Neꞌemakana wakáraꞌaka inaꞌuké táraꞌako neꞌerúpachi aú nakaje jenami jiꞌimaje yukuna marí
3
Rejéchami neꞌemakana Nabucodonosor wakáraꞌaka nalaꞌaká inaꞌuké jenami oro nakiyá. Treinta metros ketana riwapherecha iꞌimaká, eyá weji kele metros ketana richítaka. Rejomi riwakáraꞌa natáraꞌataka riká phuꞌuteni Dura e iꞌimakare ejé, Babilonia teꞌeré kaja riꞌimaká. 2 Rejomi riwaꞌa piyuke riteꞌeré nakiyá wakáraꞌajeño maná. Riwaꞌá kaja piyuke suráana wakáraꞌajeño maná, ñaké kaja kajrú nakaje nakojé weꞌepéjeño, liñeru amájeño, purákaꞌaloji lamáꞌatajeño. Kajena maná riwaꞌá piyukeja, naꞌakáloje nakaje jenami, riwakáraꞌakare laꞌakana nachiꞌinárikanajlo penaje. 3 Raú piyuke raꞌapiyatéjena awakaño inaꞌuké jenami, riwakáraꞌakare laꞌakana iꞌimaká ejé, naꞌakáloje riká nachiꞌinárikanajlo penaje. 4 Raú nawakó piyuke rejé. Rejéchami riká neꞌemakana aꞌakare, rimakáloje nakaje nakú awakaño rejejlo, kemaká kaphí najló: “Jemaꞌá marí, iká piyukeja: ajopana teꞌeré eyájena, ajopana teꞌeré eyájena ke iꞌimakaño, keꞌiyapé puraꞌakajo chu puraꞌakaño, jemaꞌá marí: 5 Puꞌuwaká jemaꞌajika naphoꞌoká luwiluwí, kewirí kaje chojé, nawaraꞌajé kaja guitarra nakú. Marí kaje mejé jemaꞌajika ee, itáraꞌajo iꞌirúpachi aú marí inaꞌuké jenami, weꞌemakana wakáraꞌakare laꞌakana jimaje, iphákaloje raꞌapí penaje. Oro nakiyá laꞌakanami riká. 6 Eyá unká táraꞌalajeño neꞌerúpachi aú rijimaje, nephákaloje renami jaꞌapí penaje, wakaꞌajé richuwaja jiyá kajrú lukúnaꞌako chojé”, ke rimaká piyuke rejé awakákañojlo, nalaꞌakáloje ñaké penaje.7 Raú piyuke awakaño rejé jemaꞌaká naphoꞌoká luwiluwí kaje chojé. Eyá kewirí, guitarra kaje mejé aú, piyuke natáraꞌako neꞌerúpachi aú renami jimaje, nephákaloje raꞌapí penaje.
8 Caldeo teꞌeré eyájena amaño unká judíona nakiyana táraꞌalo neꞌerúpachi aú renami jimaje, nephákaloje raꞌapí penaje, raú neꞌejná narukátaje neꞌemakana Nabucodonósorjlo. 9 Nemá rijló:
—Weꞌemakana, ajopana chaje iꞌimaká piká. Palani piꞌimakajla matajnako; palani kaja inaꞌuké weꞌepíkejla piká ñakeja wani. 10 Ajopana chaje wani piká, ñakele piwakáraꞌa piyuke inaꞌuké táraꞌako neꞌerúpachi aú nakaje jenami, piwakáraꞌakare laꞌakana oro nakiyana iꞌimaká jimaje, luwiluwí, eyá kewirí, guitarra kaje mejé jemaꞌakana aú. 11 Eyá, unká táraꞌalajeño neꞌerúpachi aú rijimaje, kaꞌakana iꞌimajeri keraꞌathani kajrú lukúnaꞌako chojé. 12 Ke pimaká iꞌimaká, eꞌiyonaja ta kele judíona nakiyana, paꞌakárena paꞌapiyatéjena penaje, unká wani iphala paꞌapí; unká kaja nephala wachiꞌinárikana jaꞌapí; unká kaja nephala nakaje jenami, piwakáraꞌakare laꞌakana iꞌimaká jaꞌapí. Sadrac, Mesac, eyá Abed-negó, kele neká wemá nakú pijló —ke nemaká rijló.
13 Neꞌemakana jemaꞌaká mékeka neꞌemaká rijló nayukuna aú, kajrú wani riyúchaꞌako nachá. Riwakáraꞌa nawáꞌaka neká rijimaje, 14 e rimá najló:
—¿Kewaka chi unká iphala wachiꞌinárikana jaꞌapí? ¿Unká kaja chi iphala renami, nuwakáraꞌakare laꞌakana iꞌimaká jaꞌapí? 15 ¿E ilaꞌajika nuwakáraꞌaka ke? Jemaꞌajika ee naphoꞌoká luwiluwí kaje chojé, ¿e ijlámaꞌajiko nakaje jenami, nuwakáraꞌakare laꞌakana iꞌimaká jimaje, iphákaloje raꞌapí penaje? Ñakele unkájika ee ilaꞌá ñaké, nakaꞌajé iká meꞌetenija jiyá kajrú lukúnaꞌako chojé. Eta, ¿mékaje chi apú chiꞌinárikanaji iꞌimatárijla iká kapichákajo liyá?
16 Nemá rijló:
17 —Tupana, kaphí wapechu iꞌimakare chojé, wephákare kaja jaꞌapí walaꞌakárejlo puꞌují wapéchuwa, weꞌepéjeri weꞌematákana keraꞌathani, kajrú lukúnaꞌakaro liyá. Riká iꞌimatájeri weká piyuke, chapú piwátakare walaꞌakana liyá. 18 Eyá unkájika ee riꞌimatá weká richiyá, weꞌemakana, ajopana chaje iꞌimakare, wawata piweꞌepika marí palá: Unká wani wephálaje ichiꞌinárikana jaꞌapí ijwaꞌaté. Unká kaja watáraꞌalajo weꞌerúpachi aú renami, piwakáraꞌakare laꞌakana iꞌimaká jimaje.
19 Ilé ke nemaká rijló aú, kerá wani neꞌemakana jimá laꞌakó riyuchá akuwaná. Raú riwakáraꞌa kajrú naꞌataká jiyá po, rilukúnaꞌakoloje rilukúnaꞌajikono iꞌimajika chaje wani. 20 Rejomi riwakáraꞌa suráana nakiyana, katejmúruna iꞌimakaño, jepoꞌotaka Sadrac, Mesac, eyá Abed-negó, kele, nakaꞌakáloje neká keraꞌathani kajrú wani lukúnaꞌako chojé. 21 Neká, weji kele walijímakana, re joꞌó kaja naꞌarumaká, nawakáraꞌajeñoja kalé aꞌajíkareno nanakuwá iꞌimaká nanaku. Riká nanaku ke napataká neká; riká waꞌató nakaꞌá neká keraꞌathani chojé. 22 Kaja nalaꞌá neꞌemakana wakáraꞌaka nalaꞌaká ke, raú kajrú naꞌataká jiyá po, rimaká najló ke. Raú kajrú wani rilukúnaꞌako. E suráana, kaꞌañó kele walijímakana jiyá chojé, waꞌató káraꞌataño. Rejeja natakaꞌá. 23 Jepoꞌotákeja nakupátaka neká weji kele jiyá chojé. 24 Riká penájeja neꞌemakana jáchoꞌoko táraꞌajo kiñaja. Kaja rikeroꞌó nakaje ramákare aú rimá raꞌapiyatéjenajlo:
—¿Unká chi weji kele inaꞌukena kalé wakiꞌichá jiyá chojé?
—Aꞌa, ñakele wakiꞌichá.
25 —Eta naje nomá paꞌu kele inaꞌukena richu. Kaja unká jepoꞌokéjana kalé neká, manaꞌija naꞌapaka keraꞌathani eꞌiyowá, unká meke nalaꞌaló. Re nomá apú inaꞌuké najwaꞌaté, jeꞌechú chiyaje ke riká.
26 E riꞌijná jiyá pukuna, rilukúnaꞌakaro chu numaná awaꞌajé. Riphaka rinumaná awaꞌajé ee, rawíyoꞌoko rimaká najló:
—¡Sadrac, Mesac, Abed-negó! Tupana, jeꞌechú chu iꞌimakare waꞌaté jápajeño iká. Ijló numá: jáchoꞌo majó keraꞌathani eꞌiyayá.
Raú neká weji kele jáchoꞌoño keraꞌathani, kajrú wani lukúnaꞌako iꞌimaká eꞌiyayá. 27 Rejéchami piyuke reyájena wakáraꞌajeño awakako nanakojé, amaño unká wani keraꞌathani káraꞌatala wejápaja ñani nanapona. Unká kaja newilá iꞌimalá wejápaja ñani káraꞌatakeja ke. Ñaké kaja naꞌarumaká nanaku iꞌimakare, unká káraꞌatakeja kalé riꞌimaká, unká kaja nama iꞌimalá ija mela.
28 Rejéchami Nabucodonosor kemaká:
—Tupana, Sadrac, Mesac, Abed-negó, kele pechu iꞌimakare chojé kaphí, palani inaꞌuké puraꞌakó rinaku palá. Riká wakáriꞌichari rijwaꞌateje jeꞌechú chiyá, riꞌimatákaloje raꞌapiyá jemaꞌajeño penaje. Palá nemaꞌaká raꞌapiyá. Unká nemaꞌalacha nuká, nawakáraꞌajeri jaꞌapiyá. Unká kaja natáraꞌalo neꞌerúpachi aú, nephákaloje ajopana chiꞌinárikana jaꞌapí penaje. Unká kaja nalaꞌalá napéchuwa puꞌují najló. Palani najló takaꞌakaje, nalaꞌaká piyá ñaké. 29 Chuwa marí ke nuwakáraꞌaka inaꞌuké laꞌaká: Puraꞌajeño puꞌuwaré Tupana nakú, mariruna walijímakana pechu iꞌimakare chojé kaphí, nuwakáraꞌaje nujwaꞌaté jápajeño mataꞌataka nanapona. Kéchami nakajyaꞌatájika nañakaré, pitákeja ke nañakaremi mujrumi yuríkoloje penaje. Unká noꞌolaje nunakojó mere eyájenaka neꞌemajika, na chu napuraꞌajiko. Piyuke wajákana iꞌimajeri, napuraꞌajiko ee Tupana nakú puꞌuwaré. Unká na iꞌimalá ajopana chiꞌinárikana eꞌiyayá weꞌepiri inaꞌuké iꞌimatákana kapichákajo liyá, Tupana iꞌimatíyaka neꞌemichaka ke —ke rimaká najló.
30 Rejomi raꞌá piño neká weji kele walijímakana, neꞌemakáloje ajopana chaje wakáraꞌajeño penaje Babilonia teꞌeré nakú.