2 E Josué wakáraꞌari mekeleja nanakiyana iꞌijnaká pajimila Ai ejo, pajimila Betel ejo waꞌató. Pajimila Bet-avén awaꞌá riꞌimaká. Riwakáraꞌa neká rejo, namákaloje palá rewá penaje. 3 Raú neꞌemá rejo, rejomi napaꞌó napumí chuwá, iphaño piño Josué nakú. Nemá rijló: “Unká naje kalé weꞌejná piyuke rejo najwaꞌaté nókajo, wejápaja re suráana pajimila mejñátajeño iꞌimakale. Palani piwakáraꞌaka rejo dos mil kaꞌajná, tres mil kaꞌajná suráana nakapichátaje”.

4 Raú riwakáraꞌa tres mil suráana rejo, pajimila Ai eyájena waꞌaté nókajo. Nephá rejo najwaꞌaté nókajo, eꞌiyonaja reyájena jaꞌapaño nanaku, raú neñaó reyá. 5 Riwakajé napinana noño treinta seis israelítana nakiyana. Rejomi nechoꞌota ajopana. Ilé kaje aú ujwí wani israelítana pechu laꞌakó.

6 Ilé kaje yukuna neꞌemaká Josuejlo, pheñawilánajlo waꞌaté aú najiyoꞌotá naꞌarumaká nanaku iꞌimakare, kamuꞌují napechu iꞌimakale. Nakaꞌá kaja muꞌupé nachó, rejomi najlámaꞌo kaichama, Tupana purákaꞌalo iꞌimakare chu nakojé. Re natoꞌó najúwaꞌaka ejená. 7 Rejéchami Josué kemaká Tupánajlo:

—Tupana, ¿naje pikuwáꞌata weꞌemaká juni Jordán paꞌanajo pitaya majó iꞌimaká? Apala piwaꞌa weꞌemaká majó, amorréona nakiyana kapichátakaloje weká penaje. Palani kaꞌajná wayuríkojla paꞌanajo pitawa iꞌimaká. 8 Tupana, ¿meke numakajla pijló? Kaja nuleꞌejena suráana ñaañó chapú wanaku péchuruna liyá. 9 Apala Canaán eyájena, ajopana maárowa iꞌimakaño waꞌaté, kaꞌajná jemaꞌajeño riyukuna. Raú kaꞌajná nawakajo, rejomi nephaje majó wenótaje. Ilé kaje aú wayukuna tajnajo, eyá ¿meke nemájika pinaku rejomi? Kaja nemaꞌá piweꞌepika piyukeja nakaje laꞌakana nakojé yukuna.

10 E Tupana kemari rijló:

—Páchoꞌo, ¿na pilaꞌá teꞌerí eꞌiyá lámaꞌakajo nakú? 11 Puꞌuwaré wani pijwaꞌatéjena laꞌaká, unká pachá nemaꞌalá noꞌopiyá. Unká nalaꞌalá numaká najló iꞌimaká ke. Numá najló iꞌimaká, nakapichátakaloje piyukeja nakaje penaje, eꞌiyonaja najñaꞌá najluwa rinakiyana, rejomi nataꞌá riꞌimaká nanane eꞌiyajé. 12 Ilé ke nalaꞌaká pachá unká nacháꞌatala chapú nanaku péchuruna iꞌimaká, ñakele neñaó napiyá. Palani meꞌetení piyukeja israelítana kapichátakana, ilé ke nalaꞌaká pachá. Unkájika ee ikapichata nakaje numakare nakú ijló: “Ijñaꞌaniña riká”, ke, unká nuꞌumalaje ijwaꞌaté. 13 Páchoꞌo chuwa, pimicha piyukeja pijwaꞌatéjenajlo, nalamáꞌatakaloje napéchuwa nojló penaje, muní nawakájikole nujimaje. Eko pimá najló nunaku: “Israel lakénami, re nakaje ikapi, numakare nakú ijló iꞌimaká, ikapichátakaloje riká penaje. Unkájika ee ikapichata riká, unká meke laꞌajé ichátaꞌalaje chapú inaku péchuruna”, ke pimájika najló nunaku. 14 Ñakele muní piyukeja awakájiko majó. Mékeka inamana yuriko iꞌimaká, ke awakájiko pajluwa chojé, pajluwa chojé ke. Eyá nuwáꞌaje pajluwaja namanajlo eꞌiyayá, rejomi piyuke rikáꞌana ke iꞌimajíkaño iphájika nowaꞌajé, piyukeja rejena kajena waꞌató. Pajluwano, pajluwano ke nephájika majó nowaꞌajé. 15 Eyá kapi nakaje numakare nakú iꞌimaká: “Ijñaꞌaniña riká”, ke, ikáraꞌataje, riyajalo, riyani, piyuke rinane, kele waꞌató. Ilé ke ilaꞌajika riká, riká laꞌakale iꞌimaká piyukeja unká inaꞌukélaruna ke. Unká rilaꞌalá nuwakáraꞌaka iꞌimaká ke —ke Tupana kemaká Josuejlo.

16 E muní ke Josué apoka lapiwá. Rejéchami riwakáraꞌaka rijwaꞌatéjena awakako, mékeka nanámana yuriko iꞌimaká ke, pajluwaja chojé. E kaja nephá rejo, e Tupana wakáraꞌari nawáꞌaka Judá ikáꞌana piyukeja neꞌiyayá. Judá nanámana iꞌimaká, neká nawaꞌa paineko neꞌiyayá. 17 Rejomi Josué wakáraꞌari nanakiyana iphaka rejé. Nephaka rejé ejomi, Tupana kemari Zabdí nakú, riká, riyani, kele iꞌijnakáloje neꞌiyayá penaje. 18 Neká iphaño piño rejé, e pajluwano, pajluwano ke, nephaka rejé. Neká eꞌiyayá Tupana kemari Acán nakú. Carmi iꞌirí Acán iꞌimaká, Zabdí laké Acán iꞌimaká.

19 E kaja Josué kemari Acanjlo:

—Nujwaꞌateje, kaphí israelítana pechu Tupana chojé, piphá raꞌapí, pipuraꞌó kaja rinaku palá. Ñakele chuwa nuwata piꞌimaká nojló mékeka pilaꞌaká yukuna. Pimichoꞌotániña pichayo.

20 Raú Acán kemari rijló:

—Kewaka riká numájikare nakú pijló meꞌetení. Nuweꞌepí nulaꞌaká nakaje unká Tupana wátalare kaje. 21 Wakapichátaka nakaje Jericó e iꞌimaká wakajé, nomá aꞌarumakaji palá nojé wani iꞌimaká, Babilonia teꞌeré eyaje riꞌimaká; nomá kaja liñeru iꞌimaká re; nomá kaja pajlúwaꞌala oro, medio kilo jená ñaꞌakó iꞌimaká re. Ilé kaje nomaka palá nojé wani aú nujñaꞌá nujluwa riꞌimaká. Riká penaje nujaꞌá teꞌerí eꞌiyajé nupajré chojé iꞌimaká. Riwanaꞌajré chu notoꞌotá liñeru.

22 Ilé ke riꞌimaká riyukuna Josuejlo aú, riwakáraꞌa ajopana rijwaꞌatéjena iꞌijnaká Acán pajré ejo. Raú neꞌejná, iphaño rejo. E nephata nakaje rataꞌakare iꞌimaká, re liñeru iꞌimá riwanaꞌajré chu. 23 Riká najñaꞌá Josué ejo. Piyukeja israelítana iꞌimaño kaja re. Nayurí riká Tupana jimaje ke. 24 Rejomi nawaꞌa Acán, riyajalo, riyani, kele apú pukunaji ejo. Riká pukunaji ií iꞌimari Acor. Najñaꞌá kaja najwaꞌató nakaje rataꞌakare: liñeru, aꞌarumakaji, oro, kaje maká. Nawaꞌa kaja ripirana piyukeja: jémana pirakana, kawaruna, ovéjana, kajena rejo. Najñaꞌá kaja ripajré, piyuke wani rinane waꞌató. Kaja ewaja nephá rejo. 25 E Josué kemari Acanjlo:

—¿Naje chi pilaꞌá weká chapú wani iꞌimaká? Chuwa Tupana jaꞌapátajika pijló riká, chapú kaje piyukeja wamákare yajwé, pipachá iꞌimaká.

Rejéchami piyuke israelítana kaꞌaká jipa richá, nenókaloje riká penaje. Ñaké kaja nakaꞌaká jipa riyajalo, riyani, kele cha. Rejomi nakáraꞌata natami, piyukeja rinane, ripirana, kajena waꞌató. 26 Rejomi napitá kajrú jipa rapukúnami chojé; re joꞌó kaja joꞌó riká jipa meꞌetení. Ñakele naꞌá riká pukunaji ií Acor ke. (Chapú laꞌakana, ke kemakánaka Acor napuraꞌakó chu.) Ilé ke nalaꞌaká aú Tupana yuchá jaꞌapá riliyá.