NEHEMÍAS
Nehemías jemaꞌaká Jerusalén yukuna marí
1
1-2 Nuká Nehemías, Hacalías iꞌirí. Pajluwa inaꞌuké leꞌejé kele jarechí ketana cha Artajerjes iꞌimaká ajopana chaje wani wakáraꞌakana nakú, wakajé nuꞌumá re rijwaꞌaté pajimila Susa e. Eꞌiyowá ke noꞌowé Hananí iphaka rejé, ajopana rijwákeꞌena waꞌaté. Júpimi ke náchoꞌoko Judá teꞌeré eyá iꞌimaká, neꞌejnakáloje nuchaje penaje. Neká iphaño nunaku rejé, naliyá nukejaꞌa pajimila Jerusalén yukuna. Nukejaꞌa kaja naliyá nojena yukuna. Neká ñaañó ajopana piyá, nakaꞌaká waliyá wateꞌeremi iꞌimaká wakajé. 3 Raú nemá nojló: “Unká wani paala neká rewá meꞌetení. Re joꞌó kaja neká ajopana waꞌaté re, eꞌiyonaja jápakaje wani najló nakaje laꞌakana meꞌetení. Kajrú wani rewá iꞌimakaño iphaka naꞌapiwá najló, ñakele kajrú napáñaꞌako naꞌapiwá. Eyá Jerusalén, kaja kurara yenoje nachipúkaꞌatakare rinakuwá, chapú wanaku péchuruna kajyaꞌatá riká. Eyá pajimila numaná napichata kaja, rejomi nakáraꞌata riká piyuke”, ke nemaká nojló.4 Ilé kaje yukuna nomaꞌaká aú, noꞌó iyaje. Júpija nupechu iꞌimaká kamuꞌují wani nojló, unká nojñala noꞌojnewá. Tupana, jeꞌechú chu iꞌimakare, waꞌateja nuwata puraꞌakano. 5 Numá rijló: “Tupana, jeꞌechú chu iꞌimakare, kajrú péchuri piká. Wakeroꞌó pipiyá, wachaje wani piꞌimakale. Nakaje pimakare nakú, ‘Marí ke nulaꞌajika riká’, ke pimaká rinaku, chuwaja pilaꞌá riká. Palá wani pilaꞌaká íkiꞌija piwátajeño nakú, pipurákaꞌalo kemaká ke laꞌajeño neꞌemakale. 6 Mawó numaká pijló meꞌetení, pemaꞌakáloje nupuraꞌakó pijwaꞌaté penaje. Weꞌechú, eyá lapí waꞌató, nupuraꞌó pijwaꞌaté nojena israelítana nakú. Pijwaꞌaté jápajeño weká. Nuweꞌepí piyukeja weká, Israel michú lakénami, laꞌaká puꞌuwaré. Piyukeja kaja nojena, nuyani, nuchiꞌiná, kele laꞌaká puꞌuwaré. Nuká waꞌató laꞌarí najwaꞌaté puꞌuwaré. 7 Unká inaꞌukélaruna laꞌaká nakaje, ke wani walaꞌaká nakaje pijlú chu. Unká wani wemaꞌalá pipurákaꞌalo, Moisés michú lanaꞌakare paꞌapiyá iꞌimaká, jaꞌapiyá. 8 Nuweꞌepí pimaká rijló iꞌimaká: ‘Unkájika ee israelítana jemaꞌá nupurákaꞌalo jaꞌapiyá, nutamákaꞌataje neká piyuke ejaꞌawá chuwá. 9 Eyá ajopana teꞌeré nakú neꞌemajika wakajé ee, kaꞌajná napajnoꞌotaje napéchuwa nuká ejo, nemaꞌakáloje nupurákaꞌalo jaꞌapiyá, nalaꞌakáloje rimaká ke penaje. Rejéchami nupaꞌatájika piño neká majó, marí teꞌerí nuyuríkare ijló ejo, iꞌimakáloje maare palá rinaku nupalamane. Apala yaꞌajnaje wani kaꞌajná nawáꞌaje iká nateꞌeré ejo, eꞌiyonaja nupaꞌataje iká majó piño, ipajnoꞌotájika ee ipéchuwa nuká ejo, maare weꞌemakáloje teꞌerí piꞌiwapakare pijluwa nakú, inaꞌuké jemaꞌakáloje piyukuna re penaje’, ke pimaká wanaku iꞌimaká”.
Numá piño Tupánajlo: 10 “Kaja pileꞌejena inaꞌukena weká, wajápakaloje pijwaꞌaté penaje. Piꞌimatá piyukeja waꞌajútaya michuna Egipto eyájena liyá iꞌimaká, piweꞌepíkale nakaje laꞌakana. 11 Ñakele mawó numaká pijló, Tupana, pemaꞌakáloje noꞌopiyá nupuraꞌakó pijwaꞌaté. Paꞌá kaja ajopana, pijwaꞌaté jápajeño ñathé, weꞌepiño natukumó nakaje laꞌakana, riꞌimakáloje palá pinaku penaje. Numá kaja pijló: Paꞌá nuñathé, nakaje nulaꞌajíkare jáchoꞌokoloje palá penaje. Pilaꞌá kaja weꞌemakana pechu palá, ripechu iꞌimakáloje palá nunaku penaje”, ke nupuraꞌakó Tupana waꞌaté.