Chapú Saúl amájika David yukuna marí
18
6 David noka Goliat michú iꞌimaká ejomi, piyuke suráana paꞌakó nañakajela ejo. Ají ke napaꞌako iñeꞌepú chuwá: inaana nakiyana, apú pajimila eyájena, apú pajimila eyájena ke, amaka aú neká waíchaka, neꞌejná namaje. Puꞌují napechu iꞌimaká nanaku, nacháꞌatakale napinana. Raú narápaꞌa, nataní kaja najló. 7 Marí ke natanika:“Mil chapú wanaku péchuruna nójeri Saúl.
Eyá 10 mil chapú wanaku péchuruna nójeri David”,
ke natanika.
8 Saúl jemaꞌaká aú natanika ilé ke, unká wani paala ripechu laꞌakó raú. Kaja ripechu iꞌimá: “Nunaku nemá: mil suráana nójeri nuká, ke, eyá David nakú nemá: 10 mil nójeri riká, ke. Apala riká kaꞌajná naꞌajé neꞌemakana penaje nopumí chojé”, ke ripechu iꞌimaká. 9 Raú reyá aꞌajná ñoꞌojó, chapú ramájika David.
10 E muní ke jiñá pechu, Tupana wakáraꞌakare Saúljlo iꞌimaká, riwakáraꞌajeri ke, nakojé riꞌimá riñakaré chu jewíñami ke. Raú David waraꞌarí rijló guitarra kaje nakú, rilaꞌajíkano ke. Wejrukú iꞌimari Saúl kapi. 11 Manaꞌí chiyó ráchoꞌota riwejrukure, rinókaloje David raú penaje. Rikaꞌá riká rilokoꞌopani, eꞌiyonaja David mejñátaro riliyá. Rikaꞌá piño aphela, unká kaja. Rimejñato piño riliyá.
12 Raú Saúl keroꞌoró David piyá, riweꞌepíkale Tupana aꞌaká riñathé, eyá riñathé unká raꞌaké. 13 Ñaké iꞌimakale, riwakáraꞌa David iꞌijnaká apoꞌojó, rejomi raꞌá David, riꞌimakáloje kajrú suráana wakáraꞌajeri penaje. 14 Tupana aꞌajíkale David ñathé, nakaje rilaꞌajíkare jáchoꞌokerono palá rijló. 15 Ñakele Saúl keroꞌoró ripiyá. 16 Piyuke inaꞌuké, rewá iꞌimakaño, pechu iꞌimajika palá David nakú.