Elías ñaakó Jezabel piyá yukuna marí
19
E kaja Ahab iphari riyajalo Jezabel nakú. Riꞌimá rojló piyuke nakaje Elías laꞌakare maapami ke yukuna; riꞌimá kaja rojló méke kari nótaka piyuke Baal purákaꞌalo jaꞌapátajeño michuna yukuna. 2 Ilé kaje aú Jezabel wakáraꞌayo pajluwaja iꞌijnaká rupurákaꞌalo yukuna iꞌimajé Elíasjlo, rimakáloje runaku rijló: “Piká Elías, eyá nuká Jezabel. Nuwata nuchiꞌinárikana wajaka nuká kaphí wani, unkájika ee nulaꞌá piká muní, meꞌetení kecha, pilaꞌaká Baal purákaꞌalo jaꞌapátajeño michuna iꞌimaká ke kaja”, ke ruwakáraꞌaka rimaká rijló.Raú riꞌijná Elíasjlo kemaje ñaké. 3 Ilé kajé aú Elías ñaaró reyá, nenoka piyá riká. Riꞌijná ají ke pajimila Beerseba, Judá teꞌeré nakú iꞌimakare ejo. Rejé riyurí rijwaꞌaté jápajeri. 4 Reyá raꞌapá rikó pajluwa kala ketana puꞌutheni meñaru chuwá. Kaja ewaja ritajnó, e riyaꞌo pajluwana aꞌawaná jaꞌapejé. Rejé riwata takaꞌakaje, kaja unká riwátala re joꞌó kaja iꞌimakana. Raú rimá Tupánajlo: “Kaja marí ketánaja nuwátaka ejaꞌawá chu iꞌimakana; kaja unká nujñaꞌalá chuwa panaku. Ñakele nuwata pikapichátaka nuká meꞌetení. Unká na kalé nuká, unká kaja nulaꞌalá palá nuchiꞌiná michuna laꞌajika chaje”, ke rimaká.
5 E ritoꞌó aꞌawaná jaꞌapí re, rejé rikamato. E manaꞌí chiyó pajluwaja Tupana waꞌatéjeri, jeꞌechú chiyaje, iphá rinaku jápaje, rimá rijló: “Papó, pajñachi paꞌajnewá”.
6 Raú rapó, riyakaꞌo rawaꞌó, amari pan jeꞌemákejami jiyá cha iꞌimaká re rawaꞌá. Re kaja ramá juni yáꞌako rawaꞌá iꞌichilá ñani kaje chu puꞌuthé. Raú ráchoꞌo, rajñá raꞌajnewá wejápaja, rejomi ripaꞌó piño toꞌojó. 7 Meketana iꞌimajemi Tupana waꞌateje paꞌaró piño rinaku jápaje. Rimá piño rijló: “Páchoꞌo, pajñachi paꞌajnewá, yaꞌajná wani joꞌó piꞌijnajíkare ejo. Unkájika ee pajñá paꞌajnewá, unká pitejmú iphálaje rejo iꞌijnakana lokópaꞌala”.
8 E ráchoꞌo piño raꞌajnewá ajñaje. Rajñaka riká ejomi, kaja katejmú rinapona iꞌimaká rijló, raꞌapákaloje iyamá inaꞌuké leꞌejé ke kala reyá, ají ke ipuré Horeb ejo. Tupana leꞌejé ipuré riꞌimaká. 9 Riphaka rejo ee, rimujlúkaꞌa pajluwa ulawí, jipa eꞌiyowá iꞌimakare chojé, rikamátakoloje lapí ketana. E Tupana kemari rijló:
—Elías, ¿na chi pilaꞌá maare?
10 Raú rimá rijló:
—Tupana, piká weꞌepiri piyukeja nakaje laꞌakana. Numejajné wani piká. ¿Naje piyuke wani israelítana yurika naliyó pipurákaꞌalo kemaká ke laꞌakana? Chuwa unká naꞌalá nanakojó nakaje pimakare nakú naꞌajútaya michúnajlo iꞌimaká. Nakajyaꞌatá kaja altares nakáraꞌatajikare nakú pijló pirájina tami. Eyá pipurákaꞌalo jaꞌapátajeño michuna nenótakaja piyuke. Nukaja kalé yuriro nokó pipurákaꞌalo jaꞌapátajeri, eyá chuwa nawata kaja nonókana.
11 Tupana kemari Elíasjlo:
—Páchoꞌo iléreya majó, kéchami pitáraꞌajiko majó nujimaje marí ipuré jiꞌiwata.
Ilé ke Tupana kemaká ejomi, raꞌapáñaa riká. Rejéchami karená aphoꞌoká kaphí wani. Riká kajraꞌatari ipuré nakiyana, raú kajrú jipa nakiyana majákaꞌatako peꞌiyowá, Tupana jimaje ke. Eꞌiyonaja unká Tupana iꞌimalá riká karená eꞌiyá. Karená jaꞌapaka ejomi, teꞌerí ñakaꞌó piño kaphí wani, eꞌiyonaja unká kaja Tupana iꞌimalá reꞌiyá. 12 Kajrú teꞌerí ñakaꞌakó, eyá ñaké kaja riyámojo ke keraꞌathani jáchoꞌoko, eꞌiyonaja unká kaja Tupana iꞌimalá reꞌiyá. Rejomi remaꞌá puraꞌakajo mejé kachuwa wani, palá remaꞌaká riká. 13 Raú rapáraꞌa rijimá raꞌarumaká aú, e ráchoꞌo ulawí chiyá. Re ritáraꞌo rinumaná awaꞌá. E Tupana kemari rijló:
—Elías, ¿na chi pilaꞌá maare?
14 Raꞌajipá rijló, rimá:
—Tupana, piká weꞌepiri piyukeja nakaje laꞌakana. Numejajné wani piká. Kaja piyuke wani israelítana yurika naliyó pipurákaꞌalo kemaká ke laꞌakana. Kaja chuwa unká naꞌalá nanakojó nakaje pimakare nakú naꞌajútaya michúnajlo iꞌimaká. Nakajyaꞌatá kaja altares, nakáraꞌatajikare nakú pijló pirájina tami. Eyá pipurákaꞌalo jaꞌapátajeño michuna nenota kaja piyuke. Nukaja kalé yuriro nokó, pipurákaꞌalo jaꞌapátajeri. Eyá chuwa nawata kaja nonókana.
15 Tupana kemari rijló:
—Chuwa pipaꞌó piño piphaka iꞌimaká ewá. Puꞌutheni meñaru, pajimila Damasco ejo toꞌokó ewá pipaꞌajó. Piphájika pajimila Damasco ejo ee, paꞌajé Hazael, riꞌimakáloje Siria teꞌeré eyájena iꞌimakana penaje. 16 Eyá Jehú, Nimsí laké, paꞌajé, riꞌimakáloje Israel teꞌeré eyájena iꞌimakana penaje. Rejomi paꞌajé kaja Eliseo, Safat iꞌirí, riyuríkoloje papumí chojé nupurákaꞌalo jaꞌapátajeri penaje. 17 Ilé ke neꞌemajika, nenótakaloje piyuke neká laꞌañó puꞌují napéchuwa Baaljlo. Hazael keñoꞌojeri nenótakana, eyá ñaajeño, riká Jehú nótajeri, eyá Eliseo nójeri Jehú liyá ñaajíkaño. 18 Eyá noꞌopiyá jemaꞌajeño unká nenólaje. Nekaja kalé nuꞌumataje. Re siete mil neká jemaꞌañó noꞌopiyá, unká táraꞌalaño Baal jenami jimaje neꞌerúpachi aú iꞌimaká. Unká kaja nachiñoꞌolá renami nalaꞌakare nakiyá —ke Tupana kemaká Elíasjlo.
Elías yurika Eliseo rapumí chojé Tupana purákaꞌalo jaꞌapátajeri penaje yukuna marí
19 E kaja Elías jaꞌapari piño reyá, iphari Eliseo nakú. Re ramá riká manaꞌija rijápakaꞌala laꞌakana nakú rimena eꞌiyá. Teꞌerí lamáꞌatakana nakú riꞌimá, rejátakaloje reꞌiyajé nakaje icha ijí penaje. Iyamano, iyamano ke, jémana pirakana chíraꞌaka teꞌerí jupéraꞌajona. Veinticuatro neꞌemaká piyuke: veintidós jaꞌapaño ritukumá, eyá nayámojo iyamá jémana chíraꞌaño kaja teꞌerí jupéraꞌajona. Najwaꞌaté Eliseo jaꞌapari. Ilé ke Elías amaka riká aú, riꞌijná rilokoꞌopane, e rikaꞌá rinakiyó raꞌarumaká waphereni rinaku iꞌimakare. Riká rikaꞌá Eliseo cha. 20 Raú Eliseo yurí rematena chíraꞌaka teꞌerí jupéraꞌajona. Rikaja rechoꞌokó Elías apumí chuwá, riphátakaloje riká penaje. Riphátaka riká ee, rimá rijló:
—Piyurí nuꞌujnaká nuchiꞌiná ejo paineko nuyukuno iꞌimajé najló, rejomi nuꞌujnajé pijwaꞌaté.
—Palani, piꞌijná rejo.
21 Raú ripaꞌó rematena iꞌimaká ejo. Rinó nanakiyana iyamá achiñana, rejomi rimataꞌatá neꞌimi. Aꞌawaná ripatoꞌotákare nanúrupi nakojé, rikaja riwapaꞌatá jiyá penaje, raꞌamitakáloje riꞌimi raú penaje. Raꞌamitaká riꞌimi ejomi, ritamákaꞌata riꞌimi rewá iꞌimakáñojlo, najñákaloje penaje. Rejomi riꞌijná Elías waꞌaté riñathé aꞌajeri penaje.