KULUSUWARAITA
Paulu umpinima ainta supe kuaita Kulusuwaraita
Umee purangawaa aintarese
1
Ixe Paulu, Jesus Kristu umunduwaa ixe kuaye Deus uputariwaa yawe, ae yuiri yanemu Timuteu. 2 Penye arama penye uruyariwaita, yanemuita uikuwaita santa Kristu rese Kulusuwaraita, yanepaya Deus uxari penye arama ipurangasawa itimaaresesawa yuiri. 3 Yawewarawate yamee purangawaa ixupe kua yaneruixawa Deus Jesus Kristu ipaya yapurandu rame perese. 4 Nyãse yasendu peresewara peruyari puranga Kristu Jesus nyenga, pegustari yuiri puranga panye kuaita uruyariwaita. 5 Sesewara kua pesaruwaa pemaa iwaka kiti, kuxima pesendu sesewara nyenga supiwa irumu nyenga purangawaa rese. 6 Kua nyenga usikana pepiterupi, kuaye usikawaa yawe panye kua mundu kiti, asui uxari iya ae aintapiterupi, uyukiriari yuiri puranga, yawete yuiri pepiterupi ae pesendu rire ae pekuawa rire supiwa kua Deus purangasawa. 7 Kuaye umbuewaa yawe penye kua Epafra yagustariwaa upurakiwaa yaneirumu, upuraki puranga Kristu supe arama peresewara. 8 Ae yuiri uxari pekuawa pegustari puranga Espiritu irumu.Upurandu aintarese
9 Sesewara yande yuiri yasendu rire peresewara, timaa yanekuere yapurandu perese; yapurandu uxari arama teresemu pepia upe ukuawasawa irumu, pekuawa arama kuaye uputariwaa yawe kua Espiritu, uxari arama pekuawa puranga pemanduarisawa puranga yuiri. 10 Pewata puranga kua mundu upe kuaye yaneruixawa uputariwaa yawe, suuri arama ae, puranga iya arama penye pemunyawaita purangawaita irumu, peyukiriari arama Deus ukuawasawa rese. 11 Peiku arama kirimbawa panye kirimbawasawa irumu kuaye ikirimbawasawa purangawaa uxariwaa yawe, tiarama kuri pepiaiwa pepurara, periku arama kuri pasiensia aintairumu pepia suuriwaa irumu. 12 Pemee purangawaa yanepaya supe, kua uxariwaa purangawaita penye periku arama kuri aintaurikuwaa kuaita uruyariwaita murutingawaa upe.
Purangawa Kristu
13 Nyãse uyurawa yande pitunawasuwaa sui, asui umutirika yande yaneruixawa Jesus umunduwaa upe kua Taira ugustariwaa. 14 Aete umuyuiri yande ixupe arama, umburi yanesui yanepuxuwerasawa. 15 Yepewasute ae ipaya Deus irumu, kua Deus tirewaa yamaa, aete aintarundewara panye kuaita umunyawaita. 16 Nyãse Deus umunya panye maa Kristu upe, panye iwaka kiti, panye kua mundu upewaraita, panye kuaita yamaawaita, panye yuiri kuaita tiwaita yamaa, panye tuixawaita, panye guvernuita yuiri, panye kirimbawawaita, panye umunduwaita yuiri. Aepawate umunya panye maantu ixupe arama. 17 Aintarundewara ae panye. Sesewara interure panye maa. 18 Aete ingreja akanga nyãse ipira ae, aete kua uyupiruwaa, aete kua uyupiruwaa usemu umanuwaita pitera sui, aintarundewara ae panye maa rese. 19 Asui suuri Deus uxari ukuawasawa uiku sese. 20 Asui Kristu irumu umukaturu irumu panye maantu, panye kua mundu upe, panye yuiri iwaka kiti, asui uxari timaarese aintasui resewara umburiwaa kurusa rese. 21 Asui penye peikuwaa kuera apekatu isui, pemuruanyana ae pepia upe pemunyawaita puxuwerawaita irumu; 22 Maa kuiri umukaturu penye irumu ipira apigawa yawewaa irumu umanu resewara ae, uxari arama purangawaita penye umaa, tiarama periku perese puxuwerawa, tiarama awa upuderi umbeu puxi perese umaa. 23 Peiku rame santa sese kua peruyariwaa, tirame peyutiari isui kua pesaruwaa pemaa uxari penye arama kua nyenga purangawaa pesenduwaa, kua nyenga aintaumbuewaa ainta supe panye kuaita iwaka wira kitiwaita. Asui ixe Paulu umbuesara ae.
Paulu muraki
24 Asui kuiri suuri hapurara peresewara, asui sepira upe hapurara kua tiware Kristu upurara ipira resewara, iingreja resewara. 25 Asui upurakiwaa ixe ingreja upe kuaye Deus uputariwaa yawe hapuraki ixupe, haxari arama pekuawa puranga panye kua Deus nyenga. 26 Kua uyumimiwaa aintasui panye kuaita miraita kuxima, maa kuiri uxari aintaukuawa ae kuaita uruyariwaita ae. 27 Asui Deus uputari pekuawa ipurangasawa iturususawa aintapiterupi kuaita tiwaita judeu, yawesawa kua uyumimiwaa kuera, Kristu uiku pepiterupi periku arama ipurangasawa. 28 Kristu kua yambuewaa sese, yambue ainta supe arama panye kuaita apigawaita, yambue ainta panye, panye ukuawasawa irumu, yaxari arama tuyuwe ainta Kristu rese panye kuaita apigawaita. 29 Asui yawewaa resewara hapurara hapuraki ikirimbawasawa irumu kua uxariwaa ixe arama turusu.