EFEZUWARAITA
Paulu umpinima ainta supe kuaita Efezuwaraita
Yariku purangawaa Jesus resewara
1
Ixe Paulu, Jesus Kristu umunduwaa kuaye Deus uputariwaa yawe, ainta supe arama kuaita uruyariwaita uikuwaita santa Kristu Jesus rese Efezu upe. 2 Yanepaya Deus yaneruixawa Jesus Kristu yuiri aintauxari penye arama ipurangasawa itimaaresesawa yuiri. 3 Yabensuari Deus yaneruixawa Jesus Kristu paya nyãse uabensuari yande panye purangawaa irumu iwaka kiti. 4 Irumu uparawaka yande kua mundu rundere ugustari resewara yande, yaiku arama puranga umaa purangawaita yawe. 5 Kuxima uxari tairaita arama yande irumu kua Jesus Kristu kuaye uputariwaa yawe. 6 Yamee arama kuri ixupe purangawaa sese kua ipurangasawa purangawaa uxariwaa yande arama prezenti irumu kua ugustariwaa. 7 Umukaturu yande suwi irumu, umburi yanesui yanepuxuwerasawa kuaye ipurangasawa uxariwaa yawe. 8 Ipurangasawa uyusena yanerese turusu ukuawasawa purangawaa irumu. 9 Uxari yakuawa uputariwaa yawe uyumimiware aintasui, kuaye uputariwaa yawe uxari irumu Kristu yaneresewara. 10 Umuatiri arama ipiri usika rame sangawa panye iwaka kitiwaita panye kua mundu puraita yuiri. 11 Irumu yuiri uxari ixupe aramawaita yande, uparawaka yande kuxima kuaye uputariwaa yawe kua umunyawaa panye maa kuaye uputariwaa yawe. 12 Yande yayupiruwaita yasaru Kristu uxari yaiku puranga yamee ixupe arama purangawaa ipurangasawa resewara. 13 Asui penye yuiri pesenduana asui peruyari rireana kua nyenga supiwa, kua nyenga purangawaa uxariwaa umukaturu penye umusangawa penye irumu kua Espiritu Santu umbeuwaa yande arama. 14 Aete kua uxariwaa yaiku santa, kua yarikuwaa ate mairame kuri yawike arupi, yamee kuri purangawaa ixupe ipurangasawa resewara.Paulu upurandu uruyariwaita rese
15 Ape, hasendu rireana peruyari puranga yaneruixawa Jesus pegustari yuiri puranga panye uruyariwaita; 16 Timaa sekuere hamee purangawaa perese hamanduari irumu penye hambeu rame Deus. 17 Yaneruixawa Jesus Kristu ipaya Deus, ipaya kua purangawaa, uxari arama pekuawa puranga pepia upe, uxari arama pekuawa pepia upe purangawaa ae. 18 Pemaa arama puranga pepia irumu pekuawa arama maa kua uputariwaa pesaru kua usenuiwaa penye, pekuawa arama yuiri turususawa kua ipurangasawa ainta supe arama kuaita uruyariwaita purangawaita. 19 Pekuawa arama yuiri iturususawa ikirimbawasawa uxariwaa ainta supe arama kuaita uruyariwaita, kuaye umunyawaa yawe ikirimbawasawa turusuwaa irumu. 20 Usupiri arama Kristu umanuwaita sui, asui uxari uwapika ikatusawa sui iwaka kiti. 21 Aintaara kiti piriwaa ae panye kuaita guvernuita, panye umunduwaita yuiri, panye tuixawaita umunduwaita upe, aintaara kiti piriwaa ae yuiri panye aintarera sui kuaita kuiriwaraita, panye yanerundewaraita yuiri. 22 Asui uxari panye maantu ipi wira kiti, asui uxari ingreja akanga ae. 23 Ingreja aete ipira ae, asui umuteresemu ae panye kua umuteresemusara ainta panye.