7
6 Apú wakajé manaꞌija nuꞌumaká nuñakaré chu ee,nuyakaꞌo ventana chiyá.
7 E nomá walijímakana wajé wani joꞌó ijlú meꞌetákaño.
Neꞌiyá nomá pajluwaja, nachaje wani mapechuka iꞌimaká.
Unká riweꞌepila palá laꞌakaná, puꞌuwaré laꞌakaná liyá.
8 Riphaka iñeꞌepú iphákaꞌako panakojéchaka ejé ee,
rikuwaꞌa pajluwájaru inanaru ñakaré lokoꞌopáneje.
9 Kaja cha wajúwaꞌaka, kalajeruni cha iꞌimaká.
10 Kaja ewaja riphá ruñakaré awaꞌajé.
Rejéchami ilerú inanaru mujlúkaꞌaka ruñakaré chiyá,
ruphákaꞌakoloje rijwaꞌaté penaje.
Wapichana aꞌaká nanakuwá naꞌarumaká,
ke roꞌorumaká iꞌimaká.
Manai wapichana pechu, ke kaja rupechu iꞌimaká.
Kajrú ruñakaꞌaká romokoꞌojé,
ramákaloje ruká kakámeꞌe penaje.
11 Kiñaja yuríkayo rochó ajopánajlo,
unká méñoꞌojo iꞌimalayo manaꞌija ruñakaré chu ruꞌumaká.
12 Pajimila nakuwá roꞌopákeno, riwami chuwá waꞌató.
Re ruwátakeno paineko jaꞌapájika rewá,
rukaꞌátakaloje reꞌiyajé, rilaꞌakáloje rujwaꞌaté penaje.
Nakaje patajona chojé jaꞌakano, keja kaja naꞌajiko rojló.
13 Ruká penájemi jáchoꞌoyo ruñakaré chiyá,
iꞌijnayo ilé walijímaka ejo.
Ruphákaꞌako rijwaꞌaté ee, rumawíloꞌo riká,
ruchiñoꞌó kaja rijimá chiyá.
E mapaichá rumaká rijló:
14 “Júpimi numá Tupánajlo iꞌimaká:
‘Nuwakáraꞌaje nenoka pirájina pijló, puꞌuwaré nulaꞌakare chaya,
palá pipechu iꞌimakáloje nunaku penaje’.
Chuwajá nuliꞌichá numakare nakú rijló iꞌimaká.
15 Ñakele nujiꞌichá pamaje majó.
Nuwátiyaka pamákana eꞌiyá wani nuphátiya piká.
16 Kaja lamáꞌatakeja nukamané,
re rinaku palá nojé aꞌarumakaji, Egipto eyaje.
17 Nukiꞌichá kaja reꞌiyajé keꞌiyapejé nakaje puꞌumé amarí
18 Ñakele piꞌijná nujwaꞌaté, walaꞌakáloje pajwaꞌatéchaka re penaje.
Íkiꞌija wawátakale pekowáaka,
weꞌemajé palá pajwaꞌatéchaka lapí ketana,
aꞌajná wajmeꞌetájika ejená.
19 Unká nuyajná iꞌimalá nuñakaré chu meꞌetení,
kaja riꞌijná yaꞌajnaje chiraꞌajó.
20 Íkiꞌija rijñaꞌaká liñeru rijwaꞌató, ñakele unká ripaꞌalajo majó kiñaja.
Kapukú keri iꞌimajika wakajé kaꞌajná ripaꞌajó”,
ke rumaká rijló.
21 Palá runúrupi mejé iꞌimaká;
palá kaja rupurákaꞌalo iꞌimaká rinaku.
Ruwata wani remaꞌaká roꞌopiyá,
raú rukaꞌata wani ilé walijímaka eꞌiyajé rujluwa.
22 Raú riꞌijná rujwaꞌaté.
Nawáꞌaka jema pirakana rinókelana ejo,
ke kaja ruwáꞌaka riká rujwaꞌató.
Kawayá jaꞌakó ripatajona chojé,
ke kaja raꞌakó kapichákajo chojé raú.
23 Ijijila apichátaka nakaje rijoꞌoká reꞌiyajé ee,
ke kaja ropichátaka ripechu.
Kupiraꞌaphá jaꞌakó wená chojé maweꞌepíkanaruja,
ke kaja riꞌijnaká maweꞌepíkanaruja kapichákajo chojé.
24 Ñakele, nulaké, ilé ke riꞌimakale, numá pijló:
Pemaꞌá nupurákaꞌalo; paꞌá pinakojó riká.
25 Piꞌijnatániña pipéchuwa apoꞌojó,
piꞌijnaká piyá ilé kajena inaana waꞌaté.
Piꞌijnajika ee rópumichu, pikapichajo.
26 Kajrú iꞌijnaño ruchaje kapichako.
Kajrú wani neká, rulaꞌakárena chapú.
27 Iñeꞌepú, ruñakaré ejo iꞌijnakare chuwá iꞌijnakana,
wáꞌari iná kapichákajo ejo.