Nakapichátaka pajimila Jericó eyájena yukuna marí
6
E kaja nakuwaꞌa juni Jordán paꞌanojo pitá, reyá naꞌapá ají ke pajimila Jericó awaꞌajé. Ilé ke reyájena amaka naꞌapaka rejo aú, unká náchoꞌolo nañakajela eyá. Nachawínaꞌa kaja kurara, yenoje chipúkaꞌaka riká pajimila nakojé numaná, israelítana mujlúkaꞌaka piyá rejo. 2 E Tupana kemari Josuejlo: “Piyukeja nukapichátajika ijló pajimila Jericó eyájena, nawakáraꞌajeri, eyá rileꞌejena suráana, kajena waꞌató. 3 Ñakele piyukeja iká, pileꞌejena suráana waꞌaté, chipúkaꞌajeño piyukeja pajimila nakuwá, iphájeño tujlá ke pajimájechaka. Ilé keja ilaꞌajika pajluwa kuwáꞌata ke kala ketana. 4 Eyá iyamá kuwáꞌata kele, inaꞌuké chaya puraꞌajeño nujwaꞌaté, jaꞌapájeño itukumá. Neká wákoꞌojeño itukumá kaichama, nupurákaꞌalo iꞌimakare chu. Najñaꞌajé kaja nanakojó pajluwano ke luwiluwí kaje najwaꞌató. Paineko pajlúwapenoja ichipúkaꞌajika kurara nakuwá pajluwa kuwáꞌata ke kala japi. Eyá iyamá kuwáꞌata ke kala iꞌimajika wakajé, ichipúkaꞌajeno rinakuwá iyamá kuwáꞌata ke pe. Ichipúkaꞌajika ketana, inaꞌuké chaya puraꞌajeño nujwaꞌaté aphoꞌojika luwiluwí kaje chojé. 5 Itajátajikaja rinakuwá chipúkaꞌakana ee, naphoꞌojé apoꞌojó luwiluwí kaje chojé. Júpija nakúwaꞌatajika riká. Ilé ke jemaꞌajika ee, piyuke pijwaꞌatéjena awíyoꞌojika kaphí wani. Waꞌató ke kurara, jipa nakiyana iꞌimakare, kojnoꞌotájiko. Rejéchami pileꞌejena suráana jeñoꞌojika pajimila eꞌiyajé reyájena kapichátaje”, ke Tupana kemaká Josuejlo.6-14 (Resumen) E kaja Josué wakáraꞌari nachipúkaꞌaka pajimila nakuwá, Tupana wakáraꞌaka nalaꞌaká ke. Muní ke ñakeja kaja, apakala ke ñakeja kaja. Ají keja nachipúkaꞌajikano rinakuwá pajluwa kuwáꞌata ke kala ketana.
15 Eyá iyamá kuwáꞌata ke kala laꞌaká wakajé, napó lapiwá wani, nachipúkaꞌakaloje piño rinakuwá iyamá kuwáꞌata ke pe. 16 Nañapátakaja rinakuwá chipúkaꞌakana ee, Josué kemari rijwaꞌatéjenajlo: 17 “Ñakele chuwa wakapichátajika piyukeja pajimila eꞌiyowá iꞌimakaño, piyukeja nakaje rewá iꞌimakare waꞌató, Tupana wakáraꞌakale walaꞌaká ñaké. Rukaja kalé Rahab, ruñakaré chu iꞌimajíkaño, rujwaꞌateja kalé iꞌimajeñó kapichákajo liyá, rotaꞌakale naliyá nakejílaꞌajeño, nuwakáraꞌakarena majó iꞌimaká. 18 Unká ijñaꞌalaje ijluwa nakaje pajimila eyá, Tupana wátakale wakapichátaka riká piyukeya. Inakiyana ñaꞌajika ee kaꞌajná nakaje najluwa reyá, raú apúkaꞌaje wamaná piyukeja. Pachá wamaje chapú kaje yajwé. 19 Eyá nakaje oro, plata sereni, pejruꞌuwá, kaje nakiyá laꞌakanami, kajeja kalé ijñaꞌajé Tupánajlo, walamáꞌatakaloje riká kaichama chojé rijló penaje”, ke rimaká najló.
20 Rejéchami naphoꞌoká piño luwiluwí chojé, waꞌató ke nawíyoꞌoka kaphí wani pajñakani. Raú kurara, jipa nakiyá nalaꞌakare, kojnoꞌotaro. Rejéchami rileꞌejena suráana jeñoꞌoká pajimila eꞌiyajé, nakapichátakaloje neká penaje. 21 Rejéchami nakapichátaka neká, napirana waꞌató, Tupana kemaká najló ke.
22 E Josué kemari nakejílaꞌajeño penájeminajlo: “Chuwa iꞌijná Rahab ñakaré ejo. Eko iwaꞌa majó ruká, ruchiꞌiná, rojena, kele waꞌaté. Kaja weꞌematiya neká kapichákajo liyá, imaká rojló iꞌimaká ke”.
23 E neꞌejná. Nawaꞌa ruká, roraꞌapá, roló, rojena, kele reyá, israelítana pajré iꞌimaká yámajo. 24 Rejomi ajopana káraꞌataño riká pajimila piyukeja. Nakaje oro, plata, pejruꞌuwá kaje nakiyá laꞌakanami iꞌimakare, kajeja kalé najñaꞌá reꞌiyayá, nalamáꞌatakaloje riká Tupánajlo penaje. 25 Rahab, rojena, keleja iꞌimañó, rotaꞌakale nakejílaꞌajeño iꞌimaká. Rejomi israelítana nakiyana keja neꞌemajika najwaꞌaté.
26 Rejomi Josué kemari riká pajimila nakú: “Chapú wani Tupana laꞌajika wátajeri piño marí pajimila jáchoꞌotakana rapumí chuwá”.
27 Ilé ke Tupana aꞌaká Josué ñathé iꞌimaká, rejomi kajrú riyukuna jemaꞌakó rewá iꞌimaká.