Lanaꞌakéjami yaꞌatakó najló yukuna marí
5
(Neꞌemakana penájemi, Nabucodonosor michú iꞌirimi Belsasar yuriro neꞌemakana penaje, raraꞌapami apumí chojé. Riꞌimaká neꞌemakana wakajé, lanaꞌakéjami yaꞌatakó najló, ukapú nawakákaro chu iꞌimaká chojé.)1 Belsasar, Babilonia teꞌeré eyájena iꞌimakana, yukupéraꞌari mil inaꞌuké, ajopana chaje wakáraꞌajeño, neꞌejnakáloje naꞌajnewá ajñaje rijwaꞌaté penaje. Raú neꞌejná rejo. Najñaka naꞌajnewá ketana, neꞌemakana, piyuke riyukupéraꞌakarena waꞌaté, jaꞌakó kajmú jalá amúraꞌatakanami iꞌirajé. 2-3 Kaja cha nakeñoꞌoká yuwéraꞌakajo ejéchami, neꞌemakana wakáraꞌaka rijwaꞌaté jápajeño ñaꞌaká rijló paratú, eyá tiyela kaje oro nakiyá laꞌakanami, riꞌimaká ejo, raraꞌapá Nabucodonosor michú ñaꞌakare Tupana ñakaré chiyá Jerusalén eyá riꞌimaká. Raú nephata riká rinaku. Rejomi piyuke neꞌemakana, riluna, rijwaꞌatéjena, eyá piyuke riyukupéraꞌakarena, kele iꞌiraño richiyá kajmú jalá amúraꞌatakanami. 4 Piyukeja re iꞌimakaño iꞌiraká richiyá. Oro nakiyá laꞌakanami, plata, eyá pejruꞌuwá, aꞌawaná, jipa, kele nakiyá laꞌakanami riꞌimaká. Nayuwéraꞌako péchuna chu palá napuraꞌakó nachiꞌinárikana jenami nakú.
5 Ilé kaje nakú neꞌemá, e manaꞌí chiyó inaꞌuké yátheꞌela ke yaꞌataró najló. Riká lanaꞌarí pared jareni nakú, palá nakamaré pataká ejé. Ilé ke neꞌemakana amaka na pajaká yátheꞌela lanaꞌaká pared nakú aú, 6 kajrú wani rikeroꞌokó. Memare rijimá laꞌakó rikeroꞌokó akuwaná, rejéchami piyuke rinapona keñoꞌoká rijló kurúkakaje. 7 Raú kaphí wani rawíyoꞌoka. Rawíyoꞌoko riwáꞌaka kajrú nakaje nakojé weꞌepéjeñojlo. Neꞌiyajena weꞌepíkeño palá inaꞌukejlo kemakana mékeka nakaje iꞌimajika najló aꞌajná ñoꞌojó chami. Iwijrina nakú jewíñaꞌajeño ajopana iꞌimaká. Najló riwaꞌa, nephákaloje rinaku penaje. Nephaka rinaku ee, rimá najló:
—Puraꞌajero marí purákaꞌaloji lanaꞌakéjami waꞌaté, weꞌepéjeri kaja palá meke kemakánaka riká, rijló noꞌojé palá nojé aꞌarumakaji, ipurélukuni nawakáraꞌajeñoja kalé aꞌakárena nakuwá kaje. Noꞌojé kaja rijné murewa, oro nakiyá laꞌakanami. Rejomi noꞌojé riká noꞌopiyateje penaje, riwakáraꞌakaloje ajopana nujwaꞌatéjena nakiyana penaje. Pajluwaja kalé iꞌimajeri richaje nawakáraꞌajeri, nuká ejomi —ke rimaká najló.
8 Raú rijwaꞌaté jápajeño, kajrú nakaje nakojé weꞌepéjeño, kele mujlúkaꞌaño ukapú chojé, namákaloje riká lanaꞌakéjami penaje. Nayakáꞌojla richaje, eꞌiyonaja unká na nanakiyana weꞌepila meke kemakánaka riꞌimaká, naꞌapátakaloje riyukuna neꞌemakánajlo penaje. 9 Ilé ke riꞌimakale, kajrú wani neꞌemakana Belsasar keroꞌokó, kaja memare rijimá laꞌakó rikeroꞌokó akuwaná. Unká kaja piyuke rijwaꞌaté jápajeño weꞌepila meke laꞌakana. 10 Eꞌiyonaja neꞌemakana jaló, nawakáraꞌajeyo kaja ruꞌumaká, iphayo ruꞌurí nakú, rajñaka raꞌajnewá raꞌapiyatéjena nakiyana waꞌaté ejé, romaꞌakale kajrú nawíyoꞌoka mejé. E rumá ruꞌurijlo:
—Nuꞌurí, ajopana chaje iꞌimaká, palani iꞌimakajla neꞌemakana ñakeja. Piwó kaꞌaniño rijwaꞌaté; pijimá laꞌaniño memare wani. 11 Re paꞌapiyatéjena eꞌiyá pajluwaja inaꞌuké. Unká laꞌalá puꞌuwaré riká, rilaꞌakale nakaje Tupana pechu jaꞌapiyá ke. Paraꞌapá michú iꞌimaká neꞌemakana wakajé, riká numakare nakú pijló, laꞌakeri nakaje palá. Raú iná weꞌepí palá riꞌijnataka ripéchuwa, kapechuni wani riká. Wachiꞌinárikana weꞌepika nakaje nakojé, ke kaja riweꞌepika nakaje nakojé. Ñaké iꞌimakale, paraꞌapá Nabucodonosor michú aꞌarí riká, riꞌimakáloje mariꞌichuna, inaꞌuké tukumá weꞌepéjeño, iwijrina nakú jewíñaꞌajeño, kele wakáraꞌajeri penaje. 12 Daniel rií, paraꞌapá michú kalé apiyákari rií Beltsasar ke iꞌimaká. Re reꞌiyá palani péchuji, unká na eꞌiyá iꞌimalare kaje, ñakele kapechuni wani riká. Riꞌimá palá inaꞌukejlo nakaje puwichani najló iꞌimakare yukuna; riweꞌepí kaja palá iná tapú yukuna iꞌimakana inajlo. Palá wani riꞌimaká inajlo nakaje unká iná weꞌepílare nakojé yukuna. Ñakele numá pijló, ajopana chaje iꞌimakárejlo: Piwaꞌa Daniel maná. Riká jaꞌapátajeri pijló meke kemakánaka riká lanaꞌakéjami amákare pared nakú —ke rumaká rijló.
13 Raú nawaꞌa Daniel neꞌemakana iꞌimaká ejo. Riphaka rinaku ee, rimá rijló:
—¿Piká chi Daniel, judío jaꞌa, noraꞌapá michú wáꞌakarena majó, judea teꞌeré eyá iꞌimaká nakiyana? 14 Nemicha nojló pinaku: “Re Tupana Pechu rijwaꞌaté, raú palá wani riꞌijnataka ripéchuwa, kapechuni wani kaja riká”, ke. 15 Ñaké riká. Maapami ajopana iꞌimichaño maare nujwaꞌaté. Ajopana nujwaꞌatéjena chaje wani naweꞌepika kajrú nakaje nakojé. Napuriꞌichojla kele lanaꞌakéjami waꞌaté, naꞌapátakaloje nojló meke kemakánaka riká, eꞌiyonaja unká na nanakiyana weꞌepílacha meke kemakánaka riká. 16 E nomiꞌichá nemaká pinaku: “Riká weꞌepiri palá nakaje, unká iná weꞌepílare nakojé yukuna jaꞌapátakana palá inajlo”, ke. Ñakele pipuraꞌajiko ee palá marí purákaꞌaloji lanaꞌakéjami waꞌaté, paꞌapátajika ee palá nojló meke kemakánaka riká, e nuwakáraꞌaje naꞌaká pijló aꞌarumakaji palá nojé wani ipurélukuni, nawakáraꞌajeñoja kalé aꞌakare nanakuwá kaje. Nuwakáraꞌaje kaja naꞌaká pijné murewa, oro nakiyá laꞌakanami. Rejomi noꞌojé piká noꞌopiyateje penaje, piwakáraꞌakaloje ajopana nujwaꞌatéjena nakiyana penaje. Pajluwaja kalé iꞌimajeri pichaje nawakáraꞌajeri, nuká ejomi —ke rimaká rijló.
17 Raú Daniel kemari rijló:
—Ilé piyuke nakaje piwátakare nojló aꞌakana, reja riꞌimareja pijló. Eyá piwátajika ee apú nakú laꞌakana palá, rijló paꞌajé riká, riꞌimakáloje paꞌapiyateje, raú riꞌimakáloje pijwaꞌaté piñakaré chu penaje. Mapeja nuꞌumajika pijló meke kemakánaka nakaje, pamákare lanaꞌakéjami pared nakú yukuna.
18-19 “Riká Tupana, ajopana chaje wani iꞌimakare, aꞌarí paraꞌapá michú Nabucodonosor, riꞌimakáloje íkiꞌiruna inaꞌukena wakáraꞌajeri penaje, ajopana chaje wani riꞌimakáloje penaje, piyukeja inaꞌukena pechu iꞌimakáloje rinaku: ‘Ajopana chaje wani riká’, ke. Piyuke ajopana teꞌeré eyájena, ajopana teꞌeré eyájena ke, eyá keꞌiyapé purákaꞌaloji chu puraꞌajíkaño waꞌató iphákeño raꞌapí. Kajrú nakeroꞌojiko ripiyá. Riwakáraꞌake kaja inaꞌuké nakiyana nókana, riwátajika ke. Eyá unkachu riwátake nenókana, unká nenoke neká. Raꞌaké inaꞌuké nakiyana, neꞌemakáloje rijwaꞌaté wakáraꞌajeño penaje. Eyá ajopana inaꞌukena nakiyana rilaꞌaké unká inaꞌukélaruna ke. 20 Kaja ewaja rilaꞌá rinakuwá cháꞌatajeri ke wani iꞌimaká; unká riyurike na laꞌaká renakú, raú ripechu keja rilaꞌajika nakaje. Ilé kaje inaꞌuké riꞌimakale, Tupana kaꞌá riliyá weꞌepíkaje. Rejomi unká riweꞌepila rijwaꞌatéjena wakáraꞌakana, mapéjari keja wani riꞌimaká rejéchami. Unká naweꞌepike rinaku nawakáraꞌajeri ke. 21 Riwakajé riꞌimaké apoꞌojó inaꞌuké liyá. Kamejérina nakiyana keja riꞌimajika; re riꞌimaké kawaruna, ejaꞌawá eꞌiyowájena waꞌaté. Jémana pirakana ajñájika jimichi, ke kaja rajñájika jimichi najwaꞌaté iꞌimajika. Eyá ijamani ejátakeri piyuke rinapona. Tupana, piyukeja ajopana wakáraꞌajeño chaje wani wakáraꞌaka, aꞌá riwátakarena, neꞌemakáloje inaꞌuké wakáraꞌajeño penaje. Aꞌajná, riweꞌepika palá ñaké neꞌemaká ejená, riyurí neꞌemaká nawakáraꞌajeño.
22 “Eyá piká, Belsasar, kele weꞌemakana, nuꞌumichaje yukuna pijló iꞌimichaka, iꞌirimi piká. Palá piweꞌepika paraꞌapá michú yukuna, eꞌiyonaja pilaꞌá pinakuwá ñaké kaja, weꞌepiri ke wani. Unká piwátala ajopana ñathé aꞌajeri keja iꞌimakana. 23 Rilanakiya piphá paꞌapiwá Tupana, jeꞌechú chu iꞌimakárejlo, piwakáraꞌakale najñaꞌaká pijló paratú, eyá tiyela kaje, najñaꞌakare Tupana ñakaré chiyá Jerusalén e neꞌemaké wakajé. Richiyá piꞌirá, piyuke piyukupéraꞌakarena waꞌaté, kajmú jalá amúraꞌatakanami. Ripechuna chu ipuraꞌó kaja palá ichiꞌinárikana nakú. Oro, plata, bronce, hierro, eyá aꞌawaná, jipa kaje nakiyá laꞌakanami, kele nakaje jenami. Kele ichiꞌinárikana, imakárena nakú, unká amálaño; unká kaja nemaꞌalá meke ipuraꞌakó najwaꞌaté. Eyá Tupana, aꞌarí pijló kajmuchaji, ripalamane pilaꞌá nakaje, nakú unká pipuraꞌaló palá. 24 Ilé ke pilaꞌakale, riwakáriꞌicha riká yátheꞌelaji pamíchaje lanaꞌaká marí ke: 25 MENE, MENE, TEKEL PARSIN, ke. 26 Marí ke kemakánaka riká purákaꞌaloji rilanaꞌakare: MENE ke kemakana: Tupana aꞌarí rená pijló meketánaka júpika piꞌimajika inaꞌuké wakáraꞌajeri, eyá mékechamika páchoꞌojiko richiyá. 27 Eyá TEKEL ke kemakana: Palá Tupana ñaꞌaká pená nakaje jená ñaꞌajona chojé, eꞌiyonaja unká pená ñaꞌaló pikachicha lokópaꞌala. 28 Eyá PARSIN ke kemakana: Mékeka piyuke pijwaꞌatéjena tamákaꞌatajiko paliyáaka, neꞌemakáloje medos, eyá persas, kele teꞌeré eyájena wakáraꞌajeño waꞌatéjena nakiyana penaje —ke Daniel kemaká neꞌemakánajlo.
29 Ilé ke riñapátaka rijló kemakana, penájeja neꞌemakana Belsasar wakáraꞌaka naꞌaká rinaku aꞌarumakaji palá nojé wani, nawakáraꞌajeñoja kalé aꞌajíkareno nanakuwá kaje. Riwakáraꞌa kaja naꞌaká rinúrupi nakojé murewa, oro nakiyá laꞌakanami. Rejomi rimá ajopánajlo: “Maare eyá aꞌajná ñoꞌojó, Daniel iꞌimajeri noꞌopiyateje, riwakáraꞌakaloje apú noꞌopiyá wakáraꞌajeri jaꞌapiyá penaje”.