Nakaꞌaká Daniel kajruni ulawí, leones yuriná iꞌimakare chu, chojé yukuna marí
6
Neꞌemakana Dario aꞌarí ciento veinte raꞌapiyatéjena, nawakáraꞌakaloje rijwaꞌaté, ajopana teꞌeré eyájena, ajopana teꞌeré eyájena ke penaje. 2 Raꞌá kaja Daniel iyamá ajopana waꞌaté, neꞌemakáloje raꞌapiyatéjena wakáraꞌajeño penaje, namákaloje palá mékeka nalaꞌaká najápakaꞌala piyuke riteꞌeré nakuwá. Raú neꞌemakana iꞌimakáloje manaꞌija penaje, raꞌá neꞌemaká. Nawakáraꞌajeño nakiyana kaja Daniel iꞌimaká. 3 Meketánaja neꞌemaká nawakáraꞌakana nakú, e neꞌemakana amari palá wani Daniel weꞌepika inaꞌuké wakáraꞌakana, ajopana raꞌapiyá wakáraꞌajeño chaje. Raú riꞌijnatá ripéchuwa rinaku, raꞌakáloje riká piyukeja nachaje wani wakáraꞌajeri penaje. 4 Ajopana neꞌemakana jaꞌapiyatéjena weꞌepiño mékeka ripechu iꞌimaká rinaku. Ñakele nakulákato Daniel nakú, namákaloje rilaꞌaká nakaje unká paala, raú narukátakaloje riká neꞌemakánajlo. Eꞌiyonaja palá péchuri riꞌimajíkale, unká naweꞌepike na pachaka narukátakajla riká. 5 Neꞌejnatá piño napéchuwa rinaku palá, eꞌiyonaja unká na iphala napechu nakojé, narukátakaloje riká neꞌemakánajlo, nakaje unká rilaꞌalare palá chona. Kaja ewaja nemá: “Unká na chona warukátala riká weꞌemakánajlo, unká wani na rilaꞌalá unká paala. Apala richiꞌinárikana, ripechu iꞌimakare chojé kaphí, nakojé kaꞌajná wephátaje puraꞌakajo, richona warukátakaloje riká weꞌemakánajlo”, ke napuraꞌakó pajwaꞌatéchaka rinaku.6 Kaja ewaja neꞌemakana jaꞌapiyatéjena pechu iꞌimá rejenowaja ñaké laꞌakana nakú, raú neꞌejná neꞌemakana waꞌaté puraꞌajó. Nephaka rinaku ee, nemá rijló:
7 —Piyukeja weká, paꞌapiyá wakáraꞌajeño awakaño, wapuraꞌakóloje nakaje nakú penaje. Rejenowaja wapechu nakú marí ke laꞌakana: Wawata pilanaꞌaká papera kaje, richu piwakáraꞌakaloje piyukeja inaꞌukena laꞌaká marí ke: Pajluwata keri ketana unká na kejáꞌalaje apú inaꞌuké liyá, nachiꞌinárikana liyá waꞌató, nakaje rilaꞌakáloje najló penaje, piliyaja kalé nakaje kejáꞌakana iꞌimajé. Unká jemaꞌalaje marí purákaꞌaloji pilanaꞌajíkare jaꞌapiyá, kaꞌakana iꞌimajeri richuwaja ulawí, leones yuriná wani iꞌimakare chu, chojé. 8 Ñakele chuwa, weꞌemakana, piwakáraꞌa inaꞌuké laꞌaká marí ke pipurákaꞌalo lanaꞌakéjami aú. Rejomi piyáꞌataje pií kaja penaje lanaꞌakéjami tajákaꞌaloji, ajopana apiyákaka piyá riká. Raú wapurákaꞌalo, medos, persas teꞌeré eyájena, kele purákaꞌalo lanaꞌakéjami iꞌimajika, piyuke inaꞌuké jemaꞌakáloje raꞌapiyá penaje. Unká na apiyákalaje riká, nalaꞌakáloje apoꞌojó penaje.
9 —Je, ñaké riká —ke rimaká najló.
Nemaká rinaku, ke nalanaꞌaká riká. Rejomi riyáꞌata rií kaja penaje ritajákaꞌaloji. 10 E Daniel jemaꞌarí ilé ke napuraꞌakaro yukuna, raú ripaꞌó riñakaré chojé, iphari ukapú, rikamátakaro chu chojé. Riphaka richojé ee, rijmeꞌetá rileꞌejé ventana, reyá riyakaꞌo Jerusalén lokoꞌopani. Pajluwa weꞌechú japi ripuraꞌakono weji ke pe Tupana waꞌaté. Riwakajé ñakeja ritáraꞌako riꞌirúpachi aú, ripuraꞌakóloje Tupana waꞌaté penaje rilaꞌajíkano ke. Palá ripuraꞌakó Tupana nakú. 11 Eꞌiyowá ke neꞌemakana waꞌaté puraꞌajeño penájemina iphaka riñakaré chojé, amaño Daniel puraꞌakó Tupana waꞌaté. Nemaꞌá ripuraꞌakó palá Tupana nakú. 12 Riká penájeja napaꞌakó neꞌemakana ñakaré ejo rijwaꞌaté puraꞌajó, riwakáraꞌakare rijwaꞌatéjena laꞌaká nakú. E nemá rijló:
—Piká, weꞌemakana, wakáraꞌari piyuke pijwaꞌatéjena jemaꞌaká purákaꞌaloji lanaꞌakéjami jaꞌapiyá. Riká lanaꞌakéjami kemari pajluwata keri ketana unká na kalé kejáꞌaje apú inaꞌuké liyá, nachiꞌinárikana liyá waꞌató, nakaje rilaꞌakáloje najló penaje, piliyaja kalé nakejáꞌaje nakaje. Unká jemaꞌalaje riká, purákaꞌaloji pilanaꞌakare jaꞌapiyá, kaꞌakana iꞌimajeri richuwaja ulawí leones, yuriná wani iꞌimakárena chu, chojé. Ñaké piwakáraꞌaka weká, ¿ke joꞌó?
—Aꞌa, ñaké riká —ke neꞌemakana kemaká—. Nupurákaꞌalo lanaꞌakéjami kemaká ke nujwaꞌatéjena laꞌajika. Kaja keja weká medos, persas, kele teꞌeré eyájena wakáraꞌajeño wakáraꞌaka inaꞌuké. Unká wapurákaꞌalo lanaꞌakéjami apiyákakana iꞌimalá.
13 E nemá piño rijló:
—Eta Daniel, judíona nawáꞌakarena majó iꞌimaká nakiyana, unká iphala paꞌapí, ajopana chaje piꞌimaká eꞌiyonaja. Kaja riphá raꞌapiwá pipurákaꞌalo lanaꞌakéjamijlo; kaja wamá ripuraꞌakó richiꞌinárikana waꞌaté weji ke peno ke weꞌechú kaꞌalá keja.
14 Ilé ke nemaká rijló aú, kamuꞌují wani ripechu laꞌakó, e riꞌijnatá ripéchuwa, ramákaloje mékeka riꞌimatákajla Daniel leones liyá. Júpija riꞌijnataka ripéchuwa rinaku, aꞌajná kamú jaꞌakó ejená, 15 eꞌiyonaja neká penájemina kaja iphaño piño rinaku, nemá rijló:
—Palá piká, weꞌemakana, weꞌepika mékeka weká medos, eyá persas eyájena, kele purákaꞌalo lanaꞌakéjami nakojé. Unká meke laꞌajé walaꞌalajla apoꞌojó nakaje pilanaꞌakare, wemaꞌakáloje raꞌapiyá liyá, kaja re pií yáꞌakole ritajákaꞌalo. Ñakele unká meke laꞌajé wapiyákalajla riká. Rimakachu kaꞌajná, nalaꞌakáloje nakaje penaje, nalaꞌaká piyá kaꞌajná nakaje, kaja keja rilaꞌakana iꞌimajika, rií iꞌimakachu lanaꞌakeja ritajákaꞌalo. Unká na apiyákalajla riká.
16 Raú neꞌemakana wakáraꞌari Daniel wáꞌakana, nakaꞌakáloje riká ulawí, yuriná wani leones iꞌimakare chu, chojé. Unká chiyó nakaꞌá riká richojé, rikó rimaká Danieljlo:
—Eko Tupana, palá wani pemaꞌakare jaꞌapiyá, iꞌimatá piká.
17 E nakaꞌá Daniel ulawí, yuriná wani leones iꞌimakare chu, chojé. Rejomi najñaꞌá pajlúwaꞌala jipa kajruni. Riká nayáꞌata ulawí numanaje, rejomi neꞌemakana laꞌarí sellar riká jipa rileꞌejé sello aú. Ñaké kaja raꞌapiyatéjena, ajopana chaje wakáraꞌajikaño, laꞌaká sellar riká naleꞌejé sello aú, raú piyuke inaꞌuké weꞌepíkaloje ñaké waja nawajájika unká jemaꞌalájeño napurákaꞌalo lanaꞌakéjami jaꞌapiyá. 18 Ilé ke nalaꞌaká ejomi, neꞌemakana paꞌaró riñakaré chojé. Riphaka penájeja riꞌijnaká ricamané chojé toꞌojó. Laínchu unká rajñala raꞌajnewá, unká kaja rilaꞌalá nakaje rilaꞌajíkano ke; riwakajé lapí unká meke laꞌajé rikamátalo. 19 E muní ke wajé wani najmeꞌetaka ee, riꞌijná peyajwé ulawí, leones iꞌimakare chu ejo. 20 Riphaka rawaꞌajé ee, kamuꞌují ripechu ke riwáꞌaka Danieljlo, rimá:
—Daniel, Tupana, ñakeja iꞌimajíkare, waꞌaté jápajeri. ¿E Tupana, pipechu iꞌimakare chojé kaphí, pemaꞌakare wani jaꞌapiyá, iꞌimatíyaka piká leones liyá?
21 E Daniel aꞌajipá rijló:
—Palani piká, weꞌemakana, iꞌimakajla ñakeja wani. 22 Tupana, nupechu iꞌimakare chojé kaphí, wakáriꞌichari pajluwa rijwaꞌateje jeꞌechú chiyá majó, ritakáloje leones numá penaje, najmaꞌaká piyá nuká. Kaja Tupana weꞌepí unká na nulaꞌalá puꞌuwaré, unká kaja na aú nulaꞌalá piká chapú, weꞌemakana.
23 Raú puꞌují wani neꞌemakana pechu laꞌakó. Riwakáraꞌa Daniel jáchoꞌotakana ulawí chiyá. E náchoꞌota riká, amaño unká raphú ke iꞌimalá rinapona nakú. Ripechu iꞌimakale kaphí Tupana chojé, unká leones laꞌalá riká chapú. 24 Rejomi neꞌemakana wakáraꞌari arukátaño riꞌimaká wáꞌakana rejo naluna, nayani, kele waꞌaté. Raú nawaꞌa neká rejo piyukeja. Rejomi riwakáraꞌa nakaꞌataka neká ulawí, leones iꞌimakare chu, chojé. Raú nakaꞌá neká richojé. Unká chiyó nephá palá riphuta chojé, leones jeñoꞌoñó nalokoꞌopáneje najmaꞌajé. Kajrú wani najmaꞌataka neká.
25 Rejomi neꞌemakana wakáraꞌari papera kaje piyuke inaꞌukena ejaꞌawá chuwá iꞌimakáñojlo. Ajopana teꞌeré, ajopana teꞌeré eyájenajlo ke, riwakáraꞌaka purákaꞌaloji lanaꞌakéjami napuraꞌakó chu waja. Marí ke rimaká najló papera kaje chu: “Nuwata iꞌimaká palá pajwaꞌatéchaka ilérowa. Nuwata kaja piyuke nakaje ilaꞌajíkare jáchoꞌoko palá ijló. 26 Marí ke nuwakáraꞌaka chuwa piyukeja nujwaꞌatéjena laꞌaká: Nuꞌumajika iꞌimakana ketana, nuwata piyuke iphaka Tupana, Daniel pechu iꞌimakare chojé kaphí, jaꞌapí, marí ke riꞌimakale”:
“Riká Tupana ñakeja wani iꞌimajika.
Ñakeja wani riꞌimajika inaꞌuké wakáraꞌajeri,
unká riyurílaje inaꞌuké wakáraꞌakana iꞌimajika.
Unká na kalé cháꞌatajeri riꞌimajika,
nakaꞌakáloje rijwaꞌatéjena riliyá penaje.
Matajnako riweꞌepika piyuke nakaje laꞌakana nakojé.
27 Inaꞌuké iꞌimatájeri kapichákajo liyá riká;
riꞌimatá kaja inaꞌuké chapú kaje yajwé namákare liyá.
Rilaꞌá nakaje, unká apú weꞌepílare laꞌakana,
inaꞌuké weꞌepíkaloje raú mékajeka riká penaje.
Ilé ke rilaꞌaká ejaꞌawá chu, ñaké kaja jeꞌechú chu.
Riká Tupana iꞌimatari Daniel, leones noka piyá riká”,
ke riwakáraꞌaka najló purákaꞌaloji.
28 Reyá aꞌajná ñoꞌojó, Daniel iꞌimakeri neꞌemakana Dario jaꞌapiyateje. Ajopana raꞌapiyatéjena chaje riꞌimaká nawakáraꞌajeri. Rejomi, Ciro, Persia eyaje, iꞌimari neꞌemakana Dario apumí chojé. Riwakajé Daniel iꞌimari piño raꞌapiyateje.