—Kamuꞌují wani nomaka pipechu. ¿Meke chi pilaꞌakó? Unká pitami kalé nomaka piká. ¿E chi kaꞌajná pileꞌejé puraꞌakajo unká paala pijló?

Ilé ke rimaká keroꞌótari nojló, 3 eꞌiyonaja numá rijló:

—Weꞌemakana, palani piꞌimakajla júpija. Kamuꞌují wani joꞌó nupechu, nakajyaꞌatákale piyuke pajimila, nuchiꞌiná michuna tami iꞌimakare eꞌiyá, eyá nakáraꞌata kaja piyuke rinumaná.

4 Rimá nojló:

—¿Na aú chi noꞌojla piñathé?

Rejéchami nupechu nakuja nupuraꞌakó Tupana, jeꞌechú chu iꞌimakare waꞌaté, rilaꞌakáloje kaphí nupechu nojló penaje. 5 E numá weꞌemakánajlo:

—Palani nakaje numájikare nakú pijló iꞌimajika ee, nuwata piyurika nuꞌujnaká Judá teꞌeré ejo, pajimila najaꞌakare e nuchiꞌiná michuna tami iꞌimaká ejo, nulaꞌakáloje piño riká pajimila rapumí chuwá.

6 Re kaja riyajalo, neꞌemakánaru (Ester ruí), yáꞌayo rawaꞌá. Rimá nojló:

—¿Meketana júpika piꞌijnajika rejo? ¿Mékechami chi pipaꞌajiko piño majó?

Raú noꞌó rijló nupaꞌajiko piño richaje jená. Palani riꞌimaká rijló, ñakele riyurí nuꞌujnaká. 7 Numá kaja rijló:

—Palani nuꞌujnajika rejo iꞌimajika ee pinaku, pilanaꞌá papera kaje, nujñaꞌakáloje nujwaꞌató penaje, nuyaꞌatákaloje riká paꞌapiyatéjena juni Éufrates paꞌanajo pitá iꞌimakáñojlo, nayuríkaloje noꞌopaka manaꞌija Judá teꞌeré ejo. 8 Nuwata kaja pilanaꞌaká apata, nujñaꞌakáloje nujwaꞌató, nuyaꞌatákaloje pijwaꞌaté jápajeri Asafjlo. Nuwata pimaká rijló, riyuríkaloje nujñaꞌaká aꞌawaná pileꞌejé ejaꞌawá eꞌiyayá, raú wáchoꞌotakaloje piño kurara numaná, chipúkaꞌari Tupana ñakaré nakojé. Raú kaja walaꞌakáloje piño kurara paná, rinakiyana aú nulaꞌakáloje nuñakaró, nuꞌumajíkare chu paná.

E kaja weꞌemakana aꞌarí nojló piyuke nakaje nukejáꞌakare riliyá iꞌimaká. Inaꞌuké wani Tupana iꞌimakale nujwaꞌaté, raꞌá nuñathé ñaké, riꞌimakáloje nojló penaje.

9 E kaja nóchoꞌo reyá, nuꞌujnakáloje Judá teꞌeré ejo. Weꞌemakana wakáraꞌari kaja suráana nakiyana iꞌijnaká nujwaꞌaté, namákaloje nuchá penaje, raú wáchoꞌo kajrú nakawarútena nakú. E waꞌapá najwaꞌaté pajñakani rejo. Kaja ewaja wephá weꞌemakana jaꞌapiyá wakáraꞌajeño, juni Éufrates paꞌanojo kamú jaꞌakó ejo pitá iꞌimakaño nakú. Wephaka nanaku ee, nuyaꞌatá najló lanaꞌakéjami weꞌemakana wakáraꞌakare nujwaꞌaté. 10 Iyamá nawakáraꞌajeño nakiyana iꞌimaño re. Pajluwaja ií iꞌimari Sanbalat, pajimila Horón eyájena wakáraꞌajeri riꞌimaká; eyá apú ií iꞌimari Tobías, amonítana nakiyana wakáraꞌajeri riꞌimaká. Nemaꞌaká aú pajluwaja iphaka israelítana ñathé aꞌajé yukuna, kajrú nayúchaꞌako.

11-12 Kaja ewaja nuphá Jerusalén ejo. E weji ke kala cha nuꞌumaká re wakajé, nopó lapí mekeleja nujwákeꞌena waꞌaté. Unká nuꞌumalá najló mékeka Tupana pechu kemaká nojló kurara laꞌakana rapumí chuwá yukuna. Unká na nujñaꞌalá nujwaꞌató rejo. Nukawarute, noꞌopákare nakuja kalé nuwaꞌa nujwaꞌató. 13 E riká lapija nóchoꞌo pajimila eꞌiyowá chiraꞌajó. Nóchoꞌo rinumaná, inaꞌathana Dragón pomi lokoꞌopánejo iꞌimaká chuwá. Richuwá kaja pajimila eyájena mujlúkaꞌake icheji kaꞌajé. Rewá nupalamata palá kurara nakajyaꞌatákare penájemi iꞌimaká. Nomá kaja pajimila numaná iꞌimaká, kaja káraꞌatakejami piyuke. 14 Rejomi noꞌopá apú rinumaná, juni iꞌimakare ejo. Re kaja weꞌemakana leꞌejemi juni jamoꞌokelánami iꞌimá, eꞌiyonaja unká meke laꞌajé kawarú, noꞌopákare nakú, jaꞌapala rewá, kaja unká wephátala iñeꞌepú. 15 Lapí joꞌó iꞌimaká ee, noꞌopá piño ají ke pajluwa metaꞌápuru iꞌimaká ejo, reyá nupalamata piño kurara nakiyana nakajyaꞌatákare iꞌimaká. Rejomi nupaꞌó piño nopumí chuwá, mujlúkaꞌari rinumaná, ipuré jiwami eꞌiyajé iꞌijnakare chuwá. Richuwá numujlúkaꞌa piño pajimila penájemi iꞌimakare eꞌiyajé.

16 Unká rewá iꞌimakaño wakáraꞌajeño weꞌepila méñoꞌojoka nuꞌumaká lapí; unká kaja naweꞌepila na penájeka noꞌopaka rewá; unká kaja nuꞌumalá riyukuna judíona rewá iꞌimakáñojlo. Inaꞌuké chaya puraꞌajeño Tupana waꞌaté, eyá nawakáraꞌajeño, ajopana inaꞌukena, kajénajlo unká waja nuꞌumalá riyukuna, nujwaꞌaté jápajeño penájena neꞌemajika eꞌiyonaja. 17 Júpichami nupuraꞌakó najwaꞌaté rinaku, numá najló:

—Kaja iweꞌepí palá mékeka weká meꞌetení. Kajrú wani wamaka chapú kaje yajwé maare; kaja nakapichata piyuke marí pajimila, nakáraꞌata kaja piyuke rinumaná. Ñakele nuwata iká, nujwaꞌatéjena, aꞌaká nuñathé, walaꞌakáloje piño kurara rapumí chuwá, piyuke pajimila Jerusalén nakuwá. Raú kaja unká ajopana inaꞌukena iꞌichalaje wanaku mapeja, rejéchami nephákaloje waꞌapí penaje —ke numaká najló.

18 Rejomi nuꞌumá najló palá wani Tupana aꞌaká nuñathé yukuna. Nuꞌumá kaja najló nakaje, weꞌemakana kemakare nakú nojló iꞌimaká yukuna, raú nemá nojló:

—Aꞌa, palani, wáchoꞌotaje piño riká rapumí chuwá.

E kaja palá napechu ke napuraꞌakó ajopana waꞌaté rilaꞌakana nakú, najápakaloje najwaꞌaté rinaku penaje. 19 Eꞌiyonaja Sanbalat, Tobías waꞌaté, jemaꞌañó wáchoꞌotajika piño kurara rapumí chuwá yukuna. Ñaké kaja Guésem, árabe jaꞌa, jemaꞌaká riyukuna, raú neꞌechá wanaku. Kaja nawata wajló naꞌapiwá iphákana, raú nemá wajló:

—¿Na chi ikapi ta, jáchoꞌotakaloje piño riká penaje? ¿Iwata chi nakaje laꞌakana apoꞌojó ipechu keja? ¿Unká chi iwátala weꞌemakana jaꞌapiyá jemaꞌakana?

20 Eꞌiyonaja numá najló:

—Tupana, jeꞌechú chu iꞌimakare, aꞌajeri wañathé, nakaje walaꞌajíkare jáchoꞌokoloje palá wajló penaje. Rijwaꞌaté jápajeño weká, keñoꞌojeño pajimila laꞌakana piño rapumí chuwá. Eyá iká, unká ijápalaje wajwaꞌaté, unkale iweꞌepila mékeka rilaꞌakana nakojé. Unká kaja iꞌimalaje marí pajimila e wajwaꞌaté.