23
26 Nulaké, paꞌá pinakojó palá nakaje nomátakare aú piká,pilaꞌakáloje ñaké kaja penaje.
27 Re inaana manai péchuruna, wapichana neꞌemakale.
Juni jamoꞌokelana, yaꞌajná wani iphútari, ke kaja neká.
Iná jaꞌakochu richojé, unká méñoꞌojo iná jáchoꞌolajo piño richiyá.
28 Jataꞌakáchina jaꞌakó iná pe, ke kaja naꞌakó iná pe,
nakapichátaloje iná palá laꞌakaná liyá.
29 ¿Na amari chapú kaje yajwé?
¿Na akhaꞌarí ajopana maná?
¿Na nókakaro ajopana waꞌaté?
¿Na pechu nakú mapeja: “Nalaꞌaká nuká chapú”, ke?
30 Unká wani yuwéraꞌakachina yurila naliyó
nakaje amúraꞌatakanami iꞌirakana.
Ilé kaje yajwé amákana nakuja neká;
wajé iꞌirakaje amúraꞌatakanami atáꞌakana nakuja neká.
31 Eyá piká, piyakáꞌaniño nakaje jalá amúraꞌatakanami chaje.
Palá ramákana iꞌimajika pijló kuya chu,
eyá palá kaja riꞌirakana iꞌimajika pijló eꞌiyonaja.
32 Akijñojo jeí, ajmaꞌarí iná kewí, laꞌarí iná chapú,
ke riꞌimajika pijló.
33 Ripechuna chu pamaje nakaje apoꞌojó wani;
apoꞌojó kaja piꞌijnatájika pipéchuwa nakaje nakú;
apoꞌojó kaja pimájika nakaje nakú ajopánajlo.
34 Ripechuna chu pipechu iꞌimajé kaja pinakuwá:
“Juni jalomi jakú nuká, aꞌawaná jiꞌiwata notoꞌó”,
ke pipechu iꞌimajika pinakuwá.
35 Pimaje kaja:
“Kajrú kaꞌajná nañaꞌatíyaka nuká,
eꞌiyonaja unká nuweꞌepílacha riká.
Nopójika palá ee, nuꞌujnajé piño
nakaje jalá amúraꞌatakanami kulaje”, ke.