5
Kajrú weꞌepika nuká nakaje nakojé, kapechuni nuká,ñakele paꞌá pinakojó nakaje numakare nakú pijló.
2 Raú piweꞌepeje palá mékechamika nakaje laꞌakana palá ajopana eꞌiyá,
eyá mékechami keka palani pipuraꞌakojla nakaje nakú ajopana waꞌaté.
Pimaje kaja palá nakaje piweꞌepíkare nakojé nakú ajopánajlo.
3 Palá kaꞌajná apú yajalo puraꞌakó pijwaꞌaté.
Palá kaja kaꞌajná runúrupi mejé jemaꞌakó pijló.
Nakaje puꞌumé amarí palani wani iꞌimaká inajlo,
ke kaja kaꞌajná rimejé pijló.
4 Eyá paꞌajika ee pinakojó rupurákaꞌalo,
nakaje ipijini ke
riꞌimajika pijló aꞌajná ñoꞌojó chami.
Joꞌojoji puweꞌení wani,
iyamá pumitanó jireri aú peꞌiyajé joꞌokana,
laꞌarí piká chapú wani,
chaje wani rulaꞌajika piká chapú.
5 Rujwaꞌaté chiraꞌakano wáꞌatajeri piká,
iñeꞌepú takaꞌakaje ejo iꞌijnakare chuwá.
Liri ejo ruwáꞌaje piká.
6 Unká aꞌalayo runakojó palani iñeꞌepú ruká;
takaꞌakaje ejo iꞌijnakare iñeꞌepú chuwá iꞌijnakánaja ruweꞌepí.
Kajrupi iñeꞌepú roꞌopákare chuwá,
eꞌiyonaja unká roꞌolá runakojó riká.
7 Ñakele, nulaké, pemaꞌá noꞌopiyá:
Piyuríniña piliyó nakaje nowíñaꞌatakare nakú piká.
8 Juká piꞌimá apú yajalo liyá.
Paraꞌaniño kaja ruñakaré numaná awaꞌajé, pikapichako piyá.
9 Yuwají piꞌimaká eyá maárejecha, palá wani nakaje pijló.
Paraꞌaniño runaku, marí kaje kapichako piyá pijló,
ajopana inaꞌukena, unká inaꞌukélaruna iꞌimakárena kápeje.
10 Neká, unká inaꞌukélaruna,
ñaꞌajeño piliyá najluwa nakaje pijñaꞌakare pijluwa,
kajrú pijápaka jami iꞌimaká.
11 Pilaꞌajika ee apoꞌojó numaká pijló liyá,
chapú pipechu iꞌimajika pinakuwá pitajnájiko wakajé;
kachuwa nakuwaja pinapona keñoꞌojé tajnákajo pijló.
12 Riwakajé pimaje:
“¿Naje chapú wani unká nuphala wátaño nonakú laꞌakana,
nulaꞌaká piyá puꞌuwaré iꞌimaká jaꞌapí?
¿Naje kaꞌajná unká nuyurila nalaꞌaká nonakú iꞌimaká?
13 Unká nuwátala nakaje,
nowíñaꞌatajeño kemakare nakú nojló iꞌimaká, jaꞌapiyá jemaꞌakana.
Unká kaja nomaꞌalá nonakú laꞌajeñó jaꞌapiyá iꞌimaká”.