2-4 E pajluwape laínchu David jáchoꞌoro yenoje riñakaré jiꞌiwátaje. Reyá iꞌimajemi ramá pajluwájaru inanaru, palaru wani, aꞌapitaká ruñakaré kopi. Wajé wani ruyurika wakaꞌapojo iꞌijnakana. Ramaka ruká aú, riwakáraꞌa apú, rikejáꞌakaloje ruyukuna penaje. Raú riꞌijná, iphari ruñakaré awaꞌá iꞌimakaño nakú. Rikejaꞌa naliyá ruyukuna, e nemá rijló: “Betsabé ruí, Eliam itu ruká. Ruyajná ií Urías, hitítana nakiyana riká”, ke nemaká rijló. Rejomi ripaꞌatá ruyukuna Davidjlo, raú riwakáraꞌa ajopana, rijwaꞌaté jápajeño rejo, nawáꞌakaloje ruká riñakaré ejo penaje. Raú neꞌejná ruwáꞌaje riñakaré ejo. Re rilaꞌá rimanáicho rujwaꞌaté, rejomi rupaꞌó ruñakaré ejo.

5 Ilé ke nalaꞌaká ejomi rumanoꞌó, raú ruwakáraꞌa riyukuna rijló. 6 Raú David wakáraꞌari purákaꞌaloji suráana wakáraꞌajeri Joabjlo, riwakáraꞌakaloje Urías paꞌakó penaje. Raú riwakáraꞌa ripaꞌakó. 7 E Urías iphari David nakú. David kejaꞌa riliyá Joab yukuna eyá nenókako kaje yukuna, raú Urías iꞌimá rijló nenókako yukuna.

8 Ilé ke napuraꞌako pajwaꞌatéchaka rejomi David kemari Uríasjlo ripaꞌakóloje riñakaré ejo. 9 Eꞌiyonaja unká ripaꞌaló riñakaré ejo, rejeja rikamato neꞌemakana ñakaré chu, riwaꞌaphé iꞌimakaño waꞌaté. E muní ke nemaká Davidjlo.

—Unká riꞌimalacha riñakaré ejo kamátajo.

10 Raú David iꞌijná rijwaꞌaté puraꞌajó, rimá rijló:

—¿Naje unká piꞌijnalacha piñakaré ejo kamátajo? Yaꞌajnaya piphá majó.

11 Raú Urías kemari rijló:

—Yaꞌajná wekáꞌana nókako ewá, unká ñakareji iꞌimalá najló nakamátakoloje palá richu penaje. Mapeja nuwakáraꞌajeri Joab, raꞌapiyatéjena waꞌaté kamátako. Ñaké kaja kaichama, Tupana purákaꞌalo iꞌimakare chu, unká kaja ripajré iꞌimalá. Eta, ¿na chi nuká, numujlúkaꞌakaloje nuñakaré chojé, nojñákaloje noꞌojnewá palá, nukamátakoloje kaja palá nuñakaré chu nuyajalo waꞌaté? Unká wani nuwátala ilé ke laꞌakana chapú kaje yajwé namaka aꞌapona.

12 Raú David kemari rijló:

—Unká joꞌó pipaꞌalajo nenókako ejo, muniko pipaꞌó rejo.

Raú Urías yuró piño riwakajé lapí ketana re. 13 E laínchu David yukupéraꞌa riká, riꞌijnakáloje raꞌajnewá ajñaje rijwaꞌaté. Raꞌá kaja rijló nakaje jalá amúraꞌatakanami, riyuwéraꞌakoloje penaje. E kaja lapichami Urías paꞌakó piño reyá. Riꞌijná piño kamátajo David ñakaré chojé, riñakaré waꞌaphé iꞌimakaño waꞌaté. Unká riꞌijnalá riñakaré chojé kamátajo.

14 E muní ke David wakáraꞌaka ripaꞌakó piño rejo. Rijwaꞌaté riwakáraꞌa purákaꞌaloji lanaꞌakéjami Joab, suráana wakáraꞌajerijlo. 15 Richu rilanaꞌá marí ke rijló: “Eko piwakáraꞌa Urías iꞌijnaká itukumajo najwaꞌaté nókajo. Inókajiko ejéchami, iyurijika riká rikoja, nenókaloje riká penaje”, ke rilanaꞌaká rijló. 16 E kaja Urías iphari piño nanaku. Raꞌá nawakáraꞌajerijlo purákaꞌaloji lanaꞌakéjami David wakáraꞌakare rijló. E muní ke neꞌemaká piño pajwaꞌatéchaka nókakajo nakú. Nachipúkaꞌa pajimila nakojé, nakaꞌakáloje riká naliyá penaje. Rejéchami nawakáraꞌajeri wakáraꞌaka Urías iꞌijnaká ajopana waꞌaté natukumajo najwaꞌaté nókajo. 17 Rejéchami pajimila eyájena suráana jáchoꞌoko najwaꞌaté nókajo. Kajrú nenókako pajwaꞌatéchaka. Riwakajé nenó David waꞌatéjena nakiyana; nenó kaja Urías michú najwaꞌaté riwakajé.

26 Júpichami nenoka Urías michú yukuna iphaka riyajálomi nakú, raú kajrú ruyaka riká. 27 Ruñapátakaja ruwinano laꞌakana ejomi, David wakáraꞌari nawáꞌaka ruká richaje. E riwaꞌa ruká riyajálowa penaje, raú ruꞌumá rijwaꞌaté. E kaja ruwaꞌa ruꞌurí. Eꞌiyonaja unká wani paala nakaje David laꞌakare iꞌimaká Tupánajlo.