3 Rejéchami Josué, rileꞌejena suráana waꞌaté lamáꞌataka nanane, neꞌejnakáloje pajimila Ai eyájena waꞌaté nókajo. Paineko Josué wakáraꞌari 30 mil rileꞌejena suráana nakiyana iꞌijnaká rejo lapí. 4 Neꞌejnaká rejo yámona, rimá najló: “Jemaꞌá palá: pajimila yámojo iꞌijnajé, rejé ataꞌajó palá nawaꞌajé. Re iꞌimajé lamáꞌatakeja ke, iwajlaꞌakáloje neká pajimila eꞌiyajé penaje. 5 Eyá nuká iꞌijnajeri ajopana suráana waꞌaté, ají ke pajimila numaná lokoꞌopáneje. Pajimila eyájena amájika aú weká, neꞌejnajé wajwaꞌaté nókajo. Raú weñaajó piño napiyá wayámojo, apú wakajé weñaakó iꞌimaká ke kaja. 6 Raú nechoꞌótaje piño weká, napechu iꞌimajíkale: ‘Neñaakó japi wapiyá, apú wakajé neñaakó iꞌimaká ke kaja’. 7 Juká cha neꞌemajika pajimila liyá ejéchami, iwajlaꞌajika pajimila eꞌiyajé, ikapichátakaloje neká piyukeja penaje, Tupana aꞌajíkale wajló riká pajimila. 8 Ikapichátajikaja neká ejomi, ikáraꞌataje riká pajimila piyuke, Tupana wakáraꞌaka ke. Ilé ke nuwakáraꞌaka ilaꞌaká”, ke rimaká rejo iꞌijnakaño lapijlo.

9 Kaja Josué wakáraꞌa neꞌejnaká rejo lapí, raú náchoꞌo rejo lapija, tajnaño pajimila Betel, eyá pajimila Ai, kele jiwami chojé. Rejé nataꞌó. Re neꞌemá pajimila yámojo, eyá Josué yuriro ajopana waꞌaté lapí ketana reja napajré jaꞌapiwá. 10 Muní ke lapiwá, Josué apoka, rejomi rawakata rileꞌejena suráana. Rejomi riká, pheñawilana waꞌaté, iꞌijnaño natukumá ají ke pajimila Ai ejo. 11 Yewicha nephaka rejo ee, suráana iꞌijnaño pajimila numaná lokoꞌopánejo. Rejé natajnó, jukaja kemachi neꞌemaká reyá. 12 Neꞌejnaká rejo nakuwá, Josué wakáraꞌari cinco mil suráana nakiyana jataꞌakó peꞌiyojé pajimila Betel, eyá pajimila Ai, kele jiwami chojé. 13a Iyamá puku ke suráana tamákaꞌatako rewá pajimila nakuwá.

14 Ai eyájena iꞌimakana amaka nawakako rejé aú, rawakátaka kiñaja rileꞌejena suráana. Rikaja náchoꞌoko natukumajo ke iꞌimakaño waꞌaté nókajo, eꞌiyonaja unká riweꞌepila ajopana iꞌimaká pajimila yámojo. 15 Nephaka nalokoꞌopáneje aú, Josué, rileꞌejena suráana waꞌaté ñaañó. Mapeja neñaakó, nechoꞌótakaloje neká yaꞌajnaje penaje. 16 Ilé ke namaka neñaakó aú, Ai eyájena iꞌimakana wakáraꞌari piyukeja rileꞌejena suráana jechoꞌótaka neká. Raú nechoꞌota neká ewá, juká cha neꞌemaká pajimila awaꞌayá. 17 E tuꞌujné piyukeja rileꞌejena suráana iꞌijnaká nechoꞌótaje, raú unká pajluwaja ñani suráa yurilo pajimila waꞌaphé penaje, raú mapeja riká pajimila yuriko. 18 Rejéchami Tupana kemaká Josuejlo: “Chuwa paꞌá najló rená, nawajlaꞌakáloje pajimila eꞌiyajé penaje. Nuká aꞌajeri pijló pajimila Ai”.

Raú Josué kemari najló, nawajlaꞌakáloje pajimila eꞌiyá yuríkaño eꞌiyajé. 19 Rejéchami suráana, meꞌechú chu iꞌimakaño, jáchoꞌoko pajimila eꞌiyajé, rejomi nakáraꞌata riká. 20 Eyá suráana, pajimila Ai eyájena, yakáꞌaño nayámojo, amaño kajrú ija jáchoꞌoko yenoje reyá. Unká méñoꞌojo neñaaló reyá. Neká, nechoꞌótakarena iꞌimaká, penájemina pajnoꞌoñó piño nechoꞌótaje napumí chuwá. 21 Josué, rijwaꞌatéjena waꞌaté, amaka aú pajimila káraꞌatako, nakeñoꞌó Aí eyájena nótakana. 22 Rejéchami iꞌimaño pajimila káraꞌataje iphaka kaja najwaꞌaté nókajo. Kaja tujlá ke netaká pajimájechaka nachá. Ilé ke israelítana nótaka neꞌemaká piyukeja. Unká na nanakiyánami iꞌimaló. 23 Pajimila Ai eyájena wakáraꞌajerija kalé iꞌimaró, unká nenola riꞌimaká. Napatá riꞌimaká ejomi, nawaꞌa riꞌimaká ají ke Josué iꞌimaká ejo.

24 Ilé ke israelítana nótaka nanaku ñaajeño michuna iꞌimaká. Rejomi napaꞌó piño pajimila Ai ejo, nenótakaloje piño rewá najlupemí yuríkaño penaje. 25-26 Riwakajé nenota 12 mil pajimila Ai eyájena iꞌimakaño. Piyuke wani Josué wakáraꞌaka nakapichátaka pajimila eyájena, Tupana wakáraꞌaka neꞌemaká ke. 27 Nanane kalé unká napichátala, unká kaja nenola napirana. Piyukeja nanánemi yuriko israelítanajlo, Tupana kemaká najló rinaku iꞌimaká ke. 28 Josué wakáraꞌari kaja nakáraꞌataka piyuke pajimila. Kajyaꞌatákeja ke nayurika piyukeja riká pajimila, reyá kaja keja riyuriko maárejecha ejená. 29 Eyá Josué akúwaꞌatari pajimila Ai eyájena iꞌimakana panúrupiya aꞌawaná nakojé, rejé ritakaꞌakáloje penaje. Re nayurí ritami akúwaꞌako najúwaꞌaka ejená. Kamú jaꞌakó ee, Josué wakáraꞌari ritami witúkaꞌatakana, raú nawitúkaꞌata ritami. Rejomi natoꞌotá ritami pajimila numanaje. Rejomi napitá kajrú jipa ritami chaje. Re joꞌó kaja riká jipa tami pitakó re meꞌetení.

30 E kaja Josué laꞌarí altar Tupana, kaphí napechu iꞌimakare chojejlo, nalaꞌakáloje puꞌují napéchuwa re rijló penaje. 31 Moisés michú wakáraꞌaka rilaꞌakana iꞌimaká ke nalaꞌaká riká. Rilanaꞌaká rinakojé iꞌimaká chuwá nalaꞌá riká. Nañapátaka altar laꞌakana ejomi, nenó napirana nakiyana. Neká tami nakáraꞌata altar nakojé, puꞌuwaré nalaꞌakare chaya, Tupana pechu, napechu waꞌaté, iꞌimakáloje palá panakojéchaka ke raú penaje.

34-35 Rejomi Josué puraꞌaró Tupana purákaꞌalo, Moisés michú lanaꞌakare iꞌimaká waꞌaté. Meke Tupana laꞌaká palá raꞌapiyá jemaꞌajeño nakú yukuna, eyá meke rilaꞌaká chapú, unká jemaꞌalaño raꞌapiyá yukuna lanaꞌakéjami waꞌaté ripuraꞌó najló, piyuke wani israelítana jemaꞌakáloje riká penaje. Inaana, yuwaná, ajopana teꞌeré eyájena najwaꞌaté iꞌimakaño, piyukeja jemaꞌañó riyukuna.