10
Salomón lanaꞌarí kaja marí ke nakaje nakú iꞌimaká:Nulaké, kajrú nakaje nakojé weꞌepéjeri
laꞌarí richiꞌiná pechu puꞌují.
Eyá mapechuru chiꞌiná amaño kajrú chapú kaje yajwé.
3 Unká Tupana yurílaje palá laꞌajerí ñaꞌaká meꞌepijí panaku.
Eyá puꞌuwaré laꞌajérijlo,
unká riyurila aꞌajnejí iꞌimaká, riwátaka ejé.
4 Wejápaja pijápajika ee, pilaꞌajé kajrú nakaje nakú kamuꞌují;
eyá kajrú pijápajika ee, ñóꞌope nakaje iꞌimajé pijló.
5 Weꞌepiri nakaje laꞌakana palá,
ñaꞌarí ripají icha rená chojé riphaka kewá.
Eyá kamátakajo nakuja iꞌimaká nakaje icha
ñaꞌakana iphájika rená chojé wakajé,
rapáñaꞌataje rinakuwá.
6 Palá Tupana laꞌajika palá laꞌajeñó nakú;
eyá chapú ajopana laꞌajeño
kapichájeño chapú nalaꞌakare pachá.
7 Inaꞌuké iꞌijnatájika kewá napéchuwa palá laꞌajerí michú nakú,
palá napuraꞌajiko rinaku.
Eyá puꞌuwaré laꞌajerí michú, napechu kapicháñaaje kiñaja,
unká neꞌejnatálaje napéchuwa rinaku.
8 Kapechuni jemaꞌarí palá nakaje
nawakáraꞌajeri wakáraꞌakare nalaꞌaká jaꞌapiyá.
Eyá mapeja puraꞌakaño, kapichájeño kaja mapeja.
9 Unká lewérila apujlo unká keroꞌoló na piyá, unkale na laꞌalaje riká chapú.
Puꞌuwaré laꞌakaná nakú iꞌimaká,
tajnájero kaja puꞌuwaré laꞌakaná jimaje.
11 Juni jamarálani, muthú eꞌiyayá jeñoꞌokare,
ke palá laꞌajerí purákaꞌalo,
raꞌakale inajlo kajmuchaji iná iꞌimakáloje palá raú.
Eyá chapú laꞌajeñó kapichájeño,
chapú nalaꞌakare pachá.
12 Chapú inaꞌuké amákale pekowáaka aú,
nenoko makaꞌaní pajwaꞌatéchaka.
Eyá íkiꞌija wátakaño pekowáaka
amaño pachájechaka piyuke nakaje
unká paala nalaꞌakare liyá.
13 Palani purákaꞌaloji nakojé weꞌepéjeri
aꞌarí inaꞌuké ñathé ripurákaꞌalo aú,
naweꞌepíkaloje richaje nakaje nakojé.
Eyá unká iꞌijnatala ripéchuwa, rilaꞌaká nakaje yámona,
wilá iꞌikakana palani pawajleya aꞌawaná aú.
17 Aꞌarí rinakojó nakaje nemakare nakú rijló,
rilaꞌakáloje richaje palá, iꞌijnari palani iñeꞌepú chuwá.
Eyá unká aꞌalá rinakojó jenakuji nalaꞌakare,
iꞌijnari iñeꞌepú, kapichákajo ejo iꞌijnakare chuwá.
18 Mapeja pajlákachi laꞌaká rinakuwá palá péchuri ke,
chapú ripechu iꞌimaká ajopana nakú eꞌiyonaja.
Eyá mapechuru ke iꞌimaká,
iꞌimari mapeja chapujreji remaꞌakare yukuna ajopánajlo.
19 Kajrú puraꞌakó kemari kaja kajrú nakaje,
unká kewaka kalé iꞌimakare nakú.
Eyá weꞌepiri kajrú nakaje nakojé manúmaꞌaro,
kajrú napuraꞌakó ejéchami, ripuraꞌakó piyá mapeja.
20 Liñeru, kajrú wani wemiri ke,
kaja palá laꞌajerí purákaꞌalo wemí.
Eyá nakaje mapechuru pechu nakú iꞌimakare wemí unká iꞌimalá.
21 Kajrú palá laꞌajerí purákaꞌalo aꞌaká ajopana ñathé,
naweꞌepíkaloje raú palá nakaje nakojé.
Eyá mapechuru takaꞌajeri,
unká pachá riweꞌepila palá laꞌakaná, puꞌuwaré laꞌakaná liyá.
26 Iná wakáraꞌakachu inaꞌuké ijnuni laꞌaká inajlo nakaje, marí ke riká:
Kaꞌamálani iꞌirakana ke riká;
ija kawílaꞌaka iná ijlú nakú, ke kaja inajlo riká.
32 Palá laꞌajerí kemari palani nakaje nakú inajlo;
eyá puꞌuwaré laꞌajerí kemari nakaje chapú iꞌimakare inajlo nakú.