12
Palani pijló inaꞌuké kemájika ee pijló nakajeunká paala pilaꞌakare nakú,
pilaꞌakáloje palá penaje.
Raú naweꞌepeje piwátaka kajrú nakaje nakojé weꞌepíkana palá.
Eyá unkájika ee piwata nemaká pijló nakaje,
unká paala pilaꞌakare nakú,
naweꞌepeje mapechuru piká raú.
4 Palá laꞌakayo ruyajná nakú,
laꞌayó riká ajopana wakáraꞌajeri ke.
Palá kaja romátaka ajopana raú,
palá wani ruphákale raꞌapí.
Eyá unká iphálayo ruyajná jaꞌapí,
laꞌayó riká unká inaꞌukélari ke.
5 Palá ajopana nakú laꞌakana nakuja,
palá laꞌajeñó iꞌijnatá napéchuwa.
Eyá chapújneꞌekena iꞌijnataño napéchuwa
ajopana waꞌaté pajlakana nakú.
10 Palá, palá laꞌajerí weꞌepika mékechamika ripirana wátaka nakaje, raú riweꞌepí namuꞌují.
Eyá puꞌuwaré laꞌajerí, mapechuru,
unká na kalé muꞌují riweꞌepí, mapechuru riꞌimakale.
11 Rimena eꞌiyá jápajerijlo re ñóꞌope nakaje;
eyá unká weꞌepila palá laꞌakaná, puꞌuwaré laꞌakaná liyá,
jápari nakaje unká na penaje kalé iꞌimakare rijló nakú.
15 Mapechuru pechu nakú, palá waja piyukeja nakaje rilaꞌakare;
eyá kapechuni inaꞌuké
wátari ajopana kemaká rijló mékeka nakaje rilaꞌakare.
16 Nakaje yúchaꞌatakachu mapechuru,
kiñaja raꞌaká puꞌuwaká riyuchá;
eyá weꞌepiri palá laꞌakaná, puꞌuwaré laꞌakaná liyá,
weꞌepiri riyuchá ñaꞌakana panaku.
17 Kewaka puraꞌakó iꞌimari kewákaje chuwá
nakaje ramákare yukuna;
eyá pajlákachi kemari mapeja
nakaje ramákare nakú apoꞌojó.
18 Chapú wani mapechúruna laꞌaká
ajopana inaꞌukena napurákaꞌalo aú.
Kapechúruna purákaꞌaloja kalé
jaꞌapátari naliyá riká, chapú kaje.
19 Ñakeja kewaka puraꞌakó inaꞌuké iꞌimajika;
eyá pajlákachi kapichájero manaꞌí chiyó.
20 Ajopana waꞌaté pajlakana nakú
puꞌuwaré laꞌajeñó iꞌijnatá napéchuwa,
raú nalaꞌakáloje najluwa nakaje penaje.
Eyá palá péchuri wátari ajopana iꞌimaká palá pajwaꞌatéchaka,
raú rimá najló, neꞌemakáloje palá pajwaꞌtéchaka.
Ripalamane puꞌují napechu panakuwáaka.
21 Inaꞌuké, palá laꞌakana nakuja iꞌimajika ñakeja,
unká amálaje na chapú kaje yajwé.
Eyá puꞌuwaré laꞌakana nakuja iꞌimajíkaño,
amájeño keꞌiyapejé chapú kaje yajwé rejenowaja.
22 Chapú Tupana pechu pajlákachina nakú;
eyá kewákaje purákaꞌaloji kemaká chuwá
nakaje laꞌajeñó nakú, palá ripechu.
23 Unká inaꞌuké kapechuni puraꞌaló kajrú nakaje riweꞌepíkare nakú;
lanakiya mapechuru puraꞌó kajrú mapechúwaka nakaje,
unká riweꞌepílare nakojé nakú.
25 Iná wo kaꞌakochu nakaje waꞌaté,
kamuꞌují iná pechu laꞌakó raú.
Reꞌiyowá ke apú puraꞌakochu iná waꞌaté
palani purákaꞌaloji nakú, rilaꞌá piño puꞌují iná pechu.