pekuawate mayetaa uajudari ixe puranga sese kua nyenga, purangawaa kuaye taina uajudariwaa yawe ipaya. 23 Haputari kuri hamundu pepiri ae hakuawa irumu kuri maye hasasawa. 24 Haxari sepia yaneruixawa rese uxari arama kutara kuri hasu hamaa pepiri ixepawate. 25 Asui hamanduari harikute hamundu pepiri kua semu Epafruditu kua upurakiwaa seirumu, upurara yuiri seirumu, kua pemunduwaa ixe arama uajudari arama ixe watari ramere ixe arama maantu. 26 Nyãse kirimbawa uputari umaa penye panye, asui sasiyara ipia pesendu resewara imãsi. 27 Nyãse imãsi turusu kuaji umanu ae, maa pirasua Deus umaa ae ixe yuiri, kuaji umusasiyara ixe, sasiyara rireana ixe. 28 Ape turusu haputari hamundu penye arama ae kutara pemusuuri arama kuri pemaa rame ae mukuĩsawa, asui ixe kuaira xinga kuri hayuka sepia sese. 29 Ape kuri suuri pesuanti ae yaneruixawa rese, puranga kuri pemaa kuaita apigawaita kuaye iyawe. 30 Nyãse kuaji umanu ae sesewara kua yapurakiwaa Kristu rese, asui suuri ipia upurara seresewara, nyãse penye timaa pepuderi peajudari ixe.