Mei Haidaa na Sualaparaa ei Naꞌuna
12
Siꞌei ba na paꞌi watauda rona famaꞌadigaa oꞌou fei maumau fei, rawaꞌaꞌafainaa minaa ei manumanu na fatautauaa oꞌou mawe ei hafeloꞌa, ei na faꞌalabeꞌaa oꞌou, uaa onei ponifaweꞌi aꞌa fei fiwaleia na ude maꞌaa oꞌou. 2 Onei fanunuꞌuanaa aꞌa Jesus, mei fafasui ma fapedupeduu fei narafaweꞌiaa oꞌou. Uaa aꞌa fei niꞌeniꞌea i maꞌana, ina apitainaa fei fiꞌiaa fei hawafolo ma lomi na naranara watauda aꞌa fei famamafaa roꞌou hia aꞌa fei hawafolo ma nawe guta i pepei maꞌau fei gutanaa mei hapara, mei Haidaa. 3 Hamonei naramaꞌaiaa mei na apitainaa fei fadugeaa ei ramaꞌaa hafelo ba hamoneiꞌaa tarere ma faꞌasisi.4 Aꞌa ei oteꞌoteiaa hamuꞌou wagii ei hafeloꞌa, hamotawe fadugepaꞌaa fei ba i wigii namoo hamuꞌou. 5 Ma ana hamona madiꞌinaa fei warea faꞌunuwenuwea, fei i ware ba hamuꞌou, naꞌu:
“Mena naꞌuu, apuna nara ba fei sualaparaa mei Fasu abaa baua manumanu,
ma apuna faꞌasisiaa fei naranaramu ei na sualapagio,
6 uaa mei Fasu, i sualaparaa ei na haguaa roꞌou,
ma fanimaꞌaiaa minaa ei taweana ba naꞌuna.”
7 Ei waiwaiaa manumanu, hamonei tonia aleꞌei sualapara. Mei Haidaa na bigiꞌia aleꞌei, uaa hamuꞌou, naꞌuna. Haa, hini lomi i sualapagia mei amana? 8 Ma nabaa lomi hamoꞌaa tonaa fei sualapara (ma minaa ei, rona tonaa fei sualapara), hanuna ba hamuꞌou ama lomi ma abaa paꞌaa naꞌu. 9 Ma ana, minaa oꞌou, ona paꞌi amaa oꞌou ma ei amaa oꞌou, ramaꞌa ua. Rona sualaparaa oꞌou ma ona maꞌauaa roꞌou aꞌa fei. Siꞌei, inei bauanadiai fei maꞌauaa oꞌou aꞌa mei Amaa ei spiritii oꞌou ba oꞌaa gutafarawani! 10 Aꞌa fei apaꞌaa ei amaa oꞌou, aleꞌei ba tamanu ina rawani, rona sualaparaa oꞌou ei oi guta aꞌa roꞌou; maꞌuaa mei Haidaa na sualaparaa oꞌou ba fararawani oꞌou ba onei oafipui aꞌa fei apunaiana. 11 Lomi hefaa sualapara ona nara ba na rawani ei oi tonia, maꞌuaa aleꞌei fiꞌia. Maꞌuaa hinene, ei rona tofarawaninia, roꞌaa hufuꞌaa fuaa fei wanewanea ma gutafarawania.
12 Siꞌei, hamonei faweꞌiaa ei rafileleaa pani ma duꞌuu hamuꞌou. 13 “Papafarawaninaa ei talaa pinee hamuꞌou,” ba ei afetoo, lomi roꞌaa afetodiai, maꞌuaa roꞌaa talaipaꞌi.
Fei Warefaꞌaia ba Oneiꞌaa Fadugeaa mei Haidaa
14 Onei bigifaweꞌi ba o gutafarawani ua aꞌa minaa ei ramaꞌa ma fafafaꞌarai; lomi nemea ba i maꞌa mei Fasu nabaa lomi ina fafaꞌarai. 15 Omaꞌaa hamuꞌou ba nemea neiꞌaa rapuaa fei rawaniꞌaa mei Haidaa ma neiꞌaa nusu bauanai fei paraꞌaa wara ba i faꞌasiꞌanaa fisibaia ma fafeloaa watauda. 16 Omaꞌaa hamuꞌou ba lomi nemea i bigiꞌaa fei fitatafipaꞌaia ma hamoneiꞌaa aleꞌei Esau, mei lomi na maꞌauaa mei Haidaa ma fei ba i tonia aꞌa amana uaa hia umaꞌua naꞌu wawane, ina aloꞌuaia aꞌa hepalo ua duꞌua. 17 Hamona aidadii ba nenee fei, ei ba i tonaa fei hawegia, lomi na ugainia amana. Faꞌua ba na pasi ranu pudana ei ba i tonaa fei hawegia, maꞌuaa lomi na filogipaꞌaa fei naranarana.
18 Lomi hamona nomai aꞌa hepalo maugeni ba hamoꞌaa idoia, hepalo ina paꞌi hafi, o aꞌa fei roromaa ma fei na fawawaꞌau, o fei baua lalarena; 19 lomi hamona nomai aꞌa fei inaiaa fei maniwa, o aꞌa fei lao, fei rona guainia ma ronamina aiꞌiꞌigai ba ineiꞌaa waredinaa hepalo warea aꞌa roꞌou, 20 uaa lomi roꞌaa harepaꞌaa fei rarabaa warea ba, “Nabaa ana hefaa manulelele na noꞌidoꞌuaialoo fei maugeni, hamonei nafafamaꞌeia.” 21 Hefei fanunuana, namina famamaꞌau ma siꞌei, na ware Moses ba, “Unamina maꞌaufunurere!”
22 Maꞌuaa hamona nodigimai i Maugeni Zion, fei Jerusalem i pafea, fei gufuu mei Haidaa, mei fi oalao. Hamona nobapaꞌamii pufabaꞌabaꞌa aloꞌalo, ei roifi niꞌeniꞌefipui, 23 dinamii aꞌa fei losuu ei umaꞌua, ei na panadii haraa roꞌou i pafea. Hamona nodigimai aꞌa mei Haidaa, mei fadududuaa minaa ei ramaꞌa, aꞌa ei spiritii ei rona wanewane, ei rona fafaꞌaraidii, 24 bapaꞌamii Jesus, mei fawanewaneaa watola, mei na bigiꞌaa fei manufau fiꞌugaia ma hamona nopaꞌamii fei uguꞌuguaa namo, fei na mua laraa fei namoo Abel.
25 Omaꞌaa hamuꞌou ba hamoneiꞌaa barafeaa mei fi ware. Nabaa faꞌua ba lomi roꞌaa tela ei ro barafeaa mei na warefaꞌaiaa roꞌou yeni malagufu, batanai ba oꞌaa tela nabaa ona barafeaa wareaa mei i guta pafea? 26 Fei au fei, fei laona na nueinaa feni malagufu, maꞌuaa eꞌeni ina faꞌunai ba, “Hepoadiai a farereaa feni malagufu, maꞌuaa aꞌa ba feni malagufu ua, hamatee fei haroo pafea anaa.” 27 Fei hanuu fei warea “Hepoadiai” sifei ba i haꞌesiminaa ei na tatawei—ei famamarana ma ei lomi na tataweipaꞌi, i ude.