Kovaa Jonás ma chi ñatuu ni jatna ini de ja sukan ni saꞌa Suꞌsi ma,

te ni ndakiti xeen ini de.

2 Te ni jikan-taꞌvi de nuu Suꞌsi ma,

te saꞌa jiñaꞌa de:

―Suꞌsi sa Iya Tátnuni,

jâ ni jini sa ja saꞌa ko kuu,

te sukan-ni kaꞌán sa nuu iyo-ka sa ñuu sa ma.

Chukan kúu ja ni jinu yachi sa kuaꞌan sa ñuu Tarsis ma,

vaa jini sa ja Suꞌsi vaꞌa ini kúu ni te ndaꞌvi ini ni te kuee ndakiti ini ni.

Vaa kútoo xeen ni ñayii ma te visi jâ ni jani ini ni sukan jin ndoꞌo jin neni i ma,

sani te ndákani ini ni,

te ñatuu xndoꞌo xneni-ka ni i.

3 Chukan kúu ja vitna,

vi Iya Tátnuni,

jikan-taꞌvi sa nuu ni ja na kaꞌni ñaꞌa ni,

vaa vaꞌa-ka kúu ja na kûu sa sana ja koteku sa ―kúu de jiñaꞌa de.

4 Te Iya Tátnuni ma,

jiñaꞌa ya:

―¿Jani ini ja vaꞌa-ni kúu ja ndákiti xeen ini ni a?

―kúu ya jiñaꞌa ya.

5 Te ni kee Jonás ma ñuu yukan,

te kuaꞌan de ichi nuu kana kandii ma,

te yukan ni iyo de.

Te ni saꞌa de in veꞌe ndaꞌa yutnu,

te ni jinkoo de kati ma,

te ndetu de ja kuni de nawa ko kuu ñuu yukan.

6 Te ni saꞌa Suꞌsi ma ja ni kana in taꞌyi kuii kuii,

te ni jaꞌnu i nuu núkoo de ma,

sukan-vaꞌa saꞌa i kati xini de ma,

sukan-vaꞌa ndusii ini de.

Te Jonás ma,

iyo sii ini xen-xeen de ja sukan ni jaꞌnu taꞌyi kuii kuii ma.

7 Kovaa xtnee neꞌe in-ka kivi ma,

te ni saꞌa Suꞌsi ma ja in tindaku ni jaa yoꞌo taꞌyi ma,

te ni yichi i.

8 Te nuu ni kana kandii ma,

te ni saꞌa Iya Tátnuni ma ja ni jakiꞌi xeen tachi,

te iꞌni xeen,

te vitna ja ndandaa xini Jonás ma káni kaꞌni kandii ma,

te ni kuita de,

te kûu de kúni de.

Te káꞌan de:

―Vaꞌa-ka kúu ja na kûu o ma sana ja koteku o ma ―kúu de kaꞌan de.

9 Sani te jiñaꞌa Suꞌsi ma nuu Jonás ma:

―¿Te sukan ndákiti xen-xeen ini ni ja ni yichi taꞌyi kuii kuii a?

―kúu ya jiñaꞌa ya.

Te ni ndakoneꞌe de:

―Ûni kûu sa kúni sa ja ndakiti xeen ini sa ―kúu de jiñaꞌa de.

10 Sani te jiñaꞌa Suꞌsi o Iya Tátnuni ma:

―Ndijin ja ni kundaꞌvi ini ni taꞌyi kuii kuii ma,

taꞌyi masu ni sunkoo ni,

ni a saꞌa ni ja kuaꞌnu i.

Vaa in jakuaa ma ni jite i,

te in-ka jakuaa ma,

te ni yichi i.

11 Te ñuu Nínive ma ñuu kaꞌnu yukan,

ja ka iyo viꞌi-ka ciento oko mil ñayii ja ñatuu ka jini i nawa ka saꞌa i ma,

jiꞌin kuaꞌa xeen kiti ma,

¿te saña,

ma kundaꞌvi ini sa ñuu yukan?

―kúu ya jiñaꞌa ya.