Iwijrina nakú jewíñaꞌajeño iphaka Jerusalén ejo yukuna marí
2
Jesús mothoꞌorí pajimila Belén e iꞌimaká, Judea teꞌeré nakú. Riwakajé Herodes iꞌimakeri judíona wakáraꞌajeri. E ajopana inaꞌukena iphaño Jerusalén ejo. Kamú jeñoꞌoká ejo pitá eyá nephá. Iwijrina nakú jewíñaꞌajeño neꞌemaká, ñakele naweꞌepike kajrú nakaje nakojé.
2 Nephaka ee, nemá najló:
—¿Mere chi kele judíona iꞌimakana penaje mothoꞌorí maare? Wamá iwijrí patoꞌokó kamú jáchoꞌoko ejo pitá iꞌimaká, raú waweꞌepí rimothoꞌoká. Ñakele weꞌejná majó ramaje, puꞌují wapechu iꞌimakáloje rinaku penaje.
Visita de los magos (Mateo 2.1-23)
3 Rejomi neꞌemá riyukuna neꞌemakana Heródesjlo. Remaꞌaká riyukuna aú, ripechu kawílaꞌo rinakojé; ñaké kaja piyuke Jerusalén ewá iꞌimakaño pechu kawílaꞌako rinakojé.
4 Ilé kaje aú Herodes awakátari piyuke sacerdótena wakáraꞌajeño, Tupana purákaꞌalo nakú jewíñaꞌatajeño waꞌaté, rikejáꞌakaloje naliyá riyukuna mékajeka pajimila nakú, Tupana wakáraꞌajikare inaꞌuké iꞌimatájeri penaje mothoꞌojé.
5 Raú nemá rijló:
—Belén e, Judea teꞌeré nakú rimothoꞌojé. Ñaké Tupana purákaꞌalo jaꞌapátajeri michú lanaꞌaká riyukuna júpimi iꞌimaká:
6 “Judá teꞌeré nakú pajimila Belén.
Apú pajimila chaje riꞌimajika, reyaje neꞌemakana penaje iꞌimajíkale.
Riká amájeri palá nuleꞌejena inaꞌukena,
Israel lakénami”,
ke rilanaꞌaká iꞌimaká.
7 Ilé kaje aú Herodes waꞌa rimichoꞌojnoja iwijrina nakú jewíñaꞌajeño maná. Rimá najló:
—¿Na wakajé amá iwijrí patoꞌokó iꞌimaká?
—Iꞌijná rejo, eko ikejaꞌa palá kele toꞌojmá yukuna. Iweꞌepíjikaja palá méreka riká, inakuwá iꞌimichá nojló riyukuna, nuꞌujnakáloje kaja nupéchuwa laꞌajé puꞌují rijló.
9 Ilé ke rimaká najló aú, neꞌejná rejo. Rejéchami riká iwijrí namákare penaje iꞌijnaká piño natukumá ke. Kaja ewaja ritajnó pukunaji, toꞌojmá iꞌimakare chu chaje.
10 Ilé ke namaka aú, puꞌují wani napechu laꞌakó. E kaja nephá rejo.
11 Namujlúkaꞌa nañakaré chojé, amaño riká, raló María waꞌaté, raú najlámaꞌo toꞌojmá jimaje, nephákale raꞌapí. Rejomi najmeꞌetá napaúre chaya. Naꞌá rijló uwiru (oro), aꞌawaná iká puꞌumé amarí, apú aꞌawaná iká, mirra rií iꞌimaká, riká kaje naꞌá rijló.
12 Rejomi natapú Tupana kemari najló napaꞌakó piyá Herodes ewá.
Ilé kaje aú napaꞌó apú iñeꞌepú chuwá nateꞌeré ejo.
13 Iwijrina nakú jewíñaꞌajeño paꞌakó iꞌimaká ejomi, Tupana waꞌatéjeri, jeꞌechú chiyaje, kemari ritapú Josejlo:
—Chuwa páchoꞌo maáreya. Piwaꞌa ilé toꞌojmá, raló waꞌaté, maare eyá ají ke Egipto teꞌeré ejo. Re piꞌimajé najwaꞌaté, aꞌajná numájika piño pijló ejená, Herodes wakáraꞌajikale rikulákana, nenókaloje riká penaje.
14 Raú José jáchoꞌoro reyá. Riká lapija riwaꞌa ilé toꞌojmá, raló waꞌaté, neꞌejnakáloje yaꞌajnaje Egipto teꞌeré ejo.
15 Re neꞌemá, aꞌajná Herodes takaꞌaká iꞌimaká ejená. Ilé ke nakaje iꞌimaká najló, riꞌimakáloje júpimi ke Tupana purákaꞌalo jaꞌapátajeri kemaká rinaku iꞌimaká chuwá. Rimá iꞌimaká: “Egipto eyá nóchoꞌotaje piño nuꞌurí”, ke.
Herodes wakáraꞌaka yuwaná nótakana yukuna marí
16 Herodes weꞌepiri iwijrina nakú jewíñaꞌajeño pajlaka rijwaꞌaté, unkale napaꞌaló piño riyukuna iꞌimajé rijló, ilé kaje aú kajrú wani riyúchaꞌako. Raú riwakáraꞌa piyuke yuwaná kapajareruna Belén e iꞌimakaño, rawaꞌá iꞌimakaño waꞌató, nótakana piyukeja.
Iwijrina nakú jewíñaꞌajeño kemaño rijló iꞌimaká, na wakajeka namá ilé iwijrí patoꞌokó iꞌimaká. Riká nakojé riweꞌepí mékajenaka yuwaná kapichátakana, ñakele riwakáraꞌa piyukeja nayani achiñana, iyamá jarechí kéchajena iꞌimakaño kapichátakana.
17 Tupana purákaꞌalo jaꞌapátajeri Jeremías michú kemaká rinaku iꞌimaká, chojé riphá ñaké nenótakana aú. Riká lanaꞌarí iꞌimaká:
18 “Kajrú namájika chapú kaje yajwé nateꞌeré ewá.
Kajrú neyájika nayani michuna.
Raquel micholo lakénami iyájeño kajrú nayani michuna.
Unká na palaꞌatálaje napechu najló, namájikale kajrú wani chapú kaje yajwé, nakapichátajikale nayani”, ke rilanaꞌaká iꞌimaká.
19 Herodes takaꞌarí iꞌimaká, eꞌiyonaja re kaja joꞌó José iꞌimaká Egipto teꞌeré nakú. E pajluwa lapí José tapúnaꞌari. Ritapú ramá pajluwa Tupana waꞌatéjeri, jeꞌechú chiyaje, iphaka rinaku, riká kemari rijló:
20 “Chuwa páchoꞌo, piwaꞌa ilé toꞌojmá, raló waꞌaté. Pipaꞌó piño piteꞌeré Israel ejo, kaja wátaño kele toꞌojmá nókana iꞌimaká takaꞌató”, ke.
21 Raú ráchoꞌo reyá. Riwaꞌa rijwaꞌató ilé toꞌojmá, raló waꞌaté, rejomi napaꞌó ají ke nateꞌeré Israel ejo.
22 Riwátajla riñakajela Judea ejo paꞌakano, eꞌiyonaja nemá rijló: “Arquelao neꞌemakana meꞌetení re”, ke. Herodes michú iꞌirimi riꞌimaká, raú José keroꞌó rejo paꞌakano piyá. Kaja ritapú Tupana kemari rijló, riꞌijnaká piyá rejo, raú ripaꞌó ají ke Galilea teꞌeré ejo.
23 E kaja nephá pajimila Nazaret ejo. Re Jesús tawáꞌaro iꞌimaká, re riñapá. Tupana purákaꞌalo jaꞌapátajeño michuna kemaká rinaku, keja riꞌimaká. Nemá Jesús nakú: “Nazaret eyaje riꞌimajika”.